Me Sauma na iVolatabu

Meda Vakananuma Vakacava na Nona Mate o Jisu?

Ena veivosakitaki ena ulutaga qo eso na taro o rairai dau lomatarotarotaka tu, e tiko tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kedra isau.

1. Me vakananumi vakacava na nona mate o Jisu?

A tukuna vei iratou na nona imuri o Jisu me ratou vakananuma na nona mate ni ratou vakayagataka vata na madrai kei na waini vakaivakatakarakara. E vakatakarakarataka na yagoi Jisu na madrai, na waini e vakatakarakarataka na nona dra.​—Wilika Luke 22:19, 20.

Na madrai a vakayagataka o Jisu e sega ni vakaleveni se vakaisi. Na isi e dau vakaibalebaletaki ena iVolatabu me ivalavala ca. Na madrai e vakatakarakarataka vinaka na yago uasivi i Jisu. A cabora na yagona me isoro, sa sega tale kina ni veiganiti me cabori na isoro manumanu me vaka e tukuni ena lawa a soli vei Mosese. (Iperiu 10:5, 9, 10) Na waini e vakatakarakarataka na dra talei i Jisu a liviraki me isoro ni noda ivalavala ca.​—Wilika 1 Pita 1:19; 2:24; 3:18.

2. Meda vakananuma ena gauna cava na nona mate o Jisu?

A mate o Jisu donuya na soqo ni Lakosivia ena ika14 ni Naisani. E dau tekivu na nodra siga na Jiu ni sa dromu na siga. Ena yakavi ni bera na nona mate, a vakayagataka vata kei ratou na nona yapositolo na kakana ni Lakosivia. A qai tekivuna e dua tale na ivakayakavi me vakananumi kina na nona mate.​—Wilika Luke 22:14, 15.

Era vakananuma tale ga na tamata ni Kalou nikua na ka e vakarautaka na Kalou ena vuku i Jisu meda sereki kina na kawatamata mai na ivalavala ca kei na mate. (Lako Yani 12:5-7, 13, 17) Na iVakananumi ni nona mate o Jisu e dau vakayacori ga vakadua e veiyabaki me vaka ga na soqo ni Lakosivia, e dau caka ni sa dromu oti na siga ena ika14 ni Naisani ena ivolanivula vakaivolatabu.​—Wilika Joni 1:29.

  3. O cei me kania na madrai qai gunuva na waini?

Ni solia vei ratou na nona imuri na waini o Jisu, e kaya: “Na bilo qo e vakaibalebaletaka na veiyalayalati vou.” (1 Korinica 11:25) Na veiyalayalati vou a sosomitaka na nona veiyalayalati na Kalou kei ira na Isireli ena lawa a solia vei Mosese, a yalataka kina vei ira nira na nona tamata ke ra talairawarawa tiko ga vua. (Lako Yani 19:5, 6) Ia era sega ni vakarorogo vua na Kalou na Isireli, mani vakarautaka o Jiova e dua na veiyalayalati vou.​—Wilika Jeremaia 31:31.

Eso ga era okati ena veiyalayalati vou, ia o Jiova ena vakalougatataki ira kina e levu. Era okati ena veiyalayalati vou e le vica ga, era le 144,000. E milioni mai na veimatanitu era na vakalougatataki mera bula tawamudu e vuravura ena vukudra na le vica qori. Eso vei ira na okati ena veiyalayalati vou qori era se qaravi Jiova tiko e vuravura nikua. E veiganiti ga mera kania o ira qori na madrai ra qai gunuva na waini, ni bilo e “vakaibalebaletaka na veiyalayalati vou.”​—Wilika Luke 12:32; Vakatakila 14:1, 3.

4. E yaga vakacava vei keda na iVakananumi?

Na iVakananumi ni nona mate o Jisu e dau caka e veiyabaki ena vakatitobutaka na noda vakavinavinakataka na loloma vakasakiti i Jiova. A talai Luvena mai me mate ena vuku ni noda ivalavala ca. Nida tiko gona ena iVakananumi, meda dau vakasamataka na inaki ni nona mate ena vukuda o Jisu. Meda vakasamataka na sala eda rawa ni vakaraitaka kina nida vakavinavinakataka na ka erau cakava ena vukuda o Jiova kei Jisu.​—Wilika Joni 3:16; 2 Korinica 5:14, 15.

Me ikuri ni ivakamacala, raica na tabana e 206-208 ni ivola qo, Na Cava Sara Mada e Kaya na iVolatabu? tabaka na iVakadinadina i Jiova.