Ena icavacava ni ikatolu ni nona ivola na yapositolo o Joni ena iVolatabu, a kaya kina: “E levu na ka au via vola yani vei iko, ia au sega ni vinakata meu volavola tiko ga yani ena iqi kei na peni.” Na vakadewa taumada ni vosa vaKirisi a vakayagataka o Joni e vakaraitaka ni sega ni vinakata me volavola tiko ga ena “[iqi] loaloa kei na gasau.”​—3 Joni 13, The Kingdom Interlinear Translation of the Greek Scriptures.

Na balavu ni nodra peni na vunivola e tautauvata kei na balavu ni dua na isema ni gasau. Ena sivi vakamomoto e dua na mua ni gasau, sa na qai tavai vakalailai na matana. E rawa ni vakayagataka na vunivola na vatu e varovaroa me vagatara tale kina na mata ni gasau. Na kena irairai kei na ka e cakava e tautauvata kei na peni ni gauna qo na fountain pen, e kaukamea na matana.

E levu na iqi [“loaloa”] e caka mai na pauta loaloa ni kubou qai wakivata kei na drega ni kau, e kabikabi. Na iqi qori e dau volitaki mamaca, ena vinakati tale ga me dua tu ga na ivakarau ni wai e wakivata ni bera ni vakayagataki. Na iqi qori ena mamaca ena gauna sa vakayagataki kina ena pepa e caka mai na kuta se na kuli ni manumanu, ena sega ni curuma. Koya gona, ena rawa ni vakayagataka na sipazi suasua e dua na dauvolaivola me bokoca e dua na cala e laurai, qori e dua tale ga na iyaya era dau vakayagataka vakalevu o ira na vunivola. Na itukutuku qo me baleta na vakayagataki ni iqi ena gauna makawa e vakamacalataka na ka era rairai vakasamataka na dauvola iVolatabu ena gauna era vola kina ni na bokoci se kautani eso na yaca mai na ivola ni bula ni Kalou.​—Lako Yani 32:32, 33; Vakatakila 3:5.

E tukuna na Cakacaka 18:3 ni dau cula valelaca na yapositolo o Paula. Ena gauna vakaivolatabu, o ira na dau cula valelaca era dau talia na vuti ni me kei na kameli me caka kina na tikitiki ni isulu. Era qai cula vata na tikitiki ni sulu qori me caka kina na valelaca mera vakayagataka o ira na dausiko vanua. E levu na valelaca ena gauna oya era caka mai na leca. So tale era caka mai na lineni, era dau kau mai Tarisu na koro i Paula. Kena irairai ni dau vakayagataka kece o Paula na mataqali isulu va qori. Ia na gauna rau cakacaka kina kei Akuila o Paula de dua a cula na laca e caka mai na lineni e dau biri ena mata ni vale me ivakaruru.

Kena irairai a vulica o Paula na cakacaka qo ni se itabagone. E laurai ena ivolavivigi mai Ijipita​—e caka mai na kuta​—ena gauna se veiliutaki kina na matanitu o Roma, ena tekivu vuli cakacaka e dua e Ijipita ni sa voleka ni yabaki 13. Ke a tekivu vulica o Paula na cakacaka ni cula valelaca ena yabaki qori, kena irairai ni sa na kila vinaka na iwalewale ni kotikoti ni isulu se leca ni se qai yabaki 15 se 16. E sa na kila vinaka tale ga kina na ivakavakayagataki ni duidui iculaliga kei na iwalewale ni culacula. E tukuna na ivola na Social Context of Paul’s Ministry: “Ena gauna sa oti kina nona vuli cakacaka o Paula de dua a soli vua na iyaya ni cakacaka kece me lai vakayagataka.” E tukuna na ivola vata ga qori ni “na rawarawa sara na cula valelaca ena vanua ga o gole kina ni vica wale ga na nomu isele kei na iculaliga,” qori e dua na ka e rawa ni vakararavi kina o Paula me vukei koya ena nona cakacaka vakaulotu.