Kɛ́ okwɛ Biblia lɛ mli lɛ, obaana niŋmai babaoo yɛ mli. Kaahã no je onijiaŋ wui kɛ Biblia lɛ kanemɔ. Moŋ lɛ, ŋɔɔ Biblia lɛ tamɔ okpɔlɔ ko ni aŋmɛ ni niyenii srɔtoi babaoo yɛ nɔ. Jeee nɔ fɛɛ nɔ ni onaa yɛ okpɔlɔ lɛ nɔ lɛ obaanyɛ oye. Moŋ lɛ, fioo ni obaanyɛ oye ni otɔ lɛ ni obaatĩ.

 Nakai nɔŋŋ kɛ́ obaaná o-Biblia kanemɔ he sɛɛ kɛmɔ shi lɛ, esa akɛ okɛ ojwɛŋmɔ ama nɔ ni okaneɔ lɛ nɔ jogbaŋŋ. Sane nɛɛ baaye ebua bo ni ofee nakai.

Nɔ ni wɔbaasusu he yɛ sane nɛɛ mli

•  Mɛni hewɔ esa akɛ okɛ ojwɛŋmɔ ama nɔ ni okaneɔ yɛ Biblia lɛ mli lɛ nɔ?

•  Te obaafee tɛŋŋ oná Biblia kanemɔ he sɛɛ jogbaŋŋ kɛmɔ shi?

•  Nɔ ni otipɛŋfoi kɛɔ

 Kɛ́ okɛ ojwɛŋmɔ ma Biblia lɛ kanemɔ nɔ jogbaŋŋ ni ohã efee osu lɛ, obaanyɛ oná he sɛɛ kɛmɔ shi. Susumɔ nɔkwɛmɔnɔ nɛɛ he okwɛ: Kɛ́ okɛ tii-baa wo nula mli, ni be kukuoo nɔŋŋ lɛ ojie lɛ, ebaamɔ fioo. Shi kɛ́ ohã ekã nula lɛ mli etsɛ fioo lɛ, ebaamɔ waa.

 Nakai nɔŋŋ eji yɛ Biblia kanemɔ gbɛfaŋ. Nɔ najiaŋ ni obaakane Biblia lɛ oyayai lɛ, hemɔ be kɛjwɛŋ nɔ ni okaneɔ lɛ nɔ jogbaŋŋ. Nakai ji bɔ ni mɔ ni ŋma Lala 119 lɛ fee. Ewie yɛ Nyɔŋmɔ mla lɛ he akɛ: “Mijwɛŋɔ nɔ gbi muu fɛɛ.”​—Lala 119:97.

 Shi no etsɔɔɔ akɛ aatsɔɔ akɛ esa akɛ ohe gbi muu fɛɛ kɛkane Biblia lɛ ni ojwɛŋ nɔ. Oti lɛ ji akɛ, Lalatsɛ lɛ he be kɛjwɛŋ Nyɔŋmɔ Wiemɔ lɛ nɔ. Nakai ni efee lɛ ye ebua lɛ ni enyɛ ekpɛ yiŋ kpakpai.​—Lala 119:98-100.

 “Gbi ko lɛ, mimami kɛɛ mi akɛ, ‘Oyɛ gbii kpawo yɛ otsi lɛ mli, ni nakai otsi lɛ mli fɛɛ lɛ, nibii pii ni ofeɔ lɛ, bo diɛŋtsɛ ohe ofeɔ ohãa. Mɛni hewɔ okɛ nakai be lɛ eko hãaa Yehowa? Ehi akɛ obaafee nakai!’”​—Melanie.

 Kɛ́ ojwɛŋ Biblia mli shishitoo mlai anɔ lɛ, ebaahã okpɛ yiŋ kpakpai​—akɛ nɔkwɛmɔnɔ lɛ, be ni ohalaa mɛi ni okɛbaabɔ naanyo, loo kɛ́ aaka bo ni ofee nɔ ko gbonyo.

•   Too gbɛjianɔ. Oblayoo ko ni atsɛɔ lɛ Julia lɛ wo ŋaa akɛ, “Too obe he gbɛjianɔ kɛhã Biblia lɛ kanemɔ. Le nɔ ni obaakane, be ni obaakane, kɛ he ni obaakane.”

•   Taomɔ he ko ni sa kɛhã nikanemɔ. Oblayoo ko ni atsɛɔ lɛ Gianna lɛ wo ŋaa akɛ, “Taomɔ he ko ni yɔɔ dioo. Agbɛnɛ hu, hã oweku lɛ mli bii lɛ ale be ni oto ni okɛkaneɔ Biblia lɛ, koni amɛkafee nibii ni baagbala ojwɛŋmɔ.”

   Kɛ́ foŋ loo ehenɔi lɛ eko nɔ okaneɔ Biblia lɛ yɛ lɛ, too he gbɛjianɔ ni ekagbala ojwɛŋmɔ. Obaanyɛ okane Biblia lɛ nɔ ni aprinti lɛ. Anɔkwa, niiamlitaomɔ etsɔɔ akɛ, kɛ́ ookane Biblia lɛ nɔ ni aprinti lɛ, ewaaa akɛ obaanu nɔ ni okaneɔ lɛ shishi jogbaŋŋ. Nɔ ni tamɔɔɔ nakai lɛ, kɛ́ ookane yɛ foŋ loo ehenɔi lɛ anɔ lɛ, ja omia ohiɛ waa dani obaanyɛ okɛ ojwɛŋmɔ ama nɔ ni okaneɔ lɛ nɔ.

   “Kɛ́ miikane nii yɛ foŋ loo ehenɔi lɛ anɔ lɛ, nibii gbalaa mijwɛŋmɔ. Kɛ́ jeee mɛseji loo nɔ ko ni tamɔ nakai ni miigbala mijwɛŋmɔ lɛ, belɛ ekolɛ mibatri lɛ miigbo loo mideta lɛ etã. Kɛ́ mihiɛ Biblia lɛ nɔ ni aprinti lɛ, nɔ ni he hiaa mi nɔŋŋ ji, ní maná he ko ni woko duŋ ni manyɛ makane nii jogbaŋŋ yɛ.”​—Elena.

•   Sɔlemɔ klɛŋklɛŋ. Kɛ́ ootao okane Biblia lɛ fã ko lɛ, sɔlemɔ obi Yehowa koni eye ebua bo ni onu nɔ ni obaakane lɛ shishi, ni okai ni okɛtsu nii yɛ oshihilɛ mli.​—Yakobo 1:5.

   Bɔ ni afee ni otsɔɔ Yehowa akɛ nɔ ni obiɔ lɛ lɛ kã otsui nɔ waa lɛ, taomɔ sane ni okaneɔ lɛ mli jogbaŋŋ. Mɛɛ gbɛ nɔ obaatsɔ ofee nakai? Kɛ́ ookane Biblia lɛ yɛ JW Library lɛ nɔ, loo yɛ Intanɛt lɛ nɔ lɛ, obaanyɛ okliki kuku ni okaneɔ lɛ nɔ ni ona ehe saji krokomɛi hu.

•   Bi saji. Akɛ nɔkwɛmɔnɔ lɛ: ‘Mɛni sane ni mikane nɛɛ tsɔɔ mi yɛ Yehowa he? Ani ehã mina Yehowa su ko ni manyɛ makase?’ (Efesobii 5:1) ‘Mɛni mikase yɛ sane nɛɛ mli ni manyɛ mikɛtsu nii yɛ mishihilɛ mli?’ (Lala 119:105) ‘Ani manyɛ mikɛ nɔ ni mikane lɛ aye abua mɛi krokomɛi hu?’​—Romabii 1:11.

   Agbɛnɛ hu, bi ohe akɛ, ‘Mɛɛ tsakpãa yɔɔ nɔ ni mikaneɔ nɛɛ kɛ sane oti titri ni Biblia lɛ wieɔ he lɛ teŋ?’ Sanebimɔ nɛɛ he miihia waa diɛŋtsɛ. Mɛni hewɔ? Ejaakɛ saji fɛɛ ni yɔɔ Biblia lɛ mli​—kɛjɛ Mose Klɛŋklɛŋ Wolo lɛ kɛyashi Kpojiemɔ lɛ​—ekɔɔ sane oti titri ko he. No ji, bɔ ni Yehowa baatsɔ eŋwɛi Maŋtsɛyeli lɛ nɔ etse egbɛ́i he, ni etsɔɔ akɛ eyɛ hegbɛ akɛ eyeɔ nɔ, ni gbɛ ni etsɔɔ nɔ eyeɔ nɔ lɛ hi fe fɛɛ.