DAVID, ni hi shi yɛ blema Israel lɛ ji mɔ ni wie wiemɔi nɛɛ kɛjie yoo ko ni ekɛkpe lɛ yi. Yoo nɛɛ gbɛ́i ji Abigail. Mɛni hã David jie eyi lɛ? Ni mɛɛ gbɛ nɔ wɔbaanyɛ wɔkase Abigail?

Be ni Maŋtsɛ Saul nyiɛ David sɛɛ lɛ, David jo foi kɛtee ŋa lɛ nɔ, ni nɛkɛ be nɛɛ mli ekɛ Abigail kpe. No mli lɛ, Abigail kɛ nuu niiatsɛ ko ni atsɛɔ lɛ Nabal lɛ ebote gbalashihilɛ mli. Nabal yɛ toi babaoo, ni etsuji lɛ kɛ etoi lɛ yaa niyeli yɛ gɔji lɛ anɔ yɛ Yuda wuoyigbɛ. David kɛ ewebii lɛ tsɔ “gbogbo” amɛhã Nabal tookwɛlɔi lɛ kɛ etoi lɛ, no ji, amɛbu amɛhe. Sɛɛ mli lɛ, David tsu kɛtee Nabal ŋɔɔ, ni ekpa lɛ fai akɛ ehã ekɛ ewebii lɛ ‘nɔ fɛɛ nɔ ni enine baashɛ nɔ.’ (1 Sam. 25:8, 15, 16) David kɛ ewebii lɛ ye amɛbua Nabal waa. No hewɔ lɛ, kulɛ esaaa akɛ ewaa kɛhãa lɛ kwraa akɛ ebaake amɛ nɔ ko.

Shi Nabal hãaa amɛ. Moŋ lɛ, etsirɛ wiemɔi ayisɛɛ ehã David webii lɛ ni esopa amɛ. Gbɛ́i Nabal lɛ shishi ji, “Buulu” loo “Kwashia,” ni nuu nɛɛ hi shi yɛ egbɛ́i lɛ naa. Buului awiemɔ kɛ jɛmɔi ni ekɛmaje David lɛ hewɔ lɛ, David kpɛ eyiŋ akɛ ebaatsɔɔ lɛ nɔ ko naa. Nabal eta suru he, ni amrɔ nɛɛ ekɛ eweku lɛ fɛɛ baanu kowɛ ŋma.—1 Sam. 25:2-13, 21, 22.

Abigail na hiŋmɛi sha lɛ. No hewɔ lɛ, efee ekãa ni ekɛ David kɛ ewebii lɛ yakpe. Ejɛ bulɛ mli ekpa David fai ní esusu wekukpaa ni yɔɔ ekɛ Yehowa teŋ lɛ he ni eŋmɛɛ sane lɛ he. Ehã David, ni ji mɔ ni baaye Saul sɛɛ akɛ maŋtsɛ lɛ, kɛ ewebii lɛ niyenii. Be ni David na nɔ ni Abigail efee lɛ, ewie akɛ Yehowa ji mɔ ni tsu Abigail koni ebatsĩ enaa ni ekafee esha yɛ Nyɔŋmɔ hiɛ. Ekɛɛ lɛ akɛ: “Aaajɔɔ onilee nɛɛ, ni aaajɔɔ bo diɛŋtsɛ akɛ ŋmɛnɛ otsĩ minaa ni mikaye lá ko yi sɔ̃.”—1 Sam. 25:18, 19, 23-35.

Mɛni wɔkaseɔ yɛ sane nɛɛ mli? Esaaa akɛ wɔfeɔ trumu tamɔ Nabal, moŋ lɛ esa akɛ wɔhiɛ asɔ nijuji ni mɛi feɔ amɛhãa wɔ lɛ. Agbɛnɛ hu, kɛ́ wɔna akɛ shihilɛ ko baanyɛ ekɛ naagba aba lɛ, nyɛhãa wɔkwɛa nɔ ni wɔbaanyɛ wɔfee kɛmɔ naa. Nyɛhãa wɔkpaa Nyɔŋmɔ fai, tamɔ bɔ ni lalatsɛ lɛ fee lɛ, akɛ: “Tsɔɔmɔ mi jwɛŋmɔ ni hi kɛ nilee.”—Lala 119:66, NWT.

Kɛ́ wɔfee wɔnii yɛ nilee loo hiɛshikamɔ mli lɛ, ekolɛ mɛi baana. Ni amɛwie jio, amɛwieee jio lɛ, ekolɛ amɛbaanu he tamɔ David, mɔ ni wie akɛ, “Aaajɔɔ onilee nɛɛ” lɛ.