NIKASEMƆ 08
Obaanyɛ Otsɔ Yehowa Naanyo
Yehowa miisumɔ ni ole lɛ jogbaŋŋ. Mɛni hewɔ? Ele akɛ kɛ́ otee nɔ okase esui, enifeemɔi, kɛ eyiŋtoi lɛ ahe nii lɛ, obaasumɔ ni otsɔ enaanyo. Shi ani obaanyɛ otsɔ Nyɔŋmɔ naanyo lɛɛlɛŋ? (Kanemɔ Lala 25:14.) Mɛni esa akɛ ofee koni otsɔ enaanyo? Biblia lɛ hãa sanebimɔi nɛɛ hetoo, ni etsɔɔ nɔ hewɔ ni Yehowa ji naanyo ni fe fɛɛ ni obaanyɛ oná lɛ.
1. Mɛni Yehowa fɔ̃ɔ bo nine ni ofee?
“Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.” (Yakobo 4:8) Mɛni enɛ tsɔɔ? Yehowa miikɛɛ bo akɛ obatsɔ enaanyo. Mɛi komɛi heee amɛyeee akɛ amɛbaanyɛ amɛtsɔ Nyɔŋmɔ naanyo, ejaakɛ amɛnaaa lɛ. Shi Yehowa etsɔ e-Wiemɔ ni ji Biblia lɛ nɔ ehã wɔle nɔ fɛɛ nɔ ni esa akɛ wɔle yɛ ehe, koni wɔnyɛ wɔkɛ lɛ abɔ naanyo. Eyɛ mli akɛ wɔnaaa Yehowa moŋ, shi kɛ́ wɔkane ewiemɔ ni yɔɔ Biblia lɛ mli lɛ, wɔ kɛ lɛ teŋ naanyobɔɔ lɛ mli baawa.
2. Mɛni hewɔ Yehowa ji Naanyo ni fe fɛɛ ni obaanyɛ oná lɛ?
Mɔ ko mɔ ko bɛ ni sumɔɔ bo tamɔ Yehowa. Eesumɔ ni oná miishɛɛ ni oba eŋɔɔ kɛ́ ootao wamɔ ko hu. Obaanyɛ ‘oshɛrɛ nibii ni hãa oyeɔ otsui lɛ fɛɛ oshwie enɔ, ejaakɛ ejwɛŋɔ ohe.’ (1 Petro 5:7) Be fɛɛ be lɛ, Yehowa efee klalo akɛ ebaaye ebua enanemɛi, eshɛje amɛmii, ni ebo amɛ toi.—Kanemɔ Lala 94:18, 19.
3. Mɛni Yehowa sumɔɔ ni enanemɛi afee?
Yehowa sumɔɔ gbɔmɛi fɛɛ, “shi mɔ ni ja lɛ, lɛ ekɛbɔɔ naanyo.” (Abɛi 3:32) Yehowa biɔ ni enanemɛi afee nibii ni esusuɔ akɛ amɛhi lɛ, ni amɛkpoo nibii ni esusuɔ akɛ amɛhiii lɛ. Ekolɛ mɛi komɛi baasusu akɛ amɛnyɛŋ amɛfee nibii fɛɛ ni Yehowa sumɔɔ ni amɛfee lɛ, ni amɛkpoo nibii fɛɛ ni ehiii lɛ. Shi Yehowa nuɔ nii ashishi. Kɛ́ mɔ ko sumɔɔ lɛ lɛɛlɛŋ, ni efeɔ nɔ fɛɛ nɔ ni ebaanyɛ koni esa ehiɛ lɛ, ebaaná mɔ lɛ he miishɛɛ.—Lala 147:11; Bɔfoi 10:34, 35.
KASEMƆ PII OFATA HE
Obaana nibii krokomɛi ni baawa bo ni obatsɔ Yehowa naanyo, kɛ nɔ hewɔ ni lɛ ji Naanyo ni fe fɛɛ ni obaanyɛ oná lɛ.
4. Yehowa naanyo ji Abraham
Abraham (loo Abram) he sane ni yɔɔ Biblia lɛ mli lɛ hãa wɔnaa nɔ ni atsɔɔ kɛ́ akɛɛ Nyɔŋmɔ naanyo ji mɔ ko lɛ. Nyɛkanea Abraham he sane yɛ 1 Mose 12:1-4 lɛ. No sɛɛ lɛ, nyɛsusua sanebimɔi nɛɛ ahe:
-
Mɛni Yehowa kɛɛ Abraham akɛ efee?
-
Mɛɛ shi Yehowa wo lɛ?
-
Mɛni Abraham fee yɛ nɔ ni Yehowa kɛɛ lɛ lɛ he?
5. Nɔ ni Yehowa biɔ yɛ enanemɛi adɛŋ
Wɔ fɛɛ wɔsumɔɔ ni wɔnanemɛi afee nibii komɛi.
-
Mɛɛ nibii komɛi osumɔɔ ni onanemɛi afee ahã bo?
Nyɛkanea 1 Yohane 5:3 lɛ, ni nyɛsusua sanebimɔ nɛɛ he:
-
Mɛni Yehowa biɔ yɛ enanemɛi adɛŋ?
Ekolɛ ehe baahia ni wɔtsake wɔsubaŋ loo wɔjeŋba, koni wɔnyɛ wɔbo Yehowa toi. Nyɛkanea Yesaia 48:17, 18 lɛ, ni nyɛsusua sanebimɔ nɛɛ he:
-
Mɛni hewɔ Yehowa biɔ ni enanemɛi atsake amɛsubaŋ lɛ?
Naanyo kpakpa baakɛɛ bo nibii ni kɛ́ ofee lɛ ebaabu ohe, ní obaaná he sɛɛ. Yehowa hu feɔ nakai nɔŋŋ ehãa enanemɛi
6. Nɔ ni Yehowa feɔ ehãa enanemɛi
Yehowa waa enanemɛi koni amɛdamɔ amɛnaagbai anaa. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛɛ gbɛ nɔ Yehowa wa yoo lɛ ni ena nɔ ni esa akɛ efee kɛ́ ená susumɔi kɛ henumɔi ni esaaa?
Nyɛkanea Yesaia 41:10, 13 lɛ, ni nyɛsusua sanebimɔi nɛɛ ahe:
-
Mɛni Yehowa ewo shi akɛ ebaafee ehã enanemɛi fɛɛ?
-
Ani osusuɔ akɛ Yehowa baafee Naanyo kpakpa? Mɛni hewɔ?
Kɛ́ ootao wamɔ ko lɛ, mɛi ni ji onanemɛi waa lɛ baawa bo. Yehowa hu baawa bo
7. Yehowa kɛ enanemɛi wieɔ, ni amɛ hu amɛkɛ lɛ wieɔ
Kɛ́ nanemɛi kɛ amɛhe gbaa sane lɛ, amɛnaanyobɔɔ lɛ mli waa. Nyɛkanea Lala 86:6, 11 lɛ, ni nyɛsusua sanebimɔi nɛɛ ahe:
-
Mɛɛ gbɛ nɔ wɔbaanyɛ wɔkɛ Yehowa awie?
-
Mɛɛ gbɛ nɔ Yehowa kɛ wɔ wieɔ?
Wɔtsɔɔ sɔlemɔ nɔ wɔkɛ Yehowa wieɔ; lɛ hu etsɔɔ Biblia lɛ nɔ ekɛ wɔ wieɔ
MƐI KOMƐI KƐƆ AKƐ: “Mɔ ko nyɛŋ ekɛ Nyɔŋmɔ abɔ naanyo.”
-
Mɛɛ ŋmalɛ obaanyɛ okɛtsɔɔ akɛ wɔbaanyɛ wɔkɛ Yehowa abɔ naanyo?
EMLI OTI
Yehowa miisumɔ ni etsɔ o-Naanyo, ni ebaawa bo ni otsi obɛŋkɛ lɛ.
Mɛni Okase?
-
Mɛɛ gbɛi anɔ Yehowa yeɔ ebuaa enanemɛi?
-
Mɛni hewɔ Yehowa biɔ ni enanemɛi atsake amɛsubaŋ lɛ?
-
Kɛ́ okwɛ lɛ, ani nɔ ni Yehowa biɔ yɛ enanemɛi adɛŋ lɛ wa tsɔ? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
EHE SAJI KROKOMƐI
Kɛ́ okɛ Nyɔŋmɔ bɔ naanyo lɛ, mɛɛ sɛɛ obaaná?
“Yehowa—Nyɔŋmɔ ni Esa akɛ Ale Lɛ” (Buu-Mɔɔ, February 15, 2003)
Obaana bɔ ni obaafee otsɔ Nyɔŋmɔ naanyo.
Obaana nɔ hewɔ ni yoo ko kɛɛ naanyo ni ekɛ Yehowa bɔ lɛ here eyiwala lɛ.
Obaana bɔ ni oblahii kɛ oblayei komɛi naa Yehowa amɛhãa.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
