Toupannan zòt ka koumansé zòt lavi a dé, problèm-yan ka parèt osi. Sa problèm-yan ka parèt pitèt paské zòt pa ka réfléchi menm fason-an, zòt pa ka santi bagaj-ya ni wè lavi-a menm fason-an. Sa pouvé rivé osi paské roun bagaj zòt pa té ka antann ka tonbé anlè zòt konsa ouben pou dòt bagaj ankò.

Pitèt ou ké anvi fè kousidiré zòt pa gen problèm, mé Labib-a pa ka konséyé nou bat dèyè douvan problèm nou ka jwenn (Matthieu 5:23, 24). A sèlman si ou ka swiv prensip ki annan Labib-a ki ou ké jwenn pi bon rémèd pou ou problèm.

SA LABIB-A KA DI : « I gen [...] roun tan pou palé » (Ecclésiaste 3:1, 7). Pran tan palé di problèm-an ké ou mari ouben ou madanm. Èspliké li franchman sa ou gen annan ou tchò ké sa ou ka pansé di sa. A pou ou toujou di li lavérité (Éphésiens 4:25). Menm si kozé-a ka fè kòlè-a monté é menm si ou té ké anvi palé fò, kontrolé ou kò. Roun répons ki dous pouvé anpéché roun blo pété (Proverbes 15:4 ; 26:20).

Menm si ou pa dakò ké ou mari ouben ou madanm, kontinyé rété janti ké li, épi pa bliyé montré li ki ou kontan l’ é ki ou ka rèspèkté l’ (Colossiens 4:6). Fè tousa ki fo pou réglé problèm-an san pédi tan épi pa désidé arété palé ké ou mari ouben ou madanm (Éphésiens 4:26).

SA OU POUVÉ FÈ :

• Chwazi moman-an ki pi bon pou palé di problèm-an.

• Lò a ou pou kouté, pa koupé so paròl menmsi ou anvi fè l’. Ou ké pouvé palé apré.

SA LABIB-A KA DI : « A pou zòt gen bokou afèksyon pou zòt konpanyen. A pou zòt toujou pran douvan pou bay zòt konpanyen lònò » (Romains 12:10). Fason ou ka kouté-a trè enpòrtan. Éséyé konprann fason i ka wè ké konpasyon ké imilité (1 Pierre 3:8 ; Jacques 1:19). Pa fè sanblan kouté. Si sa posib, arété sa ou ka fè-a pou byen kouté sa ou mari ouben ou madanm ka di ou. Si sa pa posib propozé li palé pita. Si ou ka wè ou mari ouben ou madanm kou roun zanmi, pa kou roun lèlmi, ou pa ké faché toubonnman konsa (Ecclésiaste 7:9).

SA OU POUVÉ FÈ :

• Asèpté kouté tousa i ka di, menm si ou pa kontan sa ou ka tandé-a.

• Pa kouté sèlman sa i ka di. Byen gadé sa i ka éséyé di ou. Kisa so wéy ka di ? Asou fason i ka fè ké so kò, kisa i lé di ? Asou fason i ka palé-a, kisa i lé di ?

SA LABIB-A KA DI : « Dipi roun moun ka travay rèd i ka jwenn bénédiksyon, mé moun-an ki ka fè yenki palé ké rété san anyen » (Proverbes 14:23). A pa loutou di mété zòt kò dakò asou fason zòt ké réglé roun problèm. A swiv désizyon zòt pran ansanm-an ki tout. A roun bagaj ki détan ka doumandé bokou travay, mé sa vo lanpenn (Proverbes 10:4). Si zòt toulédé ka fè éfòr ansanm, zòt ké jwenn roun « bon rékonpans pou travay rèd [zòt] fè-a » (Ecclésiaste 4:9).

SA OU POUVÉ FÈ :

• Désidé ansanm di sa zòt chak divèt fè pou réglé problèm-an.

• Apré sa, pran tan gadé ki progrè zòt fè.