LÉSON 24

Zanj-ya : a kimoun é kisa yé ka fè ?

KOUTÈ SA

Jéova lé nou anprann bagaj asou so fanmi ki annan syèl-a. Zanj-ya ka fè parti di so fanmi, Labib-a ka aplé yé « pitit Bondjé-ya » (Job 38:7). Kisa Labib-a ka di asou zanj-ya ? Kisa yé ka fè ? Ès tout zanj-ya ka fè parti di fanmi Bondjé ?

1. Zanj-ya : kimoun yé sa ?

Jéova kréyé zanj-ya anvan i kréyé latè-a. Kou Bondjé, zanj-ya sa lèspri nou pa pouvé wè ki ka viv annan syèl-a (Hébreux 1:14). I gen milyon zanj, é yé chak gen yépa pèrsonalité (Révélation 5:11). Yé ‘ka fè sa Jéova ka di é yé ka kouté sa i ka di’ (Psaume 103:20). Tan-lontan, Jéova té ka itilizé zanj-ya pou poté mésaj, pou idé so pèp é sové so sèrvitèr-ya lò yé té an danjé. Jòdla, zanj-ya ka idé krétyen-yan pou yé jwenn moun ki lé anprann bagaj asou Bondjé.

2. Satan ké démon-yan : kimoun yé sa ?

Sèrten zanj pa rété fidèl douvan Jéova. Prémyé zanj-a ki tounen so do bay Jéova, a « sa-la yé ka aplé Djab ké Satan, ki ka bloublou tout moun asou latè-a » (Révélation 12:9). Satan té lé koumandé tout moun, a pou sa i rivé fè Adan ké Èv épi patché ròt zanj ankò swiv li annan so rébélyon. Zanj-ya ki tounen yé do bay Jéova, yé ka aplé yé « démon-yan ». Jéova chasé yé di syèl-a é aprézan yé asou latè-a. Mé titalò Jéova ké détrwi yé (li Révélation 12:9, 12).

3. Kouman Satan ké démon-yan ka éséyé bloublou nou ?

Satan ké démon-yan ka itilizé tchenbwa pou bloublou bokou moun. Tchenbwa, a tout bagaj moun-yan ka fè pou éséyé palé ké lèspri-ya. Sa pa bon menm. Parèkzanp, bokou moun k’alé wè gadò, divinò, moun ka fè lamaji, yé ka chaché savé sa ki ké rivé dimen, yé ka li oroskòp ouben yé ka voyé pyay asou moun. I gen moun k’alé chaché rémèd koté gadò ouben ka pran ben, mé tout sa bagaj-ya a tchenbwa. Satan ka fè moun krè osi ki yé pouvé palé ké moun mouri-ya. Mé Jéova bay nou sa lòrd-a : « Panga alé wè gadò-ya ouben moun-yan ki ka fè moun konnèt sa ki ké rivé dimen » (Lévitique 19:31). Jéova bay nou sa lòrd-a pou protéjé nou kò di Satan ké démon-yan. Yé sa lèlmi Bondjé é yé lé fè nou soufri.

ANNOU FOUYÉ ANNAN LABIB-A

Annou palé di sa zanj-ya ka fè annan prédikasyon-an. Annou wè osi poukisa sa danjéré fè bagaj ki mélé ké tchenbwa é kouman nou pouvé protéjé nou kò di Satan ké démon-yan.

4. Zanj-ya ka idé sa-ya ki lé anprann konnèt Jéova

Zanj-ya pa ka préché pou moun-yan mé yé ka idé sèrvitèr Bondjé-ya jwenn moun-yan ki lé anprann bagaj asou Jéova. Li Révélation 14:6, 7, épi kozé asou sa késyon-yan :

Poukisa nou bézwen zanj-ya idé nou lò nou ka préché ?
Zanj-ya pouvé gidé ou pou jwenn moun-yan ki bézwen konnèt mésaj Labib-a. Ès sa ka ankourajé ou savé sa ? Poukisa ou ka pansé sa ?

5. Pran kouri lwen di zafè tchenbwa

Satan ké démon-yan sa lèlmi Jéova. Yé sa osi nou lèlmi. Li Luc 9:38-42, épi kozé asou sa késyon-an :

Kisa démon-yan ka fè ké moun-yan ?

Nou pa lé lésé démon-yan dirijé nou lavi. Li Deutéronome 18:10-12, épi kozé asou sa késyon-yan :

Kouman démon-yan ka éséyé palé ké nou ouben dirijé nou ? Koté ou ka rété, ki bagaj ki mélé ké tchenbwa moun-yan gen labitid fè ?
Ès Jéova gen rézon entèrdi tout kalité tchenbwa ? Poukisa ou ka di sa ?

Gadé VIDÉYO-a, épi kozé asou sa késyon-yan :

VIDÉYO : « Pa bay Djab-a pyès chans » (5:02)

Annan vidéyo-a, Laura mété roun gri-gri asou so bébé. Ès ou ka pansé ki sa bagaj-a danjéré ? Poukisa ou ka pansé sa ?
Kisa Laura té divèt fè pou protéjé so kò di démon-yan ?

Vré krétyen-yan pa janmen bay démon-yan pyès chans. Li Actes 19:19 ké 1 Corinthiens 10:21, épi kozé asou sa késyon-an :

Si ou gen roun bagaj ki mélé ké tchenbwa, poukisa sa enpòrtan ou détrwi l’ ?

6. Ganyen konba-a asou Satan ké démon-yan

A Satan ki chèf démon-yan. Mé a Arkanj Michèl, sa lé di Jézi, ki sa chèf zanj-ya ki fidèl. Mé ès Arkanj Michèl-a pwisan ? Li Révélation 12:7-9, épi kozé asou sa késyon-yan :