Tṍó eo bugì togó boo Jìhóvà Bàrì, éé ní ea dọ́ ní nyíe ẽ́? É kọ à ólò tõó ní ló belí kọọ̀ Jìhóvà dú nen ea palàge bọọ, vaá à di kpã́á àà ní ló belí bé e gbò gyã́à káála di kpã́á ààí ló naaá? Sẹ̀ à ólò tõó ni ló belí kọọ̀ Jìhóvà dú nú e dùm á gé m ea palàge ié kpóó, belí náà káála ẹ́? Mó íb nen ní e Jìhóvà dú é? Kpá Káí kọ́ nú ea kil ló gbò kpãá e Jìhóvà íe, vaá à tẹ́lẹ nàgé bàlà kẽ kọọ̀ à ólò ẹ̀b nú ea kil ní ló.

1. Éé ní ea náa vaá née láà mòn Bàrì e?

“Bàrì dú Nyómá.” (Jọ́ọ̀n 4:24) Jìhóvà náa íe nom̀ kpá ló e dẽè nen é láá mòà. À dú Nyómá ea di káála, ea dú kiẽ́e e dẽè nen náa é láá mòà.

2. Mókà gbò kpãa ní e Jìhóvà íe é?

Náa kal ló béè kọọ̀ née gé láá mòn Jìhóvà, à dú nen ea íe gbò lé kpãa ea náa kọ é vùlèe vaá tõo bã̀é ló. Kpá Káí kọ́ọ̀: “Jìhóvà vulè lé bèèla, vaá náa é sãanà bá ló pá a gbò e bà bọ́ló dẹ̀lẹ̀ nyíé boo.” (Psalm 37:28) Nagé, à “palàge ié tóè sàn nè sàn nyíe,” kilma ló gbò e bà gé mon tã̀àgã̀. (Jém̀z 5:11) “Jìhóvà di kuló gbò e nyíé va biilà; à ólò dùùlà gbò e lóó va ọọ.” (Psalm 34:18) É kọọ̀ ò nyímà kọọ̀ bé e lábvì láb naa é láá naa kọọ̀ nyíè Jìhóvà á ẹẹ àbèè ge bììlà? Nen ea sa gè naa nú ea dú pọ́lọ́ ólò naa kọọ̀ nyíée á bììlà. (Psalm 78:40, 41) Sõò nen ea náa nú ea dú lé ólò naa kọọ̀ nyíée á ẹẹ.—Bugi Próvẹẹ̀b 27:11.

3. Mósĩ́ deè ní e Jìhóvà zógè kọ à vulèèi é?

Pọ̀bkà kpãá e Jìhóvà íe dú vulà. Kàsĩ́, Kpá Káí kọ́ọ̀, “Bàrì dú vulà.” (1 Jọ́ọ̀n 4:8) Níì áá mm̀ Kpá Káí ní e Jìhóvà náa kọ é nyimá kọ à vulèèi é nì, sõò à náa nagé vó tení dú ló gbò nú ea dem. (Bugi Tóm 14:17.) Dì belí nu dòòmà bá, bugi togó boo bé ea beè dèmii naa. A beè dèmíí mm̀ sĩ́deè ea náa kọ é láá mòn gbò kọ́lọ̀ ea kpé dẽe, dã́ kpéè moǹ sọ́l, nè ge láá dé kpéè ló lé gã́ gyã́á. À gbĩ́ kọ é dé kpéè ló dùm.

 KPÁÁ NÓ BỌ̀Ọ̀VẸ̀

5. Jìhóvà íe gbò kpãá ea palàge dú lé

Mózìs beè gyóòlo Bàrì ea beè bọ́ló dẹ̀lẹ̀ nyíé boo, sõò a beè gbĩ́ gè kpáá nyimá ló Nen ea beè dèmie. Vó beè naa kọọ̀ Mózìs á kọ́ nè Jìhóvà kọọ̀: “Naa kọ ḿ nyimá gbò o èèlè, kọbé m̀ nyímá ni ló.” (Ẹ́xọdọ̀s 33:13) Jìhóvà beè gbóó naa kọ Mózìs á nyimá íb nen e ẹlẹ dúè. Bugi Ẹ́xọdọ̀s 34:4-6, vaá ò gbóó aalai gbò bíbví:

• Mókà gbò gá ea di ló kpãà Jìhóvà ní ea beè tẹlẹ bàlà kẽ nè Mózìs e?

• Mókà zẹ̀ẹ̀ gbò kpãà Jìhóvá ní ea palàge leemá ni ẽ́?

 NÚ E NI NÓ

Jìhóvà dú Nyómá e dẽè nen náa é láá mòà vaá à ié gã́bug lé kpãa, bọọ èlmà tõ̀ò vulà.

Ge Òòa Boo

• Éé ní ea náa vaá née láà mòn Jìhóvà ẹ?

• Éé ní ea dú nyómá káí é?

• Mókà gbò kpãa ní e Jìhóvà íe é?