16 NU GÈ NÒ
Éé Ní E Jíízọ̀s Beè Naa Tṍó Ea Beè Di Boo Kunukẽ̀í Ẽ́?
Gã́bug nen túúmá kọọ̀ Jíízọ̀s níà nvín e náa íe neǹ nvèè bá, neǹ kọ́ọ̀ bùlà Bàrì ea nyímá nu, àbèè nen ea é gé ù. Sõò é kọọ̀ èé láá nyimá gã́bug nú ea kilíé ló be è nó nú ea kil ló bé ea beè tõó dùm boo kunukẽ̀í naa? Mm̀ nakà nu gè nòí, èé ló bel boo sìgà tóm ea palàge dú bíi e Jíízọ̀s beè sì, nè bé e gbò nuí é láá nvèè bá nè ni naa.
1. Mókà tóm ní ea beè palàge bọọ́ ló Jíízọ̀s e?
Tóm gè vee “Lé Kpẹ̀a ea kil ló [Boǹ Méné] Bàrì” ní ea beè palàge bọọ́ ló Jíízọ̀s e. (Bugi Lúùk 4:43.) A beè vee lé kpẹ̀a kọọ̀ Bàrì é dómà ene kà boǹ méné àbèè bẹbẹ̀l ea é lọl dénè tã̀àgã̀ ea di ló gbò nen. a Mm̀ taà gbáá nè ọ̀ọ̀lẹ̀ ẽ́, Jíízọ̀s beè kilsĩ́ gè vee lé kpẹ̀a ea síè kpóó ló gbò nen vaá lóóe náa beè ọọ.—Máátìù 9:35.
2. Éé ní ea beè naa kọọ̀ Jíízọ̀s á sí tóm dũ̀ùnè ẽ?
Kpá Káí baatẽ́ gbele gbele “gbò tóm dũ̀ùnè” e Bàrì beè tú Jíízọ̀s siimá. (Tóm 2:22) Bàrì beè nè kpóó Jíízọ̀s kọ á láá lẹ̀ẹ̀là bel ló sĩ́dee, nè gyã́á gã́bug nen, bó gbò zọ̀ ló, vaá kẽee gbò e ba beè ù lọl kemà ú. (Máátìù 8:23-27; 14:15-21; Máàk 6:56; Lúùk 7:11-17) Gbò tóm dũ̀ùnè e Jíízọ̀s beè sì zógè kọọ̀ Bàrì ní ea beè lẹ̀ẹ̀làẹ ẹ́. À zógè nàgé kọọ̀ Jìhóvà íe kpóó gè lọ̀l dénè bẹẹ tã̀àgã̀.
3. Éé ní eé láá nó lọl ló bé e Jíízọ̀s beè tõó dùm naa ẽ́?
Jíízọ̀s beè gbàntṍ ló Jìhóvà kèbá kọ̀láá kà dìtõ̀ò. (Bugi Jọ́ọ̀n 8:29.) Náa kal ló béè kọọ̀ gbò nen beè naa uué boo, Jíízọ̀s beè gbàntṍ ló dénè nú ea Tẹ̀ beè kọ á naa dọ̀ọ̀mà tṍó ea ú. A beè zogè kọọ̀ gbò nen é láá fã̀ Bárì kèbá tàvàlà dìtõ̀ò. Vóà naa, Jíízọ̀s beè “gbẹẹ nu dòòmà bá kẽ sẹ̀ẹ̀i, kọ [beele é tõo belí] bé e ẹlẹ beè tõonìè naa.”—1 Pítà 2:21.
KPÁÁ NÓ BỌ̀Ọ̀VẸ̀
Bugi togó boo bé e Jíízọ̀s beè vee lé kpẹ̀aí nè gbò nen naa, nè gbò tóm dũ̀ùnè ea beè sì.
4. Jíízọ̀s beè vee lé kpẹ̀a
Jíízọ̀s beè kyã̀à begè dẽè kyẽè tenígí boo pọ́lọ́ èèlè vaá vee lé kpẹ̀a nè gbò ea mon. Bugi Lúùk 8:1, vaá ò gbóó aalai gbò bíbví:
-
É kọọ̀ Jíízọ̀s beè kọ́ kpẹ̀a nè áá gbò e bà dúé ló?
-
Éé ní e Jíízọ̀s beè naa kọbé à mon gbò nen ẽ́?
Bàrì beè gbẹẹ́ sĩ́ kọọ̀ Mèsáíà é vee lé kpẹ̀a. Bugi Àìzáíà 61:1, 2, vaá ò gbóó aalai gbò bíbví:
-
Mósĩ́ deè ní e Jíízọ̀s beè mm-mè nakà kọ́ọ̀ bùlà Bàrìí é?
-
É kọ ò bulà kọọ̀ gbò nen deè nieí íe bíi ló gè dã́ lé kpẹ̀aí?
5. Jíízọ̀s beè noòmà kà kà bel e gbò nen é láá nó nu lọl ló
Gbá ló gè vee lé kpẹ̀a ea kil ló Boǹ Méné Bàrì, Jíízọ̀s beè noòmà gã́bug nú e gbò nen é láá nó nu lọl ló. Bugi togó boo sìgà nu dòòmà bá mm̀ a Moǹ Bel Bàrì Gbẹá Boo Gùa. Bugi Máátìù 6:14, 34 nè 7:12, vaá ò gbóó aalai gbò bíbví:
-
Mókà dùùlà bá deè tṍ eé láá siimá tóm ní e Jíízọ̀s beè nè mm̀ gbò dọ̀ Kpá Káíí é?
-
É kọ ò bulà kọọ̀ gbò dùùlà bá deè tṍí é láá nvèè bá nè gbò nen deè nieí?
6. Jíízọ̀s beè sí gã́bug tóm dũ̀ùnè
Jìhóvà beè nè kpóó Jíízọ̀s kọ á siimá gã́bug tóm dũ̀ùnè. Kọbé ò mon ene kà nu dòòmà bá, bugi Máàk 5:25-34 àbèè ò bilà VÍDIÒÍ, vaá ò gbóó aalai gbò bíb ea nyoone.
-
Mm̀ vídiòá, éé ní e ńnváá e kpá lóe géè zọ̀a beè àgala boo é?
-
Éé ní ea léémá ni ló nakà tóm dũ̀ùnèí ẽ́?
Bugi Jọ́ọ̀n 5:36, vaá ò gbóó aalai nakà bíbví:
-
Éé ní e gbò tóm dũ̀ùnè e Jíízọ̀s beè sì “élá neǹ ditõ̀ò” kilma ló àbèè ge tẹlẹ bàlà kẽ kìlmàé ló é?
O beè nyimá gé?
Gã́bug nú e nyímà ea kil ló Jíízọ̀s di mm̀ kpá Máátìù, Máàk, Lúùk, nè Jọ́ọ̀n ea dú gbò kpá ea kọ́ nú ea kil ló a dùm nè sìtóm kọ̀ kpẹ̀a. Buù nen ea beè emí gbò kpáí beè kọ́ kele-kele nú ea kil ló Jíízọ̀s. Tṍó e bugi ténì kà kpáí, èé gbóó láá mòn bé e dùm Jíízọ̀s beè palàge dú lé naa.
-
MÁÁTÌÙ
ní ea dú túá nen ea beè emí nú ea kil ló Jíízọ̀s e. À kọ́ gã́bug nú ea kil ló a nòòmànù, bọọ èlmà tõ̀ò nú ea beè noòmà ea kil ló Boǹ Méné Bàrì.
-
MÁÀK
ní ea beè emí kà ńkem̀ nú ea kilíé ló é. À kọ́ gã́bug nu ea kil ló gbò nú ea beè naaá.
-
LÚÙK
beè bọọgẹ̀ ló bel boo bé e tã̀àgã ló Bàrì beè palàge bọọ́ ló Jíízọ̀s naa, nè bé ea beè tú lé bá sẹ̀ẹ̀mà gbò bia naa.
-
JỌ́Ọ̀N
ló bel boo gã́bug nú ea kil ló íb nen e Jíízọ̀s dú tení dú ló gè kọ́ nú ea beè zọ̀ pá a gbò nyòòne nvée nè dõòna gbò loá bel boo.
SÌGÀ GBÒ KỌ́Ọ̀: “Jíízọ̀s beè dú pọ́ì lé nen, sõò ẹ̀ẹ̀ níì Mèsáíà nì.”
-
Ńlóò bùlà kọ́ vàẹ?
NÚ E NI NÓ
Jíízọ̀s beè kọ́ kpẹ̀a ea kil ló Boǹ Méné Bàrì, sí gã́bug tóm dũ̀ùnè, vaá gbàntṍ ló Jìhóvà kèbá kọ̀láá kà dìtõ̀ò.
Ge Òòa Boo
-
Mókà tóm ní ea beè palàge bọọ́ ló Jíízọ̀s tṍó ea beè di boo kunukẽ̀í ẽ́?
-
Éé ní e gbò tóm dũ̀ùnè e Jíízọ̀s beè sì zógè e?
-
Éé ní eé láá nó lọl ló gbò nú e Jíízọ̀s beè noòmà ẽ?
KPÁÁ GBĨ́ TẼ́ LÓ
Mókà togó bel ní e Jíízọ̀s beè bọọgẹ̀ ló bel boo é?
“God’s Kingdom —What It Means to Jesus” (Kpá Tọ Kùdẽe Ló, October 1, 2014)
Nyimá nú ea náa vaá èé láá zìgà kọọ̀ gbò tóm dũ̀ùnè e Jíízọ̀s beè sì beè naaá.
“The Miracles of Jesus —What Can You Learn?” (Kpá Tọ Kùdẽe Ló, July 15, 2004)
Bugi nú ea náa vaá ene kà gbálà beè nyaaná a dùm, tṍó ea nyímá bé e Jíízọ̀s beè ẹ̀b nú ea kil ló gbò nen naa.
“My Life Was All About Me” (Kpá Tọ Kùdẽe Ló, October 1, 2014)
Bugi nú ea kil ló gbò tóm e Jíízọ̀s beè sì, ea nooà dẹ̀ẹ̀a boo bé ea beè sí naa.
“Main Events of Jesus’ Earthly Life” (New World Translation of the Holy Scriptures, Appendix A7)
a 31-33 Nu Gè Nò é beè palàge ló bel boo Boǹ Méné Bàrì.
