TÜ WAYUUKALÜIRUA

¿Kasa sümaka tü Bibliakat? Chi Maleiwakai «nnojotsü nukumajaʼalüin neʼe [tü mmakat], nukumajüin [shia] süpüla kepiainjatüin wayuu suluʼu» (ISAÍAS 45:18).

TÜ MMAKAT

¿Kasa sümaka tü Bibliakat? «Eeshii na wayuu outakana jee eeshii waneeinnua neeʼiraka, akatsaʼa tü mmakat, ayateeria eein shia waneepia» (ECLESIASTÉS 1:4).

¿JAMALUʼULU TIA? Saashin tü Bibliakat, eeinjatü tü Mmakat süpüla kaʼikat süpüshuaʼa jee kepiainjatü wayuu suluʼu waneepia. ¿Kasache ajaʼttinnajatka saashin tü Bibliakat?

JÜLÜJATAA PAAʼIN TÜÜ: Süküjain tü Bibliakat ajaʼttinnüinjatüin tü kasakat süpüshuaʼa maʼaka sajaʼttinnüin nükalioʼu Noé. Jooutsü maʼin tü mojulawaakat sainküin mmakat soʼu tia (Génesis 6:13). Oonooshi waneepia Noé nümaa Maleiwa müshijeseʼe nuʼtteʼerüin nia Maleiwa namaa na nüpüshikana. Najaʼttirapejeʼe na mojulaashiikana sükajee wanee juya miyoʼushaata. Anuu sünüiki tü Bibliakat süchiki tü alatakat: «Nüʼitirüin [Maleiwa] paala wane juya miyoʼushaata maʼi saaʼu tü wayuu kaainjaratkalüirua süpüla ouktajanain naya sütüma je süpüla sajaʼttüinjatüin kasa süpüshua soʼu kaʼikat tia» (2 Pedro 3:6). ¿Kasa ajaʼttinnaka soʼu tia? Naya na wayuu mojulaashiikana, nnojotsü shiain tü Mmakat. Müsia neʼe tü alatajatkat saashin tü Bibliakat, nayainjana ajaʼttinnajanaka na wayuu mojulaashiikana jee tü kasa nakumajakat.

TÜ KASACHIKIKAT JEE TÜ MOJULAWAAKAT

¿Kasa sümaka tü Bibliakat? «Soʼu palitchon kaʼi nnojoleechi eein chi mojulaashikai, piirakaale sümüin eepünaale nia nnojoleechi yala. Akanasaʼa na wayuu anamiakana namüinjeerü tü mmakat otta shiimain talateenain naya süka aneerüin nakuwaʼipa» (SALMO 37:10, 11).

¿JAMALUʼULU TIA? Süchikijee tü Juya Miyoʼushaata eejatkat nükalioʼu Noé, jooutsü süchikuaʼa tü mojulawaakat jee müliasü saaʼin wayuu süchikuaʼa. Soʼu palit kaʼi najaʼttireerü chi Maleiwakai tü mojulawaakat yaa saaʼujee tü Mmakat jee nnojoleerü eein shia piantua, maʼaka nümüin chi salmistakai «nnojoleechi eein chi mojulaashikai». Naainjeerü tia Maleiwa nuluwataapeena saaʼu mmaka, aluwataajeechi nia iipünaajee. Aluwataajeechi nia naaʼu na wayuu oonookana nümaa.

JÜLÜJATAA PAAʼIN TÜÜ: ¿Kaseetche alataka sümüin süpüshuaʼa sukuwaʼipa suluwataaya wayuu? ¿Jüüjüüjeenache naya sümüin Sukuwaʼipa Aluwatawaa nutuma Maleiwa? Nnojoleerü naaʼinrüin tia saashin tü Bibliakat, eʼrüliijeena naya wayumüin nümüin Maleiwa (Salmo 2:2). ¿Kaseetka naaʼinrüin chi Maleiwakai? Najaʼttireerü «süpüshuaʼa sukuwaʼipa suluwataaya wayuu, shieetkalaka eein waneepia tü nuluwataayakat» (Daniel 2:44). ¿Jamüshii nnojoliika anain süpüla aluwatawaa na wayuukana?

¿Kasa sümaka tü Bibliakat? «Nnojoireejaʼa niainjachin [chi wayuukai] oʼunirüin nukuwaʼipa nümüiwaʼa» (JEREMÍAS 10:23).

¿JAMALUʼULU TIA? Nnojoishii nukumalain Jeʼwaa na wayuukana süpüla naluwanaajiraain saaʼu nakuwaʼipa namüiwaʼa. Nnojotsü nountuin najaʼlajeʼerüin tü kasa mojusü alatakat.

JÜLÜJATAA PAAʼIN TÜÜ: Saashin tü karaloʼutakat Britannica Academic, na aluwataashiikana sainküin tü mmakat «isasü nachiki najaʼttirajatüin tü maʼletseekalü, tü jamükat, tü ayuuliikat, isasü nachiki nnojoluinjatüin sukutkujaain mma, süsetüin wüin, eein wawai, tü atkawaakat otta tü mojulawaakat». Anuu sooʼomüin tü aküjünakat suluʼu tia karaloʼutakat: «Eeshii [...] na jülüjakana aaʼin sajaʼttinneerüin tia müleka nakotchojiraale napüshuaʼa na sülaülashiikana mma otta waneesiale neʼe sukuwaʼipa aluwatawaa saaʼu tü mmakat». Jaʼitashii nakotchojiraain napüshuaʼaleʼeya na sülaülashiikana mma, iseeria neʼe nachiki najaʼttirüin tü kasa mojusükat, jama nnojoluin lotuin nakuwaʼipa. Niaʼala neʼe Maleiwa ounteeichikai ajaʼttirüin tü kasa müliakalü atuma wayuu sainküin mmakat, naaʼinreerü tia niapa aluwataain yaa saaʼu.

Saashin tü Bibliakat, nnojoluinjatü mmoluwaain naaʼin na wayuu anamiakana seema tü alatajatkat sajaʼttinnapa tü kasakalüirua, tia shia tü kasa mojusü alatakat sainküin mmakat. Talatüinjatü naaʼin, jama nunouteʼerüinjatüin Maleiwa tü mmapaʼakat süpüla anainjatüin shia.

¿Kasoʼuleetche alatüin tia? Aküjüneerü tü sümakat tü Bibliakat süchiki tia sünain tü wane pütchikat.