«Ajaʼttajatü kasakat süpüshuaʼa», pümünüle, ¿kasa jülüjajaaka paaʼin sutuma? Eesüjaʼa shiale jülüjajaain paaʼin sujutuuinjatüin iipünaajee wanee meteorito saaʼu tü Mmakat, sajaʼttüin wüin saaʼujee Mmakat süpüshuaʼa jee shiale wanee kasa wayuu eekai amojujeʼerüin tü Mmakat. Eesü shiale jülüjüin paaʼin eeinjatüin wanee atkawaa sainküin Mmakat ajaʼlajeʼerüinjatka shia. Eeshii wayuu mmotkana sutuma tia jülüjakat naaʼin, eeshii na nnojoliikana jamajanain amüin tia jee eeshii na asirajakana neʼe sutuma tia.

«Anteerü sükalia sajaʼlajaainjatkat oʼu tü kasakat süpüshua», müsü tü Wiwüliakat (Mateo 24:14). «Armagedón» jee «tü kaʼi kasalajaneetkat oʼu saainjala wayuu sümüin», müsü tiaʼayaa (Alateetkat Mapeena [Apocalipsis] 16:14, 16). Wainma neʼe na shikiipüʼükana iküleesia ekirajaka alawaa süchiki tia, neimmolojuin tü wayuukalüirua, «ojuttajatü tü mmakat», majüshii naya. Süküjüin tü Wiwüliakat jamaluʼuluin sajaʼttajatüin kasakat süpüshuaʼa, süküjüin wamüin pejein maʼin tü kaʼi süntajatkalü oʼu tia jee müsia süküjüin wamüin tü waaʼinrajatkat süpüla nnojoliinjanain waya amüloulin suʼunnaa tia. Paashajeʼera tü Wiwüliakat süpüla pütüjüin sooʼomüin süchiki tü wekirajaakat anain jooluʼu. Mapa, wekirajaajeerü anain kasain maʼin tü ajaʼttinnajatkat.

1. NNOJOTSÜ AʼAJÜNÜINJATÜIN TÜ MMAKAT SÜKA SIKI.

   Nukumajüin Maleiwa tü mmakat süpüla eeinjatüin shia süpüla kaʼikat süpüshuaʼa, saashin tü Wiwüliakat (Salmo 104:5). Eesü waneeirua pütchi eere süküjünüin nnojoluinjatüin najaʼttirüin Maleiwa tü Mmakat, nnojoleerü shia nuuʼulaain sajaʼttirüin wayuu (Eclesiastés 1:4; Isaías 45:18).

2. ANEEKÜNÜITPA TÜ KAʼI SÜNTÜINJATKAT OʼU.

   Nüneekatüjülinka Maleiwa wanee kaʼi najaʼttirüinjatka oʼu kasa mojusü. «Matüjaaju aaʼu joujeerüin tia kaʼikat süka nnojoyülin nüneeküin Maleiwa shia», eeshii na makana. Anuu sünüiki tü Wiwüliakat: «Nnojotsü sütüjaain aaʼu wayuu joujaleerüin sülatüin tü taküjaitpakat achiki jümüin. Jaʼitakaje na aapiee chakana iipünaa, nnojotsü natüjaain aaʼu. Nia neʼe chi Tashikai Maleiwa atüjaaka saaʼu nümüiwaʼa. Je sükajee tia, anakaja müleka eere jaaʼin tapüla tayakai, chi Jüsenyotsekai, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma» (Marcos 13:32, 33). Nia Maleiwa nümüiwaʼa atüjaaka saaʼu joujeerüin süntaka tia kaʼikat.

3. NNOJOLEERÜ SAJAʼTTIRÜIN WAYUU TÜ MMAKAT, NNOJOLEERÜ SAJAʼTTIRÜIN WANEE METEORITO.

   ¿Jaraleechi ajaʼttiraka kasakat süpüshuaʼa? Müsü sünüiki tü Wiwüliakat: «Teirakaakalaka. Teʼrakalaka saaʼin jutatüin chaa iipünaa eere chi Maleiwakai. Eweeta müshia wane ama kasuutai maʼi. Je nünülia chi naajuchikai, ‹Lotokai Akuaippa› münüsü [...]. Teʼrakalaka chi wanülüükai kasipalakai nikiinain namaa na aluwataashiikana sainküinjee mmakat süpüshua je na nasurulaatsekana. Outkajaashii naya süpüla natkaainjanain nümaa chi naajuchikai chi ama kasuutaikai maʼi ooʼulaka na nusurulaatsekana» (Alateetkat Mapeena [Apocalipsis] 19:11-21). Tia pütchi paashajeʼerüitpakat, shiyaakuayaasü neʼe tü alatüinjateetkat. Nuluwataajeena Maleiwa wanee aapiee nümaʼanajeejana süpüla noʼutüinjanain naaʼin na nüʼünüükana.

1. AJAʼTTINNAJATÜ TÜ SUKUWAʼIPAKAT WAYUU SÜNAIN ALUWATAWAA.

   Müsü Wiwüliakat: «Soʼutpünaa naluwataaya na wayuukana niʼitaajeerü chi Maleiwa sirumatuʼujeʼewaikai wanee aluwataaya matüjüinka ajaʼttaa. Nnojoleerü alatinnüin tia aluwataayakat suluʼumüin wanee mma. Sajaʼttireerü süpüshuaʼa tü aluwataayakalüirua  otta shiainjatü eeka waneepia» (Daniel 2:44, TNM). Wekirajaaitpa anain noutkajaainjanain «na aluwataashiikana sainküinjee mmakat süpüshua je na nasurulaatsekana [...] süpüla natkaainjanain nümaa chi naajuchikai chi ama kasuutaikai maʼi ooʼulaka na nusurulaatsekana» (Alateetkat Mapeena 19:19). Tü Nuluwataayakat Maleiwa, sajaʼttireerü süpüshuaʼa tü wanee aluwataayakalüirua.

2. AJAʼTTEERÜ TÜ ATKAWAAKAT JEE NNOJOLEERÜ MÜLIAIN WAYUU ATUMAWAA.

   Najaʼlajeʼereerü Maleiwa tü atkawaakat sainküinjee mmakat süpüshuaʼa (Salmo 46:9). Anuu wanee pütchi makat mayaa: «Na wayuu aaʼinrakana tü kasa anasükat, nayeena yaaka kepiain saaʼu tü mmakat jee müshiʼiya na jüüjüükana nümüin Maleiwa. Aluʼujasaʼa na wayuu aaʼinrakana tü kasa mojusükat, ayamünneena naya atumawaa» (Proverbios 2:21, 22, Martín Nieto [MN], 1992). «[Jeketüinjatü] tatüma kasa süpüshua», müshi Maleiwa saashin tü Wiwüliakat (Alateetkat Mapeena 21:4, 5).

3. AJAʼLAJEʼENNEENA NA EKIRAJAKANA WAYUU SÜNAIN ALAWAA NÜCHIKI MALEIWA.

   Anuu sünüiki tü Wiwüliakat nachiki na shikiipüʼükana tü iküleesia nnojotkat shiimain: «Na nünüikimaajanayaakana Maleiwa, ekirajüshii neʼe alawaa jee mojusü nakuwaʼipa na sacerdootekana. [...] ¿Jameena joo naya atumawaa soʼu tü kaʼi sajaʼlajaainjatkat oʼu kasa süpüshuaʼa?» (Jeremías 5:31, Martín Nieto [MN], 1992). ¿Kaseerü aainjünaka naka naya wayuukana? Anuu nünüiki Jesuu nachiki: «‹Senyotkalee, ¿nnojotsü shiimüin sünain laülaain waya pütüma sünain waküjapüʼüin pünüiki, sünain wayuʼlapüʼüin yolujaa süleʼeruʼujee wayuu, je sünain waaʼinrapüʼüin tü kasa anasü nütüjakat apüleerua Maleiwa nümüiwa?›. Otta tayakai, meechi taya namüin: ‹Jia kaainjaraliikana, ¿joujanakai jia teʼraajüin? Juʼuna yaajee toulia›» (Mateo 7:21-23).

4. AJAʼTTINNAJANA NA MOJULAASHIIKANA.

   Müsü nünüiki Jesuu: «¿Kasa kasalajanainjatka anainjee saainjala wayuu sümüin? Shia sünainjee nayouktüin Cristo, chi anakakai süpüna wayuu, ajütünakai saʼakamüin wayuu süpüla niiʼiyatüinjatüin namüin tü shimüin nüchikikat Maleiwa. Shia sünainjee masütaajüin sünain aaʼinraa tü mojusükat maa aka saaʼin tü wayuu makateetkat sümaa piyuushi» (Juan 3:19). Wüinsitsüinkat wayuu mojulaasü nutuma Maleiwa, ajaʼttüsü süpüshuaʼaleʼeya nutuma, eejachi Noé suʼunnaa tia makat. Saashin tü Wiwüliakat, niʼitirüin Maleiwa paala «wane juya miyoʼushaata maʼi saaʼu tü wayuu kaainjaratkalüirua süpüla ouktajanain naya sütüma je süpüla sajaʼttüinjatüin kasa süpüshua soʼu kaʼikat tia». Maaʼulu yaa, aʼatapajüshi chi Maleiwakai «süpüla najaʼttirüinjatüin süka siki» tü wayuu mojulaasükalüirua (2 Pedro 3:5-7).

Najaʼttireerü Maleiwa soʼu palit kaʼi tü wayuu mojulaasükalüirua maʼaka saaʼin soʼu wüinsirüinkain wayuu mojulaasüirua nutuma sümaiwa paala. Suʼunnaa tia, nnojotsü shiain najaʼttirüin Maleiwa «tü mmakat», naya najaʼttiraka na wayuu nüʼünüükana. Akaweeria neʼe soʼu tü kaʼi süsalainjatkat oʼu wayuu saainjala nutuma, nayeena najaʼttiraka Maleiwa na wayuu ayatakana macheʼein süchiirua aaʼinraa kasa mojusü jee müshia chi eekai paʼünüüwaain nümaa Maleiwa. Aluʼujasaʼa na wayuu aleewakana nümaa Maleiwa, nayeena kaalinka nüpüla soʼuweena kaʼikat tia, ichaʼasaʼa Noé, kaalinshi nia nüpüla namaa na nüpüshikana (Mateo 24:37-42).

¡Talatashaateerü maʼin waaʼin, najaʼttirapa Maleiwa süpüshuaʼa tü kasa mojusü eekat maaʼulu yaa! Aneerü maʼin naaʼin na wayuu anamiakana süchikijee kaʼikat tia. «¿Joujeetche maʼin eera tia kaʼikat?», eesüjaʼa maa müle paaʼin püleʼeruʼu. «¿Kasache taaʼinrüinjatka suulia sümaayain neʼe taya wayuu mojulaasüirua?», eeshijaʼa pümüleya. Anashii wekirajaale sünain tü sukuwaʼipainjatkat putuma saashin tü Wiwüliakat.