Saashin tü Wiwüliakat, keemeerü maʼin tü kaʼi sajaʼttajatkat oʼu süpüshuaʼa tü kasa mojusükat. Müsü sünüiki: «Soʼuweena kaʼikat tia, alanaʼaleejeeria maʼi tü müliaa shiʼreetkat wayuu suulia tü shiʼrakat wayuu paala sümaiwa süchikijee sükumajünüin tü mmakat je suulia tü shiʼrakat wayuu maaʼulu yaa. Müleka nnojoruleje saawalaain tü müliaakat, ajaʼlajaweerü wayuu süpüshua sütüma. Akatsa naawaleʼereerüin shia Maleiwa naaʼujee na aneekuushikana nütüma» (Mateo 24:21, 22). Eejeenapajaʼa wayuu kateenaka oʼu soʼu tia, müsü pütchika yaa: «Je tü nakuaippakat na manoujainsaliikana sümaa tü kasa mojusü keeʼireekat naaʼin, yüüʼülaa meerü soʼuweena wane kaʼi. Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17).

¿Kasa paaʼinrajatka müleka kateere poʼu süchikijee tia alatajatkat? Nnojotsü shiainjatüin kachiiruain paaʼin pünaajüinjatüin wainma kasa. Anuu paainjüinjatka saashin tü Wiwüliakat: «Ajaʼttinneerü süpüshuaʼa tia, müsüjeseʼe wuleinjatüin tü jukuwaʼipakat otta juʼwaajüinjachi chi Maleiwakai, jaʼatapajüinjatü nükaliaka Jeʼwaa sünain nüntajachin» (2 Pedro 3:10-12, TNM). Na ajaʼttinnajanakana naya napüshuaʼa na aluwataakana saaʼu tü mmakat jee na namaajanakana ooʼulaka na ayouktajakana nuluwataaya Maleiwa. Müsüjeseʼe nnojoluin aneerüin pukuwaʼipa sutuma wainmain korolo pümaʼana.

Süpüla katüinjatüin poʼu süpüla kaʼikat süpüshuaʼa, acheküshi paaʼinrüinjachin tü keeʼireekat naaʼin Maleiwa jee waneepiainjachin pia nümaa (Sofonías 2:3). Nnojoishii waya oushikajaainjanain süchiirua nakuwaʼipa na wayuu nnojoliikana oonoweein nümaa Maleiwa. Tü waleʼeruʼuinjatkat waneepia shia pejein maʼin tü kaʼi sajaʼlajaainjatkat oʼu süpüshuaʼa tü kasa mojusükat, pejeshaatasü nükalia Jeʼwaa. Nekirajeechi pia na aküjüliikana pütchi nüchiki Jeʼwaa süpüla paaʼinrüin tü kateetkat atuma poʼu. Nekirajeechi pia süka tü Wiwüliakat.