¿Wanaawasüche pünüiki namaa naya wayuukana? Wainma na wayuu kapüleekana amüin aashajeʼeraa shia. ¿Jama pütüjaale saaʼu sükaaliinjeechin pia tü sümakat tü Wiwüliakat süpüla talatüin paaʼin jee anain pukuwaʼipa? ¿Jama puusütüle sünain wanee kasa kamalainka pümüin paashajeʼerapa shia? ¿Eesüche süpüla paashajeʼerüin shia pütüjaaiwa saaʼu tü sümakat?

Wekirajaa süchiki tü namakat wanee wayuuinnua talatakana aaʼin sutuma naashajeʼerüin tü Wiwüliakat.

Anuu nünüiki Ezequiel, alatüsü suulia 20 nuuyase: «Tü takuwaʼipakat sümaiwa müsü aka saaʼin nukuwaʼipa chi wayuu oʼunirakai kemion sümaa nnojoluin nütüjaain saaʼu jalamüinjachin nia. Shiasaʼa taashajeʼerapa tü Wiwüliakat, anouktaasü takuwaʼipa sutuma. Süküjüin tü Wiwüliakat tü waaʼinrajatkat süpüla anain wakuwaʼipa».

Anuu sünüiki Frieda, alatüsü suulia 20 suuyase: «Kaashichijaaratpuʼusü taya, shiasaʼa sutuma taashajeʼerüin tü Wiwüliakat, tachecherüin taaʼin suulia jashiee. Kamaneeitpa taya sümüin wayuu jee wainmainnapa taʼaleewain».

Anuu sünüiki Eunice süchiki tü Wiwüliakat, alatüsü suulia 50 suuyase: «Anouktaasü takuwaʼipa sutuma otta tayouktüitpa taaʼinrüin tü kasa mojusükat».

Sükaaliinjeechi pia tü Wiwüliakat süpüla anain pukuwaʼipa maʼaka sükaaliinjain na waashajaakana achiki jee na aashajeʼerakana shia maaʼulu (Isaías 48:17, 18). Sükaaliinjeechi pia tü Wiwüliakat süpüla anain tü paaʼinrajatkat, kaʼaleewain pia, jutatüin paaʼin suulia shapawaa aaʼin jee süpüla pütüjaain saaʼu tü shiimainkat nüchiki Maleiwa. Tü pütchi sümakat tü Wiwüliakat nümaʼanajeejatü shia Maleiwa, anasüjeseʼe nukuwaʼipa wanee wayuu naaʼinrüle shia. Nnojotsü süküjüin Maleiwa wamüin wanee pütchi amojujeʼereetka wakuwaʼipa.

Nnojotsü kapüleein aashajeʼeraa tü Wiwüliakat, puuʼulakapa. Wekirajaa sünain tü paaʼinrajatkat süpüla puʼttüin sünain aashajeʼeraa jee süpüla kamalain shia pümüin.