1. Moõpa ojeʼe ñandéve umi mbaʼe oikótava tenonderã?

REHECHA jave televisiónpe umi mbaʼe oikóva, reñeporandúmapa mbaʼépepa opáta ko múndo? Koʼág̃a rupi oiko jepi umi mbaʼe vai oñehaʼarõʼỹve jave ha ndaipóri oikuaáva mbaʼépa oikóta tenonderã (Santiago 4:14). Péro Jehová oikuaa mbaʼépa oikóta (Isaías 46:10). Ymaiterei guivéma Iñeʼẽ, la Biblia, omombeʼu umi mbaʼe vai oikóva koʼág̃a rupi, péro avei umi mbaʼe porã oikopotaitémava.

2, 3. Mbaʼépa oporanduvaʼekue Jesúspe hemimboʼekuéra, ha mbaʼépa ombohovái chupekuéra?

² Jesucristo oñeʼẽvaʼekue Ñandejára Rréinogui, peteĩ goviérno oipeʼátava umi mbaʼe vai ha ojapótava ko Yvýgui peteĩ paraíso (Lucas 4:43). Umi ohendúva chupe oikuaasevaʼekue arakaʼépa oúta pe Rréino. Upévare, Jesús remimboʼekuéra oporanduvaʼekue chupe: ‘Mbaʼéichapa rohechakuaáta ne presénsia, ha ko sistéma og̃uahẽmaha huʼãme?’ (Mateo 24:3). Jesús heʼi chupekuéra Jehová añoite oikuaaha arakaʼetépa og̃uahẽta huʼãme ko múndo aña (Mateo 24:36). Péro Jesús omombeʼu mbaʼépa oikovaʼerã ko Yvy ape ári pe Rréino oguerupotaite jave  pyʼaguapy ha segurida yvyporakuérape. Umi mbaʼe heʼivaʼekue oikóma koʼág̃a!

³ Jahecha mboyve mbaʼérepa jaʼe ‘ko sistéma og̃uahẽmaha huʼãme’, ñañeʼẽmíta peteĩ ñorairõ avave ndohechaivaʼekuégui. Ko ñorairõ oikovaʼekue umi espíritu oikohápe, yvágape, ha tekotevẽ jaikuaa mbaʼéichapa oparakaʼe.

4, 5. a) Mbaʼépa oiko yvágape Jesucrístogui oiko riremi Rréi? b) Pe Revelación 12:12 heʼívare, mbaʼéichapa opa pe ñorairõ oikovaʼekue yvágape?

⁴ Pe kapítulo ohasavaʼekuépe, jahechákuri Jesucrístogui oikohague Rréi yvágape pe áño 1914-pe (Daniel 7:13, 14). Upe riremínte Jesús oñepyrũma ombaʼapo. ‘Peteĩ ñorairõ oiko yvágape’ heʼi la Biblia. ‘Miguel [Jesús réra avei] ha hiʼanhelkuéra oñorairõ pe dragón [Satanás el Diablo] ndive, ha pe dragón ha hiʼanhelkuéra oñorairõ avei’ *. Satanás ha umi ánhel aña, umi demónio, operde pe ñorairõ ha ojeity chupekuéra ko Yvýpe. Ñandejára anhelkuéra ifiélva ovyʼa Satanás ha idemoniokuéra ojeityhaguére upégui. Péro upéva nombovyʼái yvyporakuérape. La Biblia heʼimavaʼekue mbaʼérepa: ‘Áina pe yvy [...]!, pe Diablo oguejyhaguére peẽme, ha ipochyeterei, oikuaágui hiʼára mbykymaha’ (Revelación 12:7, 9, 12).

⁵ Jahechami mbaʼépepa opa ko ñorairõ oikovaʼekue yvágape. Ipochyetereígui, Satanás ogueru heta jehasa asy yvyporakuérape. Koʼág̃a jahecháta jaikomaha pe tiémpope. Péro kóva ndaipukumoʼãi ha Satanás jepe oikuaa mbykytaha. La Biblia ohenói ko tiémpope ‘pe ára paha’ (2 Timoteo 3:1). Mbaʼeichaitépa ikatu javyʼa Ñandejára  oipeʼapotaite rupi ko Yvy ape árigui umi mbaʼe vai Satanás ojapoukáva! Jahecháta koʼág̃a umi mbaʼe la Biblia heʼivaʼekue oikotaha ha oikomavahína. Koʼãva ohechauka jaikomaha pe ára pahápe, ha koʼẽrõite, Ñandejára Rréino poguýpe, umi ohayhúva Jehovápe oguerekóta hetaiterei mbaʼe porã opa árare. Ñepyrũrã, jahechami cuatro mbaʼe Jesús heʼivaʼekue oikotaha ko tiémpope.

6, 7. Mbaʼéichapa oñekumpli koʼág̃a umi mbaʼe Jesús heʼivaʼekue pe ñorairõ ha ñembyahýigui?

⁶ ‘Tetãnguéra opuʼãta ojuehe ha rréino opuʼãta ojuehe.’ (Mateo 24:7.) Umi cien áño ohasavaʼekuépe hetaiterei tapichakuérape ojejuka umi ñorairõhápe. Peteĩ istoriadór Inglaterraygua ohaivaʼekue: “Pe síglo XX-pe ojejuka hetaiteve tapicha oimeraẽ tiémpo ojekuaávagui. Upe síglo ndosoivaʼekue ñorairõgui, ha saʼieterei vaʼekue umi tiémpo ndaiporihápe ñorairõ”. Pe Instituto Worldwatch omombeʼu: “Umi omanovaʼekue ñorairõhápe [síglo XX-pe] tres vése hetave umi omanovaʼekuégui gerrahápe pe síglo I ñande ára guive 1899 peve”. Ohasáma cien millones umi omanovaʼekue ñorairõhápe  1914 guive. Upéicharõ, umi ñorairõ oipeʼáma hetaiterei ñande rapichágui ihentekuéra, ha ikatu nde avei reikuaáma peichagua ñembyasy.

⁷ ‘Saʼíta tembiʼu.’ (Mateo 24:7.) Umi oikuaáva heʼi umi mbaʼe ojeʼuvaʼerã hetaveha koʼág̃a ñambojojáramo umi treinta áño ohasavaʼekue ndive. Upéicharõ jepe heta oĩ iñembyahýiva ndoguerekóigui ojogua hag̃ua hembiʼurã térã pe yvy oñemitỹ hag̃ua. Umi tetã imboriahúvape hetave mil millónesgui umi ohasáva káda día peteĩ dólar térã saʼive reheve. Koʼãva apytépe hetaiterei oĩ ohasáva ñembyahýi. Pe Organización Mundial de la Salud heʼi káda áño ohasaha cinco millones umi mitã omanóva ndokaruporãigui.

8, 9. Mbaʼéichapa jaikuaa oikomaha umi mbaʼe Jesús heʼivaʼekue yvyryrýi ha péstegui?

⁸ ‘Oikóta heta yvyryrýi guasu.’ (Lucas 21:11.) Pe Servicio Geológico Estados Unidospegua heʼi 1990 guive oikoha diecisiete yvyryrýi káda áño ombyaíva umi óga guasu ha ojokáva pe yvy. Káda áño oiko avei peteĩ yvyryrýi jepe oitypaitéva umi óga guasu. Ha oĩ avei heʼíva: “Umi cien áño ohasavaʼekuépe yvyryrýi ojuka hetaitereípe, ha umi  tecnología pyahu saʼi gueteri ojapo ojoko hag̃ua umi ñemano”.

⁹ ‘Oĩta péste.’ (Lucas 21:11.) Oĩramo jepe heta pohã ipyahúva, umi mbaʼasy ymaguare ha koʼag̃agua ombohasyete gueteri yvyporakuérape. Peteĩ infórme heʼi koʼág̃a rupi hetaveha umi veinte mbaʼasy ojekuaavéva, umíva apytépe mbaʼasy poʼi, akãnundu roʼy ha cólera, ha oĩ avei umi ijetuʼuvémava oñemonguera hag̃ua pohãme. Avei oĩ treinta mbaʼasy pyahu rupi. Umíva apytépe oĩ umi ikatuʼỹva oñemonguera ha oporojukáva.

10. Mbaʼépa nde rehecha ojapoha hentekuéra, heʼiháicha 2 Timoteo 3:1-5?

¹⁰ La Biblia omombeʼu umi mbaʼe oikótava ko múndope pe ára pahápe, ha ohechauka avei mbaʼéichapa yvyporakuéra ndahaʼemoʼãvéi ymaguaréicha. Pe apóstol Pablo omombeʼu mbaʼéichatapa umi hentekuéra. Pe 2 Timoteo 3:1-5-pe jalee: ‘Pe ára pahápe og̃uahẽta umi tiémpo ijetuʼúva ojeiko hag̃ua’. Pablo heʼivaʼekue hentekuérare koʼã mbaʼe:

• Ojehayhúta ijupénte

• Ipláta rayhúta

•   Naiñeʼẽrendumoʼãi ituvakuérape

• Ndoguerekomoʼãi lealta

• Ndohayhumoʼãi hogayguápe

• Ndojejokokuaamoʼãi

• Iñañaitereíta

• Ohayhúta umi vyʼa ohayhurangue Ñandejárape

• Ohayhútavaicha Ñandejárape, péro hembiapóre ndojehechamoʼãi upéva

11. Mbaʼépa heʼi Salmo 92:7 ojehutaha umi iñañávape?

¹¹ Upéichapa avei umi hénte nde reikoha rupi? Oimevaʼerã upéicha. Opárupi oĩ umi péicha ojapóva. Ko mbaʼe ohechauka Ñandejára ojapopotaitemaha la Biblia heʼíva: ‘Umi iñañáva heñói vove ñanáicha, ha opavave ojapóva mbaʼe vai ipotypa vove, oñehundipáta chupekuéra opa ára g̃uarã’ (Salmo 92:7).

12, 13. Mbaʼérepa ikatu jaʼe hetaha pe ‘konosimiénto añetegua’ ko ‘ára pahápe’?

¹² Ko ára pahápe henyhẽ umi mbaʼe ñanembohasa asýva, heʼihaguéicha la Biblia. Upéicharõ jepe, ko múndope oiko mbaʼe porã umi Jehová siervokuéra apytépe.

 ¹³ ‘Pe konosimiénto añetegua hetáta’, heʼivaʼekue pe lívro oĩva la Bíbliape hérava Daniel. Arakaʼépa oikovaʼerã koʼã mbaʼe? Pe ‘ára pahápe’ (Daniel 12:4). Pe áño 1914 guive, Jehová oipytyvõ umi oservisévape chupe ontendeve hag̃ua la Biblia. Haʼekuéra oikuaa porãve umi añetegua Ñandejára réra ha ipropósitogui, pe sakrifísio ojapovaʼekue Jesucristo ñanderreskata hag̃ua, mbaʼépa oiko umi omanovaʼekuégui ha pe ñemoingove jeýgui. Avei oikuaa mbaʼéichapa oiko porãvéta ha upéicha omombaʼe Jehovápe. Oñemyesakã avei chupekuéra Ñandejára Rréinogui ha mbaʼéichapa omyatyrõta opa mbaʼe ko Yvy ape ári. Mbaʼépa ojapo hikuái koʼã mbaʼe oikuaávagui? Ko porandu ñandegueraha avei peteĩ profesíape oñekumplíva ko ára pahápe.

14. Moõ pevépa ojepredikáma pe notísia porã Rréino rehegua ha mávapa ojapo upéva?

¹⁴ “Koʼã marandu porã Rréino rehegua ojekuaaukavaʼerã opa ojeikoha rupi”, heʼivaʼekue Jesucristo omeʼẽrõ guare pe profesía heʼíva ‘ko sistéma og̃uahẽtaha huʼãme’ (Mateo 24:3, 14). Opárupi ko Yvy ape ári, ojepredika pe notísia porã Rréino rehegua ha upéicha ojekuaauka mbaʼépa pe Rréino, mbaʼépa ojapóta ha mbaʼéichapa ikatu jahupyty umi mbaʼe porã oguerútava. Ko notísia porã oñemog̃uahẽma hetaiterei tetãme, ohasáma doscientos treinta, ha ohasáma avei cuatrocientos umi idióma ojepredikaha. Oĩma millones testigos de Jehová kyreʼỹme omombeʼúva koʼã notísia porã. Haʼekuéra ou ‘opaichagua tetã ha trívu ha puévlo ha ñeʼẽgui’ (Revelación 7:9). Avei testigos de Jehová omboʼe millones oikuaasévape mbaʼépa añetehápe omboʼe la Biblia, hogaitépe ha opagaʼỹre mbaʼeve. Katuete ñamombaʼe jahechávo mbaʼéichapa oñekumpli pe profesía oĩva la Bíbliape, ha koʼýte jaikuaávo Jesús heʼihague ‘avave ndaijaʼemoʼãiha’ umi kristiáno añeteguáre (Lucas 21:17).

15. a) Ndépa ere jaikomaha pe ára pahápe, ha mbaʼérepa ere upéva? b) Mbaʼépa heʼiséta ‘pe fín’ umi oñemoĩvape g̃uarã Jehováre? Ha umi oñemoĩvape g̃uarã Irréino poguýpe?

¹⁵ Jahechágui oñekumpliha hetaite profesía oĩva la Bíbliape, ndépa ere jaikomaha pe ára pahápe? Ojepredika rire pe notísia porã Jehová oipotaháicha, og̃uahẽta ‘pe fín’ (Mateo 24:14). ‘Pe fín’ haʼe pe tiémpo Ñandejára oipeʼapataha umi mbaʼe vai oikóva ko Yvy ape ári. Ha ohundi hag̃ua mayma oñemoĩvape hese, Jehová oiporúta Jesús ha umi ánhel ipoderósovape (2 Tesalonicenses 1:6-9). Satanás ha idemoniokuéra nombotavymoʼãvéima tetãnguérape. Upe rire, umi oñemoĩva Ñandejára Rréino poguýpe ohupytýta heta mbaʼe porã (Revelación 20:1-3; 21:3-5).

16. Mbaʼépa iporã rejapo?

¹⁶ Jaikuaágui ko sistéma oĩva Satanás poguýpe oñehundipotaitemaha, iporã ñañeporandu: “Mbaʼépa ajapovaʼerã?”. Iporã jaikuaave Jehovágui ha pe ojerurévagui ñandehegui (Juan 17:3). Restudia kyreʼỹ vaʼerã la Biblia. Reho meme vaʼerã umi rreunionhápe ojapóva umi oservíva Jehovápe (Hebreos 10:24, 25). Reikuaavaʼerã umi mbaʼe Ñandejára oipotáva enterove jaikuaa, ha rejapovaʼerã umi oñekotevẽva reime porã hag̃ua henondépe (Santiago 4:8).

17. Mbaʼérepa hetápe omondýita umi hénte aña oñehundi vove?

¹⁷ Jesús heʼivaʼekue oĩtaha hetave umi ndohechakuaáiva jaikomaha pe ára pahápe. Umi iñañáva oñehundíta sapyʼaitépe ha oñehaʼarõʼỹre. Peteĩ mondaha ouháicha pyharekue, péicha avei hetápe omondýita ko mbaʼe (1 Tesalonicenses 5:2). Jesús heʼi porã vaʼekue: ‘Noé tiémpope oikohaguéicha, upéichata avei pe kuimbaʼe Raʼy presénsiape. Upérõ pe dilúvio mboyve, okaru  ha omboyʼu hikuái, kuimbaʼe omenda ha kuñanguéra oñemeʼẽ tembirekorã, pe ára Noé oike peve pe árkape, ha ndojapói hikuái mbaʼeve ou peve pe dilúvio ha ohundipaite enterovépe, upéichata pe kuimbaʼe Raʼy presénsiape’ (Mateo 24:37-39).

18. Mbaʼépa heʼivaʼekue Jesús tekotevẽva ñamombaʼe?

¹⁸ Upévare Jesús heʼi umi chupe ohendúvape: ‘Peñatendéke pendejehe voi ani hag̃ua pene korasõ ojejopyeterei pekarueterei ha pemboyʼuetereígui, ha umi mbaʼe pendepyʼapývagui pende rekovépe, ha upeichaháguinte og̃uahẽ sapyʼa peẽme upe ára peteĩ lásoicha. Oútagui opa oikovévare ko Yvy ape ári. Peñeñangarekóke, peñemboʼe meme pejehekýi hag̃ua umi mbaʼe oikótavagui, ha peime peñemboʼyhápe [térã, peime porã] pe kuimbaʼe Raʼy renondépe’ (Lucas 21:34-36). Ñamombaʼevaʼerã pe Jesús heʼivaʼekue. Mbaʼérepa? Pórke umi oĩ porãva Ñandejára Jehová ha Jesucristo renondépe, ‘pe kuimbaʼe Raʼy’, ohasáta omanoʼỹre oñehundi vove ko sistéma oĩva Satanás poguýpe, ha ikatúta oiko opa ára g̃uarã pe múndo pyahu iporãitévape ha hiʼag̃uietémava koʼág̃a (Juan 3:16; 2 Pedro 3:13).