Sang Septiembre 4, 2019, samtang ginabista ang anom ka Saksi ni Jehova sa Saratov, isa ka kilala nga iskolar sang relihion kag state advisor sang Russian Federation nga si Sergey Igorevich Ivanenko ang gin-agda nga magtestigo para sa mga Saksi ni Jehova. Si Dr. Ivanenko isa ka awtor sang duha ka publikasyon parte sa mga Saksi ni Jehova sa Russia. Ang masunod ginkuha sa iya testimonya sa korte:

Ang kabuhi kag pagsimba sang mga Saksi ni Jehova. “May isa ka rason kon ngaa ang mga Saksi ni Jehova indi pareho sa iban: Wala sila nagadepende sa estrikto nga mga kasuguan ukon sa awtoridad sang isa ka partikular nga lider. Sa baylo, ginabuligan nila ang kada isa nga mahanas ang ila konsiensia base sa Biblia para makadesisyon ang kada isa suno sa giya sini.

“Ginatinguhaan sang mga Saksi ni Jehova nga sundon ang nasulat sa Biblia, pareho sa ginhimo ni Jesucristo kag sang iya mga disipulo sang unang siglo C.E.

“Ululupod sila nga nagasimba paagi sa pagtuon sa Biblia, pagsabat sa mga pamangkot parte sa Biblia, kag pagkanta sang mga ambahon nga base man sa mga teksto sa Biblia. Gani maathag nga ang mga Saksi ni Jehova nagatinguha gid nga sundon ang Biblia sa tanan nila nga ginahimo.

“Nagapati man sila nga ang isa ka Cristiano dapat bahin sang isa ka kongregasyon. Ginatun-an man nila ang ginasiling sang Bag-ong Katipan parte kay Jesucristo kag sa iya mga disipulo, mga sumulunod, kag kon paano nagsugod ang Cristianong kongregasyon. . . . Gani nagapati ang mga Saksi ni Jehova nga dapat sila magsimba sing ululupod bilang kongregasyon.

“Ginapadaku nila nga makilala ang mga disipulo ni Jesucristo sa ila gugma sa isa kag isa.”

Ang pagbantala sang mga Saksi ni Jehova. “Kilala ang mga Saksi ni Jehova sa ila mapisan nga pagbantala. Para sa akon, ang mga Saksi ni Jehova ang pinakamapisan sa pagbantala kon ikumparar sa iban nga relihion. Ang kada isa sa ila dapat gid maghatag sing tion sa pagbantala.

“Pirme nila ginasiling, ‘Amo ini ang hambal sang Biblia.’ Puede mabasa sang ila kaistorya ang Biblia para makita niya mismo ang ginasiling sini. Kon nagaugyon sia sa ila ginasiling parte sa Biblia, mahimo sia mangin Saksi. Kon indi, wala sia ginapilit.”

Ang akusasyon nga extremist ang mga Saksi ni Jehova. “Siling sang gobierno sa Russia, extremist ang pila ka publikasyon sang mga Saksi ni Jehova kay suno sa mga eksperto mabasa diri nga ang mga Saksi ni Jehova lang ang matuod nga relihion kag ang iban butig. Amo man sina ang ginasiling sang iban nga relihion. Pero ang mga Saksi ni Jehova lang ang gin-akusar nga extremist. Suno sa mga awtoridad, sala ang ginahimo sang mga Saksi kay nagapangangkon sila nga mas maayo ang ila relihion sangsa iban.

“Bilang isa ka iskolar sang relihion, masiling ko nga sala ang desisyon sang korte. Kay kon mangusisa ka, makita mo nga ang tanan nga relihion nagasiling nga sila lang ang matuod kag ang iban butig ukon napatalang.

“Ang tanan nga relihioso nga mga tawo nagapati nga ang ila relihion ang matuod kag para sa ila ang iban nga mga relihion butig. Dapat amo sina ang ila pagpati, kay kon indi, matawag sila nga hipokrito.

“Pero, mientras nga ang kasuguan sang tawo wala nagasumpakil sa kasuguan sang Dios, ginatinguhaan gid sang mga Saksi ni Jehova nga sundon ang gobierno. Amo kon ngaa madamo ang report parte sa mga Saksi ni Jehova nga nagabalik sang mga wallet nga nadula kag nagabayad sang multa ukon buhis bisan puede man tani nila ini malikawan. Indi sila extremist kag wala man sila nagapakunokuno. Matuod gid nga ginatinguhaan nila nga mangin honest kag tumanon ang mga layi.”

Ang mga Saksi ni Jehova kag ang Biblia. “Ang isa pa ka rason ngaa ang mga Saksi ni Jehova indi pareho sa iban amo nga nagagamit sila sing sarisari nga translation sang Biblia sa ila pagtuon kag ministeryo. Importante para sa ila nga mapanagtag ang Biblia sa sarisari nga lenguahe. Indi sila pareho sang iban nga mga relihion kay nakapokus gid sila sa Biblia. Ang ila translation sang Biblia gindeklarar man nga extremist diri . . . Siguro abi sang mga nagdumili sini nga ila lang nga Biblia ang ginagamit sang mga Saksi ni Jehova kag mauntat na sila sa ila pagsimba kon indi na nila ini magamit. Pero sala gid ang ila ginapamensar. Ginarespeto sang mga Saksi ni Jehova ang tanan nga translation sang Biblia.”

Ang paggamit sang mga Saksi ni Jehova sang legal nga mga korporasyon. “Ang desisyon sang Supreme Court sang Russian Federation nagapakita nga . . . ang kalabanan sang mga kongregasyon sang mga Saksi ni Jehova wala sing legal nga korporasyon . . . Gani, sala ang magsiling nga ang kada isa sa mga Saksi ni Jehova sa isa ka lugar insigida nga mangin miembro sang isa ka legal nga korporasyon.

“Kon parte naman sa legal nga mga korporasyon . . . , gintun-an ko sing maayo ang ila legal nga mga dokumento. Wala gid sing may nakasulat diri nga mga tinaga pareho sang manugtatap, gulang, kag payunir. Masami nga mabasa sa sini nga mga dokumento ang mga founder, nga mga napulo lang ka tawo. Ginasambit lang sa sini ang ila legal nga mga responsibilidad. Wala sila sing espesyal nga posisyon sa kongregasyon kag wala sila sing awtoridad nga magdesisyon parte sa pagsimba sang mga Saksi ni Jehova. . . . Palareho lang ang ila hilikuton sa pagsimba bisan diin man sila nga pungsod ukon rehiyon.

“Ginatinguhaan gid sang mga Saksi ni Jehova nga sundon ang desisyon sang Supreme Court, nga ang ginadumilian lamang amo ang legal nga mga korporasyon. Pero padayon sila gihapon nga nagasimba kay wala man gin-ban ang ila relihion. Padayon sila nga nagasimba bilang indibiduwal kay nagapati sila nga kinamatarong nila ini. Bilang isa ka iskolar sang relihion, nagaugyon ako nga ang ila pagsimba wala nagalapas sa desisyon sang Supreme Court.”

Ang mga Saksi ni Jehova kag ang pagpatughong sang dugo. “Ang Biblia nagasiling nga ‘ang kabuhi yara sa dugo’; gani, indi ini dapat pagkaunon. Sa sina nga teksto, ang ginaistoryahan parte sa pagkaon. Pero indi lang amo sina ang pag-intiende sang mga Saksi. Nagapati sila nga ang dugo indi dapat paggamiton sa bisan ano nga paagi, sa pagkaon man (wala sila nagakaon sang blood sausage) ukon sa pagpatughong. Nagabaton sila sang mga minor blood fraction. Pero personal ina nga desisyon sang kada isa . . . Kon indi sila magpatughong sing dugo, indi buot silingon nga gusto nila mapatay kundi gusto nila sing de-kalidad nga pagbulong. Nagapati sila nga delikado ang pagpatughong sang dugo kay puede sila malatnan sang AIDS ukon iban pa nga balatian, kag madamo nga doktor ang ugyon sa sini. Mas safe ang pag-opera nga wala nagagamit sang dugo, kag nakita ko sa mga statistics nga masami nga gusto sang mga manggaranon nga indi magpatughong bangod mas safe ini kag mas madasig sila nga nagaayo.”

Ang mga Saksi ni Jehova kag mga donasyon. “Depende sa isa kon bala mahatag sia sang donasyon. Posible nga ang isa nagatambong sa mga miting sang mga Saksi ni Jehova sa bilog niya nga kabuhi pero wala gid sia sing may ginhatag nga donasyon bisan isa ka ruble ukon dolyar. Depende sa iya kon bala mahatag sia sang donasyon ukon indi.”

Bisan pa si Dr. Ivanenko isa ka iskolar sang relihion kag nagtestigo nga ang mga Saksi ni Jehova mga Cristiano nga nagasunod sa kasuguan, ginbalewala sang korte ang iya testimonya. Ginsentensiahan gihapon sang korte nga mapriso ang anom ka brother sa sarisari nga kalawigon.

Samtang padayon nga ginakasuhan kag ginapriso sa Russia ang aton mga kauturan, padayon man naton nga ginapangamuyo nga pakamaayuhon ni Jehova ang ila kaisog kag katutom para makabatas sila sing malipayon.—Salmo 109:2-4, 28.