Ang kasaysayan sang mga Saksi ni Jehova sa Russia, isa ka istorya sang kapintas kag paghingabot. Sa daku nga bahin sang ika-20 nga siglo, ginpintasan kag ginmaltratar sang mga awtoridad sang Russia ang mga Saksi, bisan pa kilala sila nga mga pumuluyo nga nagatuman sa kasuguan kag wala nagapanggamo. Gusto sang gobierno sang Soviet Union nga pasundon sila sa mga pagpati sang Soviet. Wala sila gintugutan nga magpanag-iya sang mga Biblia ukon sang mga balasahon parte sa relihion. Pirme ginabantayan ang ila hulag kag ginahiwat nila ang ila mga miting sing sekreto. Kon madakpan sila, ginakastigo sila kag ginasentensiahan nga mapriso sing malawig. Gintapok sang gobierno ang linibo sa Siberia.

Nagbag-o ina sang 1991 sang ginkilala sang gobierno sang Russia ang mga Saksi ni Jehova. May kahilwayan na sila sa pagsimba kag wala na sila ginabantayan sang mga awtoridad. Pero wala ini nagdugay.

Sang 2009, nagsugod liwat ang pagpamatok kag mga restriksion sang ginsuportahan sang Russian Supreme Court ang desisyon sang isa ka lower court nga tawgon nga “extremist” ang isa ka kongregasyon sang mga Saksi ni Jehova. Pagkatapos sang tinuig nga kaso sa korte, sang Abril 2017, nagdesisyon ang Russian Supreme Court nga ipasira ang legal nga mga korporasyon sang mga Saksi bangod kuno sa extremist nga hilikuton. Ginkumpiskar dayon sang mga awtoridad sang Russia ang ila mga propiedad, ginpasira ang ila mga lugar para sa pagsimba, kag gindeklarar nga “extremist material” ang ila mga balasahon parte sa relihion.

Indi lang legal nga mga korporasyon ang ginatarget sang mga awtoridad sang Russia, kundi pati man ang indibiduwal nga mga Saksi ni Jehova. Ginpasobrahan nila ang pag-aplikar sa kasuguan kag nagsiling sila nga ang ginahimo nga pribado nga pagsimba sa balay sang mga Saksi may labot gihapon sa gin-ban nga organisasyon. Gina-raid sang mga pulis ang mga balay sang mga Saksi. Ginkastigo sila kag mapintas nga gin-interogar. Gin-aresto, ginsentensiahan, kag ginpriso ukon gin-house arrest ang mga Saksi, lalaki man ukon babayi, kag bisan ano man ang ila edad.

Halin sang pag-ban sang Abril 2017, ginatos ka Saksi ang ginbutang sa pretrial detention ukon ginpriso bangod sa kaso nga extremism. Asta sang Abril 17, 2024, ara sa prisuhan ang 123 ka Saksi.

Mga Reklamo Batok sa Kapintas sang Russia sa mga Saksi ni Jehova

Padayon nga ginapriso sang mga awtoridad sang Russia ang mga Saksi bangod sa extremist nga hilikuton bisan pa sa reklamo sang madamo nga pungsod nga untaton sini ang sigesige nga paghingabot. Ang mga tawo kag mga korte nga nakahibalo sini sa gua sang Russia nagpakalain sa gobierno sang Russia bangod sa grabe nga pagpamigos sini sa mga Saksi ni Jehova.

Halimbawa sang Mapintas nga mga Desisyon

• Sang Enero 25, 2024, si Sona Olopova, isa ka 37 anyos nga nakasal nga babayi, ginsentensiahan sang duha ka tuig nga forced labor sa isa ka correctional facility. Kinahanglan niya mag-istar sa correctional facility sa Samara Region asta nga matapos niya ang iya sentensia.

• Sang Hulyo 2018, gin-raid sang mga pulis nga may armas ang isa ka apartment diin nagatener si Dmitriy kag si Yelena Barmakin para atipanon ang 90 anyos nga lola ni Yelena. Gindala si Dmitriy kag Yelena sa ila ginhalinan nga siudad, nga Vladivostok, diin gin-aresto si Dmitriy. Ginsugdan ang kaso pagkasunod nga tuig bangod sa “pag-organisar sang mga hilikuton sang isa ka extremist nga organisasyon.” Sang Pebrero 6, 2024, ginsuportahan sang isa ka appeal court ang sentensia sa iya kag gindala sia sa prisuhan pagkatapos sang hearing para tapuson ang iya walo ka tuig nga sentensia. Si Yelena gina-hearing man bangod sa iya pagtuo.

• Si Aleksandr Chagan, isa ka 53 anyos nga lalaki nga may asawa, gindesisyunan nga guilty sang Tsentralniy District Court of Tolyatti in the Samara Region. Ginsentensiahan sia sang walo ka tuig nga pagkapriso, nga amo ang isa sa pinakamalawig nga sentensia nga ginhatag sa mga Saksi nga lalaki sa Russia. Sang Pebrero 29, 2024, sang natapos ang iya hearing, gindala sia dayon sa prisuhan halin sa korte. Ara sia subong sa Detention Center No. 4 sa Samara Region.

• Ginsentensiahan nga guilty sang isa ka korte sa Irkutsk Region sa eastern Siberia ang siam ka lalaki nga Saksi bangod sang extremism. Sang Marso 5, 2024, siam ka lalaki, nga 72 anyos ang pinakatigulang, ang ginsentensiahan sang sarisari nga kalawigon sang pagkapriso nga asta sa pito ka tuig ang pinakalawig. Ang ila pagkapriso amo ang katapusan sa mga kriminal nga kaso nga nagsugod sang Oktubre 2021 pagkatapos ginpang-raid ang ila mga balay sang mga pulis. Sa tion nga ginasentensiahan sila, ang isa sa mga lalaki, nga si Yaroslav Kalin, napriso na sing sobra duha ka tuig sa pretrial detention. Nagsiling sia indi gid manami ang iya eksperiensia sang napriso sia sa “pinakamalala nga prisuhan kag kalain gid sang sitwasyon didto.”

Padayon nga mga Panikasog Para Mauntat ang Indi Makatarunganon nga mga Pagpriso

Nabalaka gid ang mga Saksi ni Jehova sa bilog nga kalibutan bangod sa mapintas nga pagtratar sa ila mga kauturan sa Russia. Minilyon ka Saksi sa bilog nga kalibutan ang nagpadala sang mga sulat sa mga Russian nga mga opisyal sang gobierno, agod magpangabay para sa ila napriso nga mga kauturan. Ang mga abogado sining ginpriso nga mga Saksi nag-apelar sa tanan nga korte sa Russia kag nagpasaka sang mga application sa European Court of Human Rights. Nagpadala man ang mga Saksi ni Jehova sing reklamo sa UN Human Rights Committee kag sa UN Working Group on Arbitrary Detention kag naghatag man sila sang mga report sa mga international organization nga nagabantay sang mga pag-abuso sa kinamatarong sang mga tawo. Padayon nga himuon sang mga Saksi ni Jehova ang tanan nga paagi nga ipahibalo ang ginaantos sang ila mga kauturan sa Russia para mauntat ining mapintas nga paghingabot sa relihion.

Time Line

1. Abril 17, 2024

   May 123 ka Saksi nga ginpriso.

2. Oktubre 24, 2023

   Nagpagua sang duha ka View ang UN Human Rights Committee (CCPR) parte sa Local Religious Organization sa Elista kag Abinsk. Sa pareho nga kaso, nagsiling ang CCPR nga ginlapas sang Russia ang mga kinamatarong sang mga Saksi base sa Article 18.1 (“right to freedom of thought, conscience and religion”) kag Article 22.1 (“right to freedom of association”) of the International Covenant on Civil and Political Rights. Ginkompirmar sang mga desisyon nga wala sing pagdumot ukon pagpamintas nga mabasa sa mga publikasyon nga ginagamit sang ila relihion.

3. Hunyo 7, 2022

   Ginpagua sang ECHR ang importante nga desisyon sini, sa Taganrog LRO and Others v. Russia nga kaso, nga nagakondenar sa Russia bangod sa pagmaltrato sa mga Saksi ni Jehova.

4. Enero 12, 2022

   Ginlakip sang Ministry of Justice of the Russian Federation sa Federal List of Extremist Materials ang JW Library application. Amo ini ang una kag lamang nga app nga gin-ban sa Russia bangod gindeklarar nila ini nga extremist.

5. Septiembre 27, 2021

   Ginbasura sang Saint Petersburg City Court ang pag-apelar sa Marso 31, 2021, nga desisyon sang korte nga nagdeklarar nga extremist ang JW Library app. Gin-ban ang paggamit sini sa bilog nga Russian Federation kag sa Crimea. Ginpatuman gilayon ang una nga desisyon sang Korte.

6. Abril 26, 2019

   Nakita sang UN Working Group on Arbitrary Detention nga ginlapas ang mga kinamatarong ni Dimtriy Mikhailov kag ginpakamalaut sini ang paghingabot sang Russia sa mga Saksi ni Jehova.

7. Abril 20, 2017

   Ang Supreme Court sang Russian Federation nagdesisyon nga ipasira ang branch office sang mga Saksi ni Jehova kag ang 395 ka Local Religious Organizations.