Sang Hunyo 3, 2021, ang Industrial District Court of Kursk nagdesisyon nga guilty ang isa ka mag-asawa kag ang tatlo ka brother. Si Brother Andreyev ginsentensiahan nga mapriso sing apat ka tuig kag tunga kag si Brother Ryshkov sing tatlo ka tuig. Si Brother Bagratyan ginsentensiahan nga mapriso sing duha ka tuig kag tunga kag ang iya asawa nga si Alevtina sing duha ka tuig. Si Brother Vospitanyuk, nga gindugang sa sini nga kaso, ginsentensiahan sang duha ka tuig nga probation nga may upod nga mga restriksion.

Andrey Andreyev

• Natawo: 1976 (Kursk)

• Biograpiya: Napangasawa niya si Svetlana sang 1999. May duha sila ka bata nga babayi. Nangin interesado sia sa Biblia sang natun-an niya nga nagakatuman ang mga tagna sini. Nabawtismuhan sia sang 2002

Alevtina Bagratyan

• Natawo: 1977 (Kursk)

• Biograpiya: Sang bata sia, nanamian sia sa art. Bata pa sia sang nagtuon sia sing Biblia. Nabawtismuhan sia sang 1997. Napamana niya si Artem sang 2012. Nagatrabaho sia bilang hairdresser samtang nagaatipan sa iya iloy

Artem Bagratyan

• Natawo: 1972 (Abovyan, Armenia)

• Biograpiya: Halin sa Armenia nagsaylo sia sa Russia. Nakilala niya si Alevtina sa Kursk. Nanamian gid sila nga mag-asawa sa mga tinuga sa palibot nila. Nabawtismuhan sia sang 2000

Andrey Ryshkov

• Natawo: 1987 (Kursk)

• Biograpiya: Napatay ang iya amay sang bata pa sia. Nagdaku sia sa iya lolo samtang nagaobra ang iya iloy. Nangin interesado sia sa Biblia sang nasabat sini ang mga pamangkot nga madugay na niya ginapaligban. Nabawtismuhan sia sang 2011. Napangasawa niya si Marina sang 2016. Nagapangkay-o sia sadto sang mga guba sa mga apartment

Sang Oktubre 16, 2019, ginhalughog sang mga agent sang Federal Security Service (FSB) ang madamo nga balay sa Kursk. Madamo man sila sing ginpang-interogar. Gin-aresto nila si Brother Andrey Andreyev kag ang mag-asawa nga Bagratyan. Sang Enero 21, 2020, gin-aresto man sang mga awtoridad si Brother Ryshkov. Ginpagua si Alevtina Bagratyan sang Disiembre 17, 2020, pagkatapos sang sobra 13 ka bulan sa pretrial detention center. Naka-house arrest sia subong. Ang tatlo ka brother ara gihapon sa detention center.

Si Artem Bagratyan may diabetes. Ginsugid ni Alevtina ang iya ginbatyag sang ginbutang sila nga mag-asawa sa lainlain nga selda. Nagsiling sia: “Madugay pa igo ko nabal-an kon ano ang natabo sa iya kag kon bala naglala ang iya balatian. Grabe gid ang akon kahidlaw sa iya.”

Nagsiling si Alevtina nga nagsalig gid sia nga indi sia pagpabay-an ni Jehova pati man ang mga brother nga napriso. Nagsiling sia: “Pirme gid ako ginpabakod [ni Jehova]. Sigurado ako nga padayon niya ako nga pabakuron. Nagasalig gid ako sa iya.”

Nagasalig kita nga si Jehova padayon nga mangin torre nga mabakod para sa aton tatlo ka brother kag isa ka sister samtang padayon nga gina-hearing ang ila kaso.—Hulubaton 18:10.