Sugod sang Enero 1, 2000, ang gobierno sa Sweden nagahatag sang pinansial nga suporta sa relihioso nga mga organisasyon base sa Support for Religious Communities Act sang pungsod. Ini nga suporta ginahatag lang sa relihion nga “nagabulig sa pagtudlo kag pagpabakod sang mga prinsipio nga importante para padayon nga nahiusa ang komunidad” kag sa relihion nga “malig-on kag nagahimo sang maayo sa komunidad.”

Bisan pa kalabanan sang relihion sa Sweden nagabaton na sang pinansial nga suporta, sugod sang 2007, sulitsulit nga wala gin-aprobahan sang gobierno ang pinansial nga suporta para sa mga Saksi ni Jehova bangod sa panindugan sang aton relihion parte sa neutralidad sa pulitika.

Bangod wala na sang iban pa nga opsyon, ang aton mga kauturan nagpasaka sang kaso sa korte nga nagapangabay nga mangin patas ang gobierno sang Sweden. Tatlo ka beses nila ini nga ginhimo, kag sa kada kaso, ang Supreme Administrative Court nagsiling nga ilegal ang desisyon sang gobierno nga indi paghatagan ang aton organisasyon sang pinansial nga suporta kag dapat ini bag-uhon.

Sang Oktubre 24, 2019, ginbag-o gid man sang gobierno sang Sweden ang desisyon sini kag nagsiling nga ginahimo sang mga Saksi ni Jehova “ang tanan nga ginapatuman sang kasuguan” gani dapat sila hatagan sang pinansial nga suporta sang gobierno.

Pareho man sini ang natabo sining karon lang sa Norway, nga nagahatag sang pinansial nga suporta sa tanan nga relihion, lakip sa mga Saksi ni Jehova. Pero sang nagligad nga mga bulan, ginpangabay ang gobierno nga usisaon liwat kon bala nagakabagay nga hatagan sang pinansial nga suporta ang mga Saksi ni Jehova bangod sang ila neutralidad sa pulitika. Gani ginhatagan sang aton mga kauturan ang mga opisyal sang Norway sing husto nga impormasyon parte sa aton panindugan sa neutralidad sa pulitika. Ginhatagan man nila ang gobierno sing mga kopya sang mga kaso diin ang Supreme Administrative Court sang Sweden nagdesisyon pabor sa mga Saksi, kag sang mga desisyon sang mga korte kag mga gobierno sa Germany kag Italy nga pabor man sa mga Saksi.

Nalipay kita nga sang Nobiembre 18, 2019, ang mga opisyal sa Norway nagdesisyon nga padayunon ang paghatag sang pinansial nga suporta sa mga Saksi ni Jehova. Nagsiling sila: “Ang pagboto sa eleksion isa sa panguna nga kinamatarong sang mga pumuluyo sa Norway, pero indi ini obligasyon. Nagapati ang mga Saksi ni Jehova nga indi nila dapat paggamiton ini nga kinamatarong, . . . kag maathag nga [para sa gobierno] . . . indi ini legal nga rason para untaton ang paghatag sang pinansial nga suporta.”

Si Brother Dag-Erik Kristoffersen, nga nagaalagad sa branch sa Scandinavia, nagsiling: “Nalipay gid kami nga ginakilala kami sang gobierno nga nagahimo sang maayo sa komunidad. Kabay pa nga ang iban nga mga pungsod nga may pareho sini nga sitwasyon magabinagbinag man sini nga desisyon.” Labaw sa tanan, ginapasalamatan naton si Jehova, ang Supremo nga Manughatag sing Kasuguan.—Isaias 33:22.