Ang Makita Lang Bala ang Patihan Naton?

“Ang kamatuoran tuhoy sa Dios kag sa palaabuton amo ang ginakabalak-an sang mga Cristiano kag sang iban nga relihion. Pero para sa isa ka agnostiko imposible mahibaluan ini nga kamatuoran. Ukon, kon posible man ini, indi ini mahibaluan subong.”​—SUNO SA PILOSOPO NGA SI BERTRAND RUSSELL, 1953.

ANG naghimuhimo sang tinaga nga “agnostiko” amo si Thomas Huxley, isa ka sientista nga nagatuon tuhoy sa mga sapat. Natawo si Huxley sang 1852. Nagkabuhi man sia sa tion ni Charles Darwin, kag ginasakdag gid niya ang ebolusyon. Sang 1863, nagsulat si Huxley nga wala sia sing nakita nga ebidensia nga may Dios nga “siling sang mga Cristiano nagahigugma kag nagaulikid sa aton.”

Madamo karon ang nagabuylog sa sining maalam nga mga tawo nga nagasiling nga mapati lamang sila sa ila makita. Mahimo sila magsiling nga ang pagpati sa isa ka persona ukon isa ka butang nga wala sing pamatuod, isa gid ka kabuangan.

Ginasiling bala sang Biblia nga mapati na lang kita nga may Dios bisan wala sing ebidensia? Wala. Ginapakita sang Biblia nga kabuangan ang pagtuo nga wala sing pamatuod. “Ang kulangkulang nagapati sa tagsa ka polong, apang ang mahalongon nagatan-aw sa iya paglakat.”​—Hulubaton 14:15.

Kamusta naman ang pagtuo sa Dios? May ebidensia gid bala nga may Dios nga nagahigugma kag nagaulikid sa aton?

Ginpakita ang mga Kinaiya sang Dios

Ang manunulat sang Biblia nga si Pablo namulongpulong sa grupo sang maalam nga mga tawo sa Atenas kag nagpamatuod nga may “Dios nga naghimo sang kalibutan kag sang tanan nga butang sa sini.” Ginsilingan niya ining maduhaduhaon nga mga tagpalamati nga ang Dios interesado sa katawhan, kag sa katunayan “indi sia malayo sa tagsa sa aton.”​—Binuhatan 17:24-27.

Ngaa kumbinsido gid si Pablo nga nagaluntad ang Dios kag interesado sa Iya tinuga nga mga tawo? Ginsugid ni Pablo ang rason sang nagsulat sia sa iya masigka-Cristiano sa siudad sang Roma. Nagsiling sia tuhoy sa Dios: “Ang iya di-makita nga mga kinaiya, . . . maathag nga makita kutob sang pagtuga sa kalibutan, bangod mahantop ini sa mga butang nga gintuga.”​—Roma 1:20.

Ang masunod nga mga artikulo magasugid sang tatlo ka kinaiya sang Dios nga makita sing maathag sa iya mga gintuga. Samtang ginausisa mo ini nga mga halimbawa, pamangkuta ang imo kaugalingon, ‘Ano ang epekto sa akon sang ihibalo tuhoy sa mga kinaiya sang Dios?’

[Blurb sa pahina 3]

Wala nagsiling ang Biblia nga mapati na lang kita nga may Dios bisan wala sing ebidensia