Nabatyagan Niya ang Aton Pag-antos
Mangin Suod sa Dios
Nabatyagan Niya ang Aton Pag-antos
“ANG kahanuklog amo ang pagbakho sang akon tagipusuon sa imo pag-antos.” Amo ini ang paglaragway sang isa ka may edad na nga misyonero sang mga Saksi ni Jehova sa sining hamili nga kinaiya. Si Jehova nga Dios amo ang panguna nga halimbawa sang kahanuklog. Nabatyagan niya ang pag-antos sang iya katawhan. Paano naton ini mapat-od? Ang kahanuklog ni Jehova makita gid sa mga ginsiling kag ginhimo ni Jesus sang yari sia sa duta. (Juan 5:19) Halimbawa, binagbinaga ang kahimtangan nga ginlaragway sa Juan 11:33-35.
Si Lazaro nga abyan ni Jesus napatay. Gani nagkadto si Jesus sa minuro nga ginapuy-an ni Lazaro. Natural lang nga nagpangasubo ang mga utod nga babayi ni Lazaro nga sanday Maria kag Marta. Palangga gid ni Jesus ini nga pamilya. (Juan 11:5) Ano ang iya himuon? Ang Biblia nagsiling: “Sang nakita nga nagahibi [si Maria] kag nagahinibi man ang mga Judiyo nga nag-upod sa iya, natandog gid ang tagipusuon ni Jesus kag nalisang sia; kag nagsiling sia: ‘Diin ninyo sia ginhamyang?’ Nagsiling sila sa iya: ‘Ginuo, kari kag tan-awa.’ Nagtulo ang luha ni Jesus.” (Juan 11:33-35) Ngaa naghibi si Jesus? Matuod, patay na ang abyan niya nga si Lazaro, apang ipasag-uli niya ang kabuhi sini paagi sa pagbanhaw sa iya. (Juan 11:41-44) Indi ayhan nga may butang pa nga nagtandog sa balatyagon ni Jesus amo nga naghibi sia?
Basaha liwat ang ginsiling kaina sang Biblia. Talupangda nga sang nakita ni Jesus nga nagahibi si Maria kag ang iban nga mga tawo, “natandog” sia kag “nalisang.” Sa orihinal nga lenguahe, ini nga mga tinaga nagapatuhoy sa tuman nga kasubo. * Natandog gid si Jesus sa iya nakita. Ang tuman nga kasubo ni Jesus makita sang nagtulo ang mga luha sa iya mata. Maathag nga nabatyagan niya ang pag-antos sang iban. Nakaagi ka man bala nga naghibi sang nakita mo nga nagahibi ang imo pinalangga?—Roma 12:15.
Ang kahanuklog ni Jesus magabulig sa aton agod matun-an ang mga kinaiya kag pamaagi sang iya Amay, si Jehova. Dumduma nga makita gid kay Jesus ang mga kinaiya sang iya Amay amo nga nagsiling sia: “Sia nga nakakita sa akon nakakita man sa Amay.” (Juan 14:9) Gani kon mabasa naton nga “nagtulo ang luha ni Jesus,” mapat-od naton nga nabatyagan ni Jehova ang pag-antos sang iya mga sumilimba. Ginpamatud-an man ini sang iban nga mga manunulat sang Biblia. (Isaias 63:9; Zacarias 2:8) Mapinalanggaon gid nga Dios si Jehova!
Nagasuod kita sa mga tawo nga mahinuklugon. Kon naluyahan kita sing buot ukon nasubuan, nagapalapit kita sa mga tawo nga makahangop sang aton kahimtangan kag mahanuklog sa aton. Labi na gid kita nga magasuod kay Jehova, ang maluluy-on nga Dios nga nakabatyag sang aton pag-antos kag nakahangop kon ngaa nagahibi kita!—Salmo 56:8.
[Footnote]
^ par. 6 Ang Griego nga tinaga nga ginbadbad “nagtulo ang luha” masami nga nagapatuhoy sa “mahipos nga paghibi.” Apang, ang tinaga nga nagalaragway sa paghibi ni Maria kag sang iban nga mga tawo mahimo nagakahulugan sing “mabaskog nga paghibi, ukon paglalaw.”
