Magtuon sa Pulong sang Dios

Ano ang Matabo sa mga Relihion?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ang tanan bala nga relihion maayo?

Madamo nga grupo sang relihion ang may mga miembro nga gusto gid magpahalipay sa Dios. Nakita sang Dios ini nga mga tawo kag nabalaka sia sa ila. Pero makapasubo nga gingamit sang pila ka tawo ang relihion sa malain nga katuyuan. Sang una, ginpaantos sang mga lider sang relihion ang ila mga kaaway. (2 Corinto 4:3, 4; 11:13-15) Suno sa mga balita, ginasuportahan subong sang pila ka lider sang relihion ang terorismo ukon inaway. Nadalahig man sila sa pag-abuso sa kabataan.—Basaha ang Mateo 24:3-5, 11, 12.

Ginatudlo sang Biblia nga may duha ka sahi sang relihion—matuod kag butig. Ang butig nga relihion wala nagatudlo sang kamatuoran parte sa Dios. Pero gusto ni Jehova nga Dios nga mahibaluan sang mga tawo ang kamatuoran parte sa iya.—Basaha ang 1 Timoteo 2:3-5.

2. Ano ang matabo sa mga relihion?

Indi gusto sang Dios nga ang mga tawo mapatalang sang relihion nga nagapangangkon nga nagahigugma sa iya pero wala nagatudlo sang kamatuoran parte sa iya. Ang matuod, gusto sang mga miembro sina nga relihion nga makig-abyan sa kalibutan nga ginakontrol ni Satanas nga Yawa. (Santiago 4:4; 1 Juan 5:19) Ang relihion nga nagasuporta sa pulitika sa baylo nga sa Dios ginpaanggid sang Biblia sa prostityut. Ginatawag ini sang Biblia nga “Babilonia nga Daku,” nga ginkuha sa ngalan sang siudad sang una diin nagsugod ang butig nga relihion sa tapos sang Anaw sang panahon ni Noe. Malapit na lang laglagon sang Dios ang relihion nga nagadaya kag nagapigos sa mga tawo.—Basaha ang Bugna 17:1, 2, 5, 17; 18:8, 23, 24.

  3. Paano paluntaron sang Dios ang kalipay sa duta?

Ang kalaglagan sang butig nga relihion isa ka maayo nga balita. Madula na ang pagpamigos sa bilog nga kalibutan. Indi na gid mapatalang kag mabahinbahin sang butig nga relihion ang mga tawo. Ang tanan mahiusa na sa pagsimba sa lamang matuod nga Dios.—Basaha ang Isaias 11:9; Bugna 18:20, 21; 21:3, 4.

4. Ano ang dapat himuon sang sinsero nga mga tawo?

Ginadumdom gid ni Jehova ang sinsero nga mga tawo nga ara sa butig nga relihion. Ginatipon niya sila subong paagi sa pagtudlo sa ila sang kamatuoran.—Basaha ang Miqueas 4:2, 5.

Ginabaton ni Jehova sa iya pamilya ang mga gusto mag-alagad sa iya. Bisan pa maakig ang aton mga abyan kag paryente kon mag-alagad kita kay Jehova, daku man ang aton benepisyo. Mangin abyan kita sang Dios, matigayon naton ang bag-o kag mahigugmaon nga “pamilya,” kag may paglaum kita nga mabuhi sing wala katapusan.—Basaha ang Marcos 10:29, 30; 2 Corinto 6:17, 18.

Para sa dugang nga impormasyon, basaha ang kapitulo 15 kag 16 sini nga libro, Ano Gid ang Ginatudlo Sang Biblia? nga ginhimo sang mga Saksi ni Jehova.

[Picture Credit Line sa pahina 16]

The Complete Encyclopedia of Illustration/J. G. Heck