NGAA NAGADUHADUHA ANG IBAN? Suno sa isa ka pagtuon sining karon lang, ang aton lamang galaksiya may indi magkubos sa 100 bilyones ka planeta. Bangod sa sobra nga kadakuon sang uniberso, madamo ang nagapamangkot, ‘Ngaa bantayan sang labing gamhanan nga Manunuga ang ginahimo sang kubos nga mga tawo sa tuman ka gamay nga planeta?’

ANO ANG GINATUDLO SANG PULONG SANG DIOS? Wala lang kita ginhatagan ni Jehova nga Dios sang Biblia kag dayon pabay-an na lang. Sa baylo, ginapasalig niya kita: “Laygayan ko ikaw nga ang akon mata yara sa ibabaw nimo.”—Salmo 32:8.

Binagbinaga si Hagar nga taga-Egipto sang ika-20 nga siglo B.C.E. Indi sia matinahuron sa iya ama nga si Sarai amo nga ginpakahuy-an sia, kag nalagyo sia sa kamingawan. Bangod nakasala sia, indi na bala interesado ang Dios sa iya? Ang Biblia nagasiling: “Naabutan sia sang [anghel] sang GINOO.” Ginpasalig sia sini: “Nabatian sang GINOO ang imo kapipit-an.” Dayon nagsiling si Hagar kay Jehova: “Ikaw amo ang Dios nga nagatan-aw.”—Genesis 16:4-13.

“Ang Dios nga nagatan-aw” nagabantay man sa imo. Halimbawa, ginabantayan gid sang mahigugmaon nga iloy ang iya gagmay nga kabataan, kay mas kinahanglan sang gamay nga bata ang atension sang iya ginikanan. Sing kaanggid, ginabantayan man kita sang Dios ilabi na kon kubos kita kag maluya. “Nagapuyo ako sa mataas kag balaan nga duug,” siling ni Jehova, “kag upud sa iya man nga may mahinulsulon kag mapainubuson nga espiritu, sa pagpaumpaw sang espiritu sang mapainubuson, kag sa pagpaumpaw sang tagiposoon sang mahinulsulon.”—Isaias 57:15.

Pero, mahimo magpalibog ka: ‘Paano ako ginabantayan sang Dios? Nagatan-aw lang bala sia sa akon hitsura, ukon kilala kag nahangpan gid bala niya kon sin-o ako?’