Kon mamati ka sang balita sa bilog nga kalibutan, mahimo matalupangdan mo nga kon kaisa ang relihion ginagamit sa kalainan. Indi tanan nga relihion naghalin sa matuod nga Dios. (Mateo 7:15) Sa pagkamatuod, madamo nga tawo ang ginpatalang.—Basaha ang 1 Juan 5:19.

Pero, ginatalupangod sang Dios ang mga tawo nga sinsero nga nagahigugma sang maayo kag matuod. (Juan 4:23) Ginaagda sila sang Dios nga magtuon sang kamatuoran sa iya Pulong, ang Biblia.—Basaha ang 1 Timoteo 2:3-5.

Ginahiusa ni Jehova nga Dios ang mga tawo nga may lainlain nga relihion paagi sa pagtudlo sa ila sang kamatuoran kag pagtudlo sa ila nga maghigugmaanay. (Miqueas 4:2, 3) Gani makilala mo ang mga miembro sang matuod nga relihion paagi sa ila pag-ulikid sa isa kag isa.—Basaha ang Juan 13:35.

Ginabase sang matuod nga mga sumilimba ang ila pagtuo kag pagkabuhi sa Biblia. (2 Timoteo 3:16) Ginapadunggan man nila ang ngalan sang Dios. (Salmo 83:18) Kag ginasakdag nila ang Ginharian sang Dios nga amo ang lamang nga paglaum sang katawhan. (Daniel 2:44) Ginailog nila si Jesus sa pagpaiwag sang “kapawa” paagi sa paghimo sing maayo sa ila isigkatawo. (Mateo 5:16) Gani, makilala ang matuod nga mga Cristiano paagi sa ila pagpamalaybalay agod isugid ang maayong balita sang Ginharian sang Dios.—Basaha ang Mateo 24:14; Binuhatan 5:42; 20:20.