•  Paano mabal-an sang mga Saksi ni Jehova kon ang isa ka selebrasyon ginabaton sang Dios?

•  Palangga bala gihapon sang mga Saksi ni Jehova ang ila pamilya bisan pa wala sila nagasaulog sang pila ka selebrasyon?

•  Ginakumbinsi bala sang mga Saksi ni Jehova ang iban nga indi magsaulog sang pila ka selebrasyon?

 Antes magdesisyon kon saulugon ang isa ka selebrasyon, ginausisa anay sang mga Saksi ni Jehova ang Biblia. May pila ka selebrasyon nga nagakontra sa mga prinsipio sa Biblia. Kon amo sina, wala ina ginasaulog sang mga Saksi ni Jehova. Kon parte naman sa iban nga selebrasyon, ang kada Saksi ang magadesisyon, nga ‘nagapanikasog gid pirme nga ang iya konsiensia matinlo sa atubangan sang Dios kag sang mga tawo.’—Binuhatan 24:16.

 Ang masunod amo ang pila sa mga pamangkot nga ginabinagbinag sang mga Saksi ni Jehova kon bala saulugon nila ang isa ka selebrasyon. a

•   Ang selebrasyon bala wala nabase sa panudlo sang Biblia?

   Prinsipio sa Biblia: “‘Maggua kamo sa tunga nila, kag magbulag kamo,’ siling ni Jehova, ‘kag untati ninyo ang pagtandog sa indi matinlo nga butang.’”—2 Corinto 6:15-17.

   Para makabulag sing bug-os sa mga panudlo nga indi matinlo, ukon nagakontra sa ginasiling sang Biblia, wala nagasaulog ang mga Saksi ni Jehova sang mga selebrasyon nga nagalakip sang masunod.

   Mga selebrasyon nga nabase sa pagpati ukon pagsimba sa iban nga dios. Si Jesus nagsiling: “Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.” (Mateo 4:10) Ginasunod ini sang mga Saksi ni Jehova, gani wala sila nagasaulog sang Krismas, Easter, ukon May Day, kay ini nga mga selebrasyon nabase sa pagsimba sa mga dios kag indi kay Jehova. Dugang pa, wala man sila nagaentra sa mga selebrasyon pareho sang masunod.

  •  Kwanzaa. Ang ngalan nga Kwanzaa “naghalin sa Swahili nga tinaga nga matunda ya kwanza, nga buot silingon ‘una nga bunga’ kag ginapakita [sini] nga ang ginhalinan sini nga selebrasyon amo ang mga selebrasyon sang una parte sa una nga ani sa kasaysayan sang Africa.” (Encyclopedia of Black Studies) Bisan pa ginatamod sang iban ang Kwanzaa nga isa ka selebrasyon nga wala labot sa relihion, ang Encyclopedia of African Religion nagkumparar sini sa kapiestahan sa Africa diin ang una nga mga bunga “ginahalad sa mga dios kag sa patay na nga mga katigulangan bilang pagpasalamat sa ila,” nagsiling pa ini: “Ang paghalad sa mga dios kag pagpasalamat sa ila mga katigulangan ginsunod man sang African-American nga selebrasyon nga Kwanzaa.”

  •  Mid-Autumn Festival. Isa ini ka “kapiestahan nga nagapadungog sa diosa sang bulan.” (Holidays, Festivals, and Celebrations of the World Dictionary) Nalakip sa sini ang ritwal diin “nagayaub ang mga babayi, nga ginatawag sa Chinese nga kowtow, sa diosa.”—Religions of the World—A Comprehensive Encyclopedia of Beliefs and Practices.

  •  Nauruz (Nowruz). “Ang pila sa pinakauna nga ginhalinan sini nga kapiestahan amo ang Zoroastrianism, nga amo ang pinakabalaan nga mga adlaw sa dumaan nga kalendaryo sang Zoroastrian. . . . Halimbawa, ang Spirit of Noon, nga ginatawag nga [Rapithwin], nga ginapatihan nga gintapok sa idalom sang duta sang Spirit of Winter sa tion sang tigtulugnaw, ginaabiabi liwat paagi sa pagselebrar sini sa udto nga adlaw sang Nowruz suno sa Zoroastrian nga tradisyon.”—United Nations Educational, Scientific and Cultural Organization.

  •  Shab-e Yalda. Ini nga selebrasyon sa winter solstice “may labot gid sa pagsimba kay Mithra,” ang dios sang kasanag, suno sa libro nga Sufism in the Secret History of Persia. Ginapatihan man nga ini nga selebrasyon mahimo nga may labot sa pagsimba sa mga dios sang mga Romano kag Griego. b

  •  Thanksgiving. Pareho sa Kwanzaa, ini nga selebrasyon naghalin sa dumaan nga mga selebrasyon parte sa ani nga nagapadungog sa sarisari nga dios. Pagligad sang tion, “ining dumaan nga tradisyon ginsunod man sang Cristiano nga mga relihion.”—A Great and Godly Adventure—The Pilgrims and the Myth of the First Thanksgiving.

   Mga selebrasyon nga nabase sa disparatis ukon sa pagpati sa suerte. Ang Biblia nagasiling nga ang “mga nagahanda sing lamesa para sa dios sang Suerte” ‘lakip sa mga nagasikway kay Jehova.’ (Isaias 65:11) Gani, ang mga Saksi ni Jehova wala nagasaulog sang mga selebrasyon pareho sang masunod:

  •  Ivan Kupala. “Ang mga tawo nagapati nga sa tion sang [Ivan Kupala], nagapagua ang mga tinuga sing madamo nga gahom, kag kon maisog kag suerte ka, makakuha ka sing bahin sina nga gahom,” siling sang libro nga The A to Z of Belarus. Sang una, isa ini ka pagano nga selebrasyon para saulugon ang summer solstice. Pero, siling sang Encyclopedia of Contemporary Russian Culture, “ginsamo ini sa selebrasyon sang Simbahan [ang “saint’s day” of John the Baptist] sang ginbaton sang mga pagano ang panudlo sang Cristianismo.”

  •  Lunar New Year (Chinese New Year ukon Korean New Year). “Sa sining tion sang tuig, ginaselebrar sang mga pamilya kag mga mag-abyan ini nga okasyon para ipakita ang ila respeto sa mga dios kag mga espiritu kag para suertehon sila sa masunod nga tuig.” (Mooncakes and Hungry Ghosts—Festivals of China) Amo man ang Korean New Year, “nagalakip ini sang pagsimba sa katigulangan, mga ritwal para tabugon ang malain nga mga espiritu kag para suertehon sa masunod nga tuig, kag pagpamakot para mahibaluan kon ano ang matabo sa masunod nga tuig.”—Encyclopedia of New Year’s Holidays Worldwide.

   Mga selebrasyon nga nabase sa pagpati nga ang kalag imortal. Ang Biblia maathag nga nagasiling nga ang kalag mapatay. (Ezequiel 18:4) Gani, ang mga Saksi ni Jehova wala nagasaulog sang mga selebrasyon nga makita sa ubos, nga nagapati nga ang kalag indi mapatay:

  •  Piesta Minatay (Adlaw sang mga Patay). Adlaw ini para “dumdumon ang tanan nga napatay,” suno sa New Catholic Encyclopedia. “Sugod sang 500 C.E. asta sang mga 1500 C.E., madamo ang nagapati nga ang mga kalag sa purgatoryo mapakita sa sini nga adlaw bilang isa ka murto, aswang, paka, kag iban pa, sa mga tawo nga nakasala sa ila sang buhi pa sila.”

  •  Qingming Festival (Ch’ing Ming) kag Hungry Ghost Festival. Ginahiwat ining duha ka kapiestahan para padunggan ang napatay nga katigulangan. Sa tion sang Ch’ing Ming, siling sang libro nga Celebrating Life Customs Around the World—From Baby Showers to Funerals, “ginasunog ang pagkaon, ilimnon, kag papelon nga kuarta para siguraduhon nga indi magutman ukon uhawon ang napatay kag may bastante sia nga kuarta.” Nagsiling man ang libro nga “sa tion sang Hungry Ghost Month, ilabi na sa gab-i nga bilog ang bulan, [nagapati ang mga nagaselebrar] nga mas makakomunikar ang mga patay kag mga buhi sa sini nga tion sangsa iban nga gab-i, gani importante nga pahamut-an ang mga patay kag padunggan ang napatay nga katigulangan.”

  •  Chuseok. Ini nga kapiestahan, siling sang The Korean Tradition of Religion, Society, and Ethics, nagalakip sang “paghalad sing pagkaon kag alak sa mga kalag sang mga napatay.” Ginapakita sang ila paghalad nga “nagapati sila nga ang kalag padayon nga nagakabuhi bisan pa patay na ang lawas.”

   Mga selebrasyon nga may labot sa espiritismo. Ang Biblia nagasiling: “Bisan sin-o sa inyo nga . . . nagapamakot, nagahimo sing madyik, nagapamakot pasad sa mga panimad-on, babaylan, nagapanglumay, nagadangop sa espiritista ukon sa manugpakot sing mga hitabo, ukon bisan sin-o nga nagapamangkot sa patay . . . makangilil-ad kay Jehova.” (Deuteronomio 18:10-12) Para makalikaw sa bisan ano nga klase sang espiritismo—lakip ang astrolohiya (isa ka klase sang pagpamakot)—ang mga Saksi ni Jehova wala nagasaulog sang Halloween ukon sang masunod nga mga selebrasyon:

  •  Sinhala kag Tamil New Year. “Ang kinaandan nga ritwal sa sini nga selebrasyon . . . nagalakip sang paghimo sang pila ka hilikuton sa isa ka partikular nga tion nga ginapatihan sang mga astrologo nga makahatag sing suerte.”—Encyclopedia of Sri Lanka.

  •  Songkran. Ang ngalan sining kapiestahan sa Asia “naghalin sa Sanskrit nga tinaga . . . nga buot silingon ‘paghulag’ ukon ‘pagbag-o,’ kag [ang kapiestahan] palatandaan nga naghulag ang adlaw pakadto sa konstelasyon sang Aries.”—Food, Feasts, and Faith—An Encyclopedia of Food Culture in World Religions.

   Mga selebrasyon nga may labot sa pagsimba nga ginapatuman sang Kasuguan nga ginhatag kay Moises nga natapos na paagi sa halad ni Jesus. Ang Biblia nagasiling: “Ang Cristo amo ang katapusan sang Kasuguan.” (Roma 10:4) Ang mga Cristiano makabenepisyo gihapon sa mga prinsipio halin sa Kasuguan nga ginhatag kay Moises para sa Israel sang una. Pero, wala nila ginasaulog ang mga kapiestahan sini, ilabi na ang mga kapiestahan nga nagalandong sa Mesias nga ginapatihan sang mga Cristiano nga nag-abot na. “Ini nga mga butang landong sang mga butang nga magaabot,” siling sang Biblia, “apang ang katunayan amo ang Cristo.” (Colosas 2:17) Base sa sini, kag bangod ang pila ka kapiestahan may mga kustombre nga wala nabase sa Biblia, ang mga kapiestahan sa ubos wala ginasaulog sang mga Saksi ni Jehova:

  •  Hanukkah. Ginasaulog sa sini nga kapiestahan ang pagdedikar liwat sang templo sang mga Judiyo sa Jerusalem. Pero ang Biblia nagasiling nga si Jesus nangin Mataas nga Saserdote nga “mas daku kag mas himpit nga tolda [ukon, templo] nga wala ginhimo sang mga kamot sang tawo, kon sayuron, indi sa sini nga tinuga.” (Hebreo 9:11) Para sa mga Cristiano, ginbuslan sinang espirituwal nga templo ang literal nga templo sa Jerusalem.

  •  Rosh Hashanah. Amo ini ang una nga adlaw sang tuig sang mga Judiyo. Sang una, ginahimo sa sini nga kapiestahan ang pinasahi nga paghalad sa Dios. (Numeros 29:1-6) Pero paagi kay Jesucristo, bilang Mesias, ‘nauntat na ang paghalad sing mga sapat kag sing mga dulot,’ kag wala na ini ginabaton sang Dios.—Daniel 9:26, 27.

•   Ang selebrasyon bala isa ka interfaith?

   Prinsipio sa Biblia: “Paano magkapareho ang tumuluo nga tawo kag ang indi tumuluo? Kag paano maghisantuanay ang templo sang Dios kag mga diosdios?”—2 Corinto 6:15-17.

   Ang mga Saksi ni Jehova nagatinguha gid nga mangin mahidaiton sa ila mga kaingod kag ginarespeto nila ang kinamatarong sang kada tawo sa pagpili sang iya patihan, pero ginalikawan nila ang mga selebrasyon nga may labot sa interfaith pareho sang masunod.

   Mga selebrasyon sang relihion ukon pagtilipon nga nagapalig-on sang paghiusa sa pagsimba sang mga tawo halin sa sarisari nga relihion. Sang gingiyahan sang Dios ang iya katawhan sang una sa bag-o nga duta diin ang mga pumuluyo sini may lain nga relihion, ginsilingan niya sila: “Indi kamo dapat maghimo sing katipan sa ila ukon sa ila mga dios. . . . Kon mag-alagad kamo sa ila mga dios, mangin siod gid ini sa inyo.” (Exodo 23:32, 33) Gani ang mga Saksi ni Jehova wala nagaentra sa mga selebrasyon pareho sang masunod.

  •  Loy Krathong. Sa sining kapiestahan sa Thailand, “ang mga tawo nagahimo sang yahongyahong nga dahon, kag ginabutangan nila ini sang mga kandila ukon lipak sang incienso, kag ginapalutaw ini sa tubig. Nagapati sila nga ginaanod sini ang malas. Pero ang matuod, ginadumdom sini nga kapiestahan ang balaan nga agi sang tiil ni Buddha.”—Encyclopedia of Buddhism.

  •  National Repentance Day. Ang mga nagaselebrar sini nga okasyon “nagaugyon sa sadsaran nga pagpati sang mga Cristiano,” siling sang opisyal sang gobierno nga mabasa sa The National, isa ka newspaper sa Papua New Guinea. Nagsiling sia nga ang pagsaulog sini “nagapalig-on sang Cristianong prinsipio sa pungsod.”

  •  Vesak. “Amo ini ang pinakabalaan nga adlaw sang mga Budhista. Ginasaulog nila ang pagkatawo, kasanagan, kag pagkapatay ni Buddha, ukon paglab-ot sa Nirvana.”—Holidays, Festivals, and Celebrations of the World Dictionary.

   Mga selebrasyon nga nabase sa mga tradisyon sang relihion nga wala ginatudlo sang Biblia. Ginsilingan ni Jesus ang mga lider sang relihion: “Ginhimo ninyo nga wala sing pulos ang pulong sang Dios bangod sang inyo tradisyon.” Nagsiling man sia nga ang ila pagsimba wala sing pulos kay “ang ila mga panudlo mga sugo lamang sang mga tawo.” (Mateo 15:6, 9) Ginasunod gid ini sang mga Saksi ni Jehova, gani madamo nga selebrasyon nga may labot sa relihion ang wala nila ginasaulog.

  •  Epiphany (Three Kings’ Day, Timkat, ukon Los Reyes Magos). Ginadumdom nila sa sini nga selebrasyon ang pagbisita sang mga astrologo kay Jesus ukon ang pagbawtismo kay Jesus. Sa sini nga kapiestahan “ginbaton sang Cristiano ang pila ka pagano nga mga kapiestahan sa tion sang tigpamulak, nga nagapadungog sa mga dios sang nagailig nga tubig, suba, kag sapa.” (The Christmas Encyclopedia) Ang isa pa ka kapiestahan nga pareho man sini amo ang Timkat, nga “naghalin sa mga tradisyon.”—Encyclopedia of Society and Culture in the Ancient World.

  •  Feast of the Assumption of the Virgin Mary. Ini nga kapiestahan nagapati nga ang iloy ni Jesus nagkayab sa langit sa iya pisikal nga lawas. “Ini nga pagpati,” siling sang Religion and Society—Encyclopedia of Fundamentalism, “wala gid nahibaluan sang una nga mga Cristiano kag indi ini mabasa sa Kasulatan.”

  •  Piesta sang Immaculate Conception. “Ang Immaculate Conception [ni Maria] wala ginatudlo sa Kasulatan . . . panudlo [ini] sang Simbahan.”—New Catholic Encyclopedia.

  •  Semana Santa. Ining tion sang penitensia kag pagpuasa, suno sa New Catholic Encyclopedia, ginsugdan sang “ikap-at nga siglo,” sobra 200 ka tuig na nga natapos ang Biblia. Parte sa una nga adlaw sang Semana Santa, ang encyclopedia nagsiling: “Ang ginahimo sang mga tawo nga magpalamhit sing abo sa Mierkules Badlis ginahimo na sugod pa sang Synod of Benevento sang 1091.”

  •  Meskel (ukon, Maskal). Sa sini nga kapiestahan sang mga Etiopianhon, ginasaulog nila “ang pagkakita sang Matuod nga Krus (ang krus diin ginlansang ang Cristo), paagi sa pagdabok kag pagsaot sa palibot sini,” siling sang Encyclopedia of Society and Culture in the Medieval World. Pero, ang mga Saksi ni Jehova wala nagagamit sing krus sa ila pagsimba.

•   Ang selebrasyon bala nagapadungog sa isa ka tawo, organisasyon, ukon pungsod?

   Prinsipio sa Biblia: “Amo ini ang ginasiling ni Jehova: ‘Pakamalauton ang tawo nga nagasalig sa mga tawo lang, nga nagasalig sa kusog sang tawo, kag ang iya tagipusuon nagapalayo kay Jehova.’”—Jeremias 17:5.

   Ginaapresyar sang mga Saksi ni Jehova ang ila isigkatawo kag nagapangamuyo pa gani sila para sa iban, pero wala sila nagaentra sa mga pagtilipon ukon mga selebrasyon nga pareho sa masunod:

   Mga selebrasyon nga nagapadungog sa isa ka manuggahom ukon kilala nga tawo. “Para sa inyo kaayuhan,” siling sang Biblia, “indi kamo magsalig sa tawo, nga ginhawa lamang sa iya ilong, kay ngaa hatagan mo sia sing kabilinggan?” (Isaias 2:22) Amo kon ngaa wala nagaselebrar ang mga Saksi ni Jehova sang birthday sang hari ukon rayna.

   Mga selebrasyon nga may labot sa bandera sang pungsod. Ang mga Saksi ni Jehova wala nagaselebrar sang Flag Day. Ngaa? Kay ang Biblia nagsiling: “Magbantay kamo batok sa mga diosdios.” (1 Juan 5:21) May mga nagasiling nga ang bandera indi diosdios nga ginasimba, pero ang nagatuon sa kasaysayan nga si Carlton J. H. Hayes nagsulat: “Ang panguna nga simbulo sang pagtuo kag panguna nga ginasimba sa nasyonalismo amo ang bandera.”

   Mga selebrasyon nga nagapadungog sa isa ka santo. Ano ang natabo sang ang tawo nga mahinadlukon sa Dios nagyaub kay apostol Pedro? Ang Biblia nagasiling: “Ginpatindog sia ni Pedro kag ginsilingan: ‘Tindog ka; tawo man lang ako.’” (Binuhatan 10:25, 26) Wala ginbaton ni Pedro ukon sang bisan sin-o nga apostoles ang pinasahi nga pagpadungog ukon pagsimba, gani wala nagaentra ang mga Saksi ni Jehova sa mga selebrasyon nga nagapadungog sa ginakabig sang iban nga mga santo, pareho sang masunod:

  •  Todos Los Santos. “Kapiestahan nga nagapadungog sa tanan nga santo . . . Indi mahibaluan kon diin naghalin ini nga kapiestahan.”—New Catholic Encyclopedia.

  •  Fiesta of Our Lady of Guadalupe. Ini nga kapiestahan nagapadungog sa “patron sang Mexico,” nga ginapatihan sang pila nga si Maria, nga iloy ni Jesus. Nagapati ang iban nga nagpakita si Maria sa isa ka mangunguma sang 1531.—The Greenwood Encyclopedia of Latino Literature.

  •  Name Day. “Ang name day amo ang adlaw sang kapiestahan sang santo sa diin ginkuha ang ngalan sang bata sang ginbunyagan sia ukon sang pagkumpirmar sa iya,” siling sang libro nga Celebrating Life Customs Around the World—From Baby Showers to Funerals. Nagsiling pa ini nga, “ang ginahimo sang mga tawo sa sini nga adlaw may labot sa relihion.”

   Mga selebrasyon nga may labot sa pulitika ukon mga protesta. “Mas maayo ang magdangop kay Jehova,” siling sang Biblia, “sangsa magsalig sa mga tawo.” (Salmo 118:8, 9) Para mapakita sang mga Saksi ni Jehova nga ang ila pagsalig ara sa Dios kag indi sa tawo sa pagsolbar sang mga problema sang kalibutan, wala sila nagaentra sa Youth Day ukon Women’s Day nga mga selebrasyon nga nagasuporta sa mga kampanya para sa pulitika ukon sa komunidad. Amo man ini ang rason kon ngaa wala sila nagaentra sa Emancipation Day ukon pareho sini nga mga selebrasyon. Sa baylo, nagasalig sila nga ang Ginharian sang Dios ang makasolbar sa problema sa diskriminasyon sa rasa kag indi pag-alalangay.—Roma 2:11; 8:21.

•   Ang selebrasyon bala nagapakataas sa isa ka pungsod ukon grupo?

   Prinsipio sa Biblia: “Ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.”—Binuhatan 10:34, 35.

   Bisan pa madamo nga Saksi ni Jehova ang nanamian sa ila natawhan nga pungsod, wala sila nagaentra sa mga selebrasyon nga nagapakataas sa mga pungsod ukon mga grupo pareho sang masunod.

   Mga selebrasyon nga nagapadungog sa mga soldado. Imbes magpalig-on sing inaway, si Jesus nagsiling sa iya mga sumulunod: “Padayon nga higugmaa ang inyo mga kaaway kag padayon nga ipangamuyo ang mga nagahingabot sa inyo.” (Mateo 5:44) Gani, ang mga Saksi ni Jehova wala nagapakigbahin sa mga selebrasyon nga nagapadungog sa mga soldado, lakip na ang masunod:

  •  Anzac Day. “Ang Anzac nagakahulugan sang Australian and New Zealand Army Corps,” kag “sang ulihi ang Anzac Day nangin adlaw sa pagdumdom sang mga napatay sa inaway.”—Historical Dictionary of Australia.

  •  Veterans Day (Remembrance Day, Remembrance Sunday, ukon Memorial Day). Ini nga mga selebrasyon nagapadungog sa “mga beterano nga mga soldado kag sa mga napatay sa mga inaway sang ila pungsod.”—Encyclopædia Britannica.

   Pagselebrar sang kasaysayan ukon kahilwayan sang pungsod. Parte sa iya mga sumulunod, si Jesus nagsiling: “Indi sila bahin sang kalibutan, subong nga ako indi bahin sang kalibutan.” (Juan 17:16) Bisan pa gusto nila mahibaluan ang parte sa kasaysayan sang isa ka pungsod, ang mga Saksi ni Jehova wala nagapakigbahin sa masunod:

  •  Australia Day. Suno sa Worldmark Encyclopedia of Cultures and Daily Life, ini nga selebrasyon nagadumdom “sa adlaw sang 1788 sang ginwagayway sang mga soldado sang England ang ila bandera kag gindeklarar ang Australia bilang bag-o nga kolonya.”

  •  Guy Fawkes Day. Ini ang “adlaw nga ginaselebrar kag ginadumdom sang pungsod ang napaslawan nga plano ni Guy Fawkes kag sang iban pa nga Katoliko nga patyon si Hari James I kag ang iban pa nga miembro sang gobierno [sang England] sang 1605.”—A Dictionary of English Folklore.

  •  Independence Day. Sa madamo nga lugar, ini ang “adlaw sa pagselebrar sang anibersaryo sang pagkahilway sang ila pungsod sa pagsakop sang iban nga pungsod.”—Merriam-Webster’s Unabridged Dictionary.

•   Imoral ukon nagapinagusto lang bala ang ginahimo sa selebrasyon?

   Prinsipio sa Biblia: “Tuman na ang panahon nga ginhimo ninyo ang kabubut-on sang mga pungsod sang nagahimo kamo sang matampalason nga mga paggawi, indi mapunggan nga mga kailigbon, sobra nga pag-inom, magansal nga kinalipay, paindisanay sa pag-inom, kag makangilil-ad nga pagsimba sa mga diosdios.”—1 Pedro 4:3.

   Bilang pagsunod sa sini nga prinsipio, ang mga Saksi ni Jehova wala nagaentra sa mga selebrasyon nga may pagpahubog kag magansal. Nalipay ang mga Saksi ni Jehova makig-upod sa ila mga abyan kag mahimo sila mag-inom sing alkoholiko nga ilimnon sing haganhagan lang. Ginapanikasugan nila nga sundon ini nga laygay sang Biblia: “Bisan nagakaon kamo ukon nagainom ukon bisan ano ang inyo ginahimo, himua ang tanan para sa himaya sang Dios.”—1 Corinto 10:31.

   Gani, ang mga Saksi ni Jehova wala nagaentra sa mga karnabal ukon mga kapiestahan nga nagapakita sing indi maayo nga paggawi nga ginadumilian sa Biblia. Lakip na diri ang kapiestahan sang mga Judiyo nga Purim. Pagdumdom ini sang kahilwayan sang mga Judiyo sang ikalima nga siglo B.C.E., pero subong masiling nga amo ini ang “Judiyo nga bersion sang Mardi Gras ukon Carnival,” siling sang libro nga Essential Judaism. Madamo nga nagapakigbahin sa sini ang “nagakostyum (ang mga lalaki nagasuksok sing pangbabayi nga bayo), mga wala sing kontrol sa kaugalingon, nagapahubog, kag nagaginahod.”

 Huo. Ang Biblia nagatudlo sa mga tawo nga palanggaon kag respetuhon ang tanan nga miembro sang ila pamilya bisan ano man ang ila ginatuohan. (1 Pedro 3:1, 2, 7) Siempre, kon ang isa sa mga Saksi ni Jehova wala na nagapakigbahin sa pila ka selebrasyon, mahimo magbatyag ang iya mga paryente sing kalain sing buot, masakitan, ukon magbatyag pa gani sila nga gintraidoran sila. Gani, madamo sa mga Saksi ni Jehova ang nagatinguha gid nga ipabatyag sa ila mga paryente ang ila pagpalangga, nga ipaathag sa ila sing mahinalungon ang mga rason sa ila mga desisyon, kag ginabisita nila ang ila pamilya sa iban nga mga okasyon.

 Wala. Nagapati sila nga ang kada isa dapat maghimo sang iya kaugalingon nga desisyon. (Josue 24:15) Ang mga Saksi ni Jehova ‘nagapadungog sa tanan nga sahi sang tawo,’ bisan ano man ang ila mga ginapatihan.—1 Pedro 2:17.