1. Davi xav li cas txog Yehauvas, thiab qhov no txhawb tau nws ua dabtsi?

VAJNTXWV DAVI sau tias: “[Yehauvas], loj kawg nkaus, tsim nyog qhuas nws heev kawg.” (Ntawv Nkauj 145:3) Davi hlub Yehauvas heev nws thiaj kub siab lug qhuas Vajtswv “rau thaum ib tsoom neeg tuaj txoos ua ke.” (Ntawv Nkauj 22:22; 40:5) Koj los yeej hlub Yehauvas ib yam li Davi thiab, puas yog? Tej zaum koj yuav xav ib yam li nws hais no: “Au [Yehauvas] uas yog peb yawg koob Yixayee tus Vajtswv, thov qhuas koj mus ib txhiab ib txhis mus tsis kawg li.”​—1 Vaj Keeb Kwm 29:10-13.

2. (1) Peb qhuas Yehauvas li cas? (2) Nyuaj heev rau ib txhia ua dabtsi, thiab peb yuav kawm txog dabtsi?

² Ib qho uas peb qhuas Yehauvas yog qhov uas peb tsa tes teb thaum mus kev sib txoos. Tiamsis nyuaj heev rau peb cov kwvtij nkauj muam ib txhia tsa tes teb. Yog vim li cas? Lawv yeej xav teb heev, tiamsis lawv ho ntshai thiab. Yuav ua li cas lawv thiaj tsis ntshai? Peb txhua tus yuav teb li cas thiaj txhawb tau lwm tus lub zog? Ua ntej peb teb cov lus nug no cia peb kawm txog 4 yam seb yog vim li cas peb thiaj tsa tes teb thaum mus kev sib txoos.

3-5. (1) Raws li Henplais 13:15, vim li cas peb thiaj teb thaum peb mus kev sib txoos? (2) Puas yog peb txhua tus yuav tsum txawj teb ib yam nkaus? Piav seb.

³ Qhov uas qhuas Yehauvas yog ib qho koob hmoov. (Ntawv Nkauj 119:108) Thaum peb teb kuj yog “peb muab tej lus qhuas ua yam uas xyeem rau Vajtswv.” Lwm tus xyeem tsis  tau rau peb. (Nyeem Henplais 13:15.) Yehauvas puas tseev kom peb txhua tus xyeem tau tej lus qhuas lossis teb tau ib yam nkaus? Yehauvas yeej tsis ua li ntawd!

⁴ Yehauvas paub tias peb txhua tus nyias muaj nyias peevxwm. Peb muab tau li cas rau nws, nws yeej saib yam ntawd rau nqe. Xav txog tej yam uas nws hais kom cov Yixayee coj tuaj xyeem rau nws. Cov Yixayee ib txhia coj yaj coj tshis tuaj xyeem rau Yehauvas. Tiamsis tus txom nyem kuj coj tau “ob tug nquab taug lossis ob tug rhaws nquab nyeg” tuaj xyeem. Yog nws yuav tsis taus 2 tug noog los Yehauvas hais tias nws coj “ib feem kaum hauv ib efa hmoov mog zoo zoo tuaj xyeem” los tau thiab. (Levi Tej Kevcai 5:7, 11) Hmoov mog tsis raug nqe npaum tej tsiaj los tsuav yog nws coj cov “mog zoo zoo” xwb ces Yehauvas yeej saib yam ntawd rau nqe ib yam nkaus.

⁵ Peb tus Vajtswv Yehauvas tseem siab zoo ib yam li thaud. Niaj hnub no thaum peb tsa tes teb, Yehauvas tsis tseev kom peb txawj hais lus cuag li Apaulau lossis txawj yaum neeg cuag li Povlauj. (Tubtxib Tes Haujlwm 18:24; 19:8) Yehauvas xav kom peb teb li peb txawj xwb. Nco ntsoov tus poj ntsuam uas tso tau 2 lub nyiaj rau hauv lub phij xab tso nyiaj. Yehauvas txaus siab heev rau nws vim nws muab npaum li nws muab tau rau Yehauvas.​—Luka 21:1-4.

6. (1) Raws li Henplais 10:24, 25, thaum peb hnov lwm tus tej lus teb pab tau peb li cas? (2) Peb yuav ua li cas lawv thiaj paub tias peb zoo siab rau lawv cov lus teb?

⁶ Thaum peb tsa tes teb, peb ib leeg yuav txhawb tau ib leeg. (Nyeem Henplais 10:24, 25.) Peb yeej zoo siab heev thaum peb hnov ib leeg teb ib yam. Thaum cov menyuam teb ib ob los xwb los yeej ua rau peb zoo siab heev. Thaum peb hnov ib tug teb kub siab lug txog tej nws nyuam qhuav kawm tau yeej txhawb tau peb zog heev. Thiab thaum peb pom cov uas txaj muag lossis cov uas los kawm peb cov lus ua “siab tuab” tsa tes teb kuj ua rau peb muaj siab tuab ib yam thiab. (1 Thexalaunika 2:2) Peb yuav ua li cas lawv thiaj paub tias peb zoo siab rau lawv cov lus teb? Tom qab kev sib txoos tas, cia li mus ua lawv tsaug. Tsis tas li ntawd xwb, peb kuj nrog lawv tsa tes teb thiab. Yog peb ua li no ces peb sawvdaws ib leeg yuav txhawb tau ib leeg.​—Loos 1:11, 12.

7. Thaum peb tsa tes teb pab tau peb li cas?

 ⁷ Thaum peb tsa tes teb kuj pab tau peb thiab. (Yaxaya 48:17) Pab tau peb li cas? Thawj yam, yog peb npaj tsa tes teb ces yuav ua rau peb kub siab lug npaj rau cov kev sib txoos. Thaum peb kub siab lug npaj rau cov kev sib txoos ces peb yuav to taub Vajtswv Txojlus zoo dua. Thaum peb to taub Vajtswv Txojlus zoo ces peb yuav paub muab coj los siv ua neej. Yam 2, yog peb tsa tes teb ces peb yuav nyiam cov kev sib txoos dua. Yam 3, yog peb siv zog npaj tej lus teb ces txawm ntev tom qab kev sib txoos los peb tseem nco tau tej lus ntawd rau nruab siab.

8-9. (1) Raws li Malakhi 3:16, Yehauvas xav li cas thaum peb tsa tes teb? (2) Ib txhia ntshai ua dabtsi?

⁸ Thaum peb tsa tes teb ua rau Yehauvas zoo siab heev. Yehauvas yeej mloog ntsoov peb tej lus teb tom kev sib txoos. Nws zoo siab tias peb siv zog npaj tsa tes teb. (Nyeem Malakhi 3:16.) Yehauvas yeej pom thiab foom koob hmoov rau peb thaum peb siv zog ua kom haum nws siab.​—Malakhi 3:10.

⁹ Raws li peb tau kawm no, yeej zoo rau peb tsa tes teb. Txawm li ntawd los, ib txhia tseem ntshai heev. Yog koj ntshai, tsis txhob cia qhov ntawd ua rau koj qaug zog. Cia peb kawm ob peb lub hauv paus ntsiab lus hauv phau Vajlugkub, ob peb tug qauv, thiab lwm yam uas yuav pab tau peb txhua tus kub siab lug tsa tes teb.

10. (1) Peb feem coob yeej ntshai ua dabtsi? (2) Vim li cas qhov uas koj ntshai teb yog ib qho zoo?

¹⁰ Koj puas ntshai tsa tes teb? Tej zaum koj twb tsis tau tsa tes koj plab twb qaub tag lawm. Tsis yog koj tib leeg xwb thiaj ntshai. Peb feem coob los yeej ntshai tsa tes teb thiab. Yuav kom koj tsis ntshai, koj yuav tau ua zoo xav seb yog vim li cas koj thiaj ntshai. Puas yog koj ntshai tsam koj hais yuam kev? Lossis tsam koj nco tsis tau koj cov lus teb? Los puas yog koj ntshai tsam koj teb tsis tau zoo li lwm tus? Yog koj ntshai li no, yeej yog ib qho zoo. Vim li cas thiaj hais tias zoo? Vim  tias qhov no qhia tias koj txo hwjchim thiab xam pom lwm tus zoo dua koj. Yehauvas yeej xav kom koj ua neeg txo hwjchim. (Ntawv Nkauj 138:6; Filipi 2:3) Tiamsis Yehauvas kuj xav kom koj qhuas nws thiab txhawb koj cov kwvtij nkauj muam thaum koj mus tej kev sib txoos thiab. (1 Thexalaunika 5:11) Yehauvas hlub koj heev thiab yeej yuav pab koj ua taus siab loj siab tuab.

11. Tej nqe Vajlugkub twg yuav pab tau peb?

¹¹ Cia peb kawm txog ob peb nqes Vajlugkub. Phau Vajlugkub qhia tias peb txhua tus yog neeg txhaum thiab yeej yuav hais lus yuam kev. (Yakaunpau 3:2) Yehauvas yeej tsis tseev kom peb teb tau zoo zoo peb mam teb. Peb cov kwvtij nkauj muam los kuj tsis xav li ntawd thiab. (Ntawv Nkauj 103:12-14) Lawv yeej hlub peb heev vim peb sawvdaws yog tib tse neeg xwb. (Malakau 10:29, 30; Yauhas 13:35) Lawv paub tias muaj tej zaum peb yuav teb tsis tau raws li peb siab xav.

12-13. Nehemi thiab Yauna nkawd 2 tug qauv qhia tau li cas rau peb?

¹² Xav seb tej qauv hauv phau Vajlugkub twg yuav pab tau koj tsis ntshai. Cia peb kawm txog Nehemi. Nws ua haujlwm rau hauv ib tug vajntxwv uas muaj hwjchim loj lub tsev. Thaum Nehemi hnov tias Yeluxalees lub ntsa loog tseem pob tag kho tsis tau tiav ua rau nws nyuaj siab heev. (Nehemi 1:1-4) Thaum vajntxwv pom nws ua ntsej muag mluas mlob, vajntxwv txawm nug tias ua cas rau nws lawm. Ntshe Nehemi ntshai heev thiab tsis paub xyov yuav teb li cas. Tiamsis nws thov kiag Yehauvas mam teb vajntxwv. Ua li cas xwb? Vajntxwv kuj ua ntau yam los pab Yehauvas cov tibneeg. (Nehemi 2:1-8) Peb kuj xyaum tau Yauna tus qauv thiab. Thaum Yehauvas txib nws mus ceeb toom cov neeg Ninave, Yauna ntshai heev nws txawm sawv tsees khiav mus rau lwm qhov lawm. (Yauna 1:1-3) Tiamsis vim Yehauvas pab Yauna, Yauna thiaj ua tau siab loj siab tuab mus tshaj tawm rau cov neeg Ninave. Yauna tej lus ceeb toom pab tau lawv tso lawv tej kev phem tseg. (Yauna 3:5-10) Ob tug qauv no qhia tau li cas rau peb? Nehemi tus qauv qhia rau peb tias peb yuav tsum thov Yehauvas ua ntej peb tsa tes teb. Yauna tus qauv qhia rau peb tias txawm peb ntshai npaum li cas los Yehauvas yeej yuav pab kom peb teev tiam tau Nws. Yeej tsis muaj ib lub koom txoos twg yuav txaus ntshai npaum li cov neeg Ninave, puas yog?

¹³ Puas muaj lwm yam uas yuav pab tau peb txawj teb kom txhawb tau lwm tus lub zog? Cia peb kawm seb.

14. Vim li cas peb yuav tau npaj zoo zoo rau cov kev sib txoos thiab peb yuav npaj rau thaum twg?

¹⁴ Npaj rau txhua txojkev sib txoos. Yog koj npaj ua ntej thiab ua tib zoo npaj zoo zoo ces koj yuav tsis ntshai tsa tes teb. (Paj Lug  21:5) Peb txhua tus nyias yuav npaj thaum twg los nyob ntawm nyias. Ib tug poj ntsuam laus laus uas twb muaj 80 tawm xyoo niaj lim tiam npaj nws Phau Tsom Faj kom ntxov. Nws hais tias: “Kuv mloog tau zoo dua thaum kuv npaj ua ntej.” Ib tug muam uas ua haujlwm 5 hnub ho npaj Phau Tsom Faj hnub ua ntej yuav mus kev sib txoos. Nws hais tias: “Kuv ua li no kuv thiaj nco ntsoov tej uas kuv kawm.” Kuj muaj ib tug txwj laus uas yog ib tug tho kev uas tsis khoom li hais tias: “Kuv li kuv tsis ua 1 zaug kawm Phau Tsom Faj kom tag tiamsis 1 hnub kuv kawm ob peb nqes xwb.”

15. Yuav npaj li cas rau tej kev sib txoos?

¹⁵ Yuav npaj li cas rau tej kev sib txoos? Txhua zaus koj npaj, thov Yehauvas muab nws lub hwj huam dawb huv rau koj. (Luka 11:13; 1 Yauhas 5:14) Ua ntej koj nyeem ib nqe zuj zus, siv sijhawm mus xyuas seb zaj koj yuav kawm tham txog dabtsi. Mus saib lub ntsiab loj, cov ntsiab me, thiab cov duab. Tom qab ntawd mam mus kawm ib nqes zuj zus thiab yog nyeem tau nyeem tag nrho cov nqe Vajlugkub. Ua tib zoo xav txog tej uas koj nyeem thiab muab tej uas koj xav teb cim cia. Koj yim npaj yim pab tau koj ces yuav yoojyim zuj zus rau koj tsa tes teb.​—2 Khaulee 9:6.

16. Tej twj twg pab tau koj npaj rau cov kev sib txoos, thiab yuav siv tej twj ntawd li cas?

¹⁶ Nruab tej ntaub ntawv rau hauv koj lub twj. Yehauvas siv nws lub koom haum tsim tau tej ntaub ntawv uas muab nruab tau rau hauv twj. Nws ua li no thiaj yoojyim rau peb npaj rau tej kev sib txoos. Yog peb muab JW Library^® nruab rau hauv peb lub twj ntawm tes ces peb yuav theej tau ntaub ntawv los saib los mloog. Yog peb ua li no ces peb mus txog twg los yuav yoojyim rau peb npaj rau cov kev sib txoos. Ib txhia ua li no lawv thiaj tau kawm Vajlugkub tom tsev kawm ntawv, tom chaw ua haujlwm, lossis thaum lawv mus ub mus no. Vim muaj Watchtower LUB VEJ XAIJ TSHAWB NRHIAV VAJLUGKUB thaum peb npaj rau tej kev sib txoos thiaj yoojyim heev rau peb tshawb nrhiav txog tej uas peb xav paub.

17. (1) Vim li cas zoo rau koj npaj ob peb lo lus teb? (2) Zaj yeeb yaj kiab Ua Yehauvas Tus Phoojywg​—Npaj Koj Cov Lus Teb pab tau koj li cas?

¹⁷ Npaj ob peb lo lus teb. Vim li cas? Rau qhov yog muaj coob tus tsa tes teb ces tej zaum tus kwvtij yuav hu tsis txog koj. Thiab yog tsis muaj sijhawm ces tej zaum nws yuav hu tsis thoob txhua tus. Yog nws hu tsis txog koj los txhob tu siab. Tiamsis yog koj npaj ob peb lo lus teb ces txawm ib zaug nws hu tsis txog koj los ib zaug nws yuav hu txog. Koj yuav teb li cas? Tej zaum koj nyeem 1 nqes Vajlugkub xwb los yeej tau. Tiamsis yoj koj  npaj kom teb tau tawm hauv nruab siab tuaj ces hajyam zoo. *

18. Vim li cas yuav tsum tsis txhob teb ntev ntev?

¹⁸ Tsis txhob teb ntev ntev. Tej lus uas txhawb zog tshaj tsis yog tej lus teb ntev ntev. Yog li ntawd, xyaum teb li 30 chib rov hauv xwb. (Paj Lug 10:19; 15:23) Koj puas yog ib tug uas ib txwm nyiam teb thaum mus kev sib txoos? Koj yuav ua tau qauv zoo rau lwm tus xyaum yog koj teb luv luv xwb. Yog koj teb ntev teb ntau ces yuav ua rau lwm tus ntshai teb. Tej zaum lawv yuav txaj muag thiab xav tias lawv tsis txawj teb npaum li koj. Tsis tas li ntawd xwb, yog peb teb luv luv ces yuav muaj sijhawm rau lwm tus teb thiab. Yog tus kwvtij xub hu koj, tsis txhob teb tag nrho nqe ntawd tiamsis tsuas teb kiag lo lus nug xwb. Thaum sawvdaws teb tau lub ntsiab lawd yog koj xav teb lwm yam ntxiv los kuj tau.​—Mus saib lub ntsiab me “ Kuv Yuav Teb Li Cas?”

19. Tus kwvtij uas coj txojkev kawm pab tau koj li cas, tiamsis koj yuav tau ua li cas thiab?

¹⁹ Qhia rau tus kwvtij seb koj xav teb nqe twg. Yog koj xav ua li no ces nco ntsoov hais rau nws paub ua ntej pib kev sib txoos. Thaum txog nqe koj xav teb, cia li tsa kiag tes kom siab tus kwvtij thiaj pom koj txhais tes.

20. Thaum peb tuaj sib txoos ua ke nrog lub koom txoos ua li cas ho zoo ib yam li peb nrog cov phoojywg koom ib tsum mov?

²⁰ Thaum peb mus kev sib txoos kuj zoo ib yam li peb mus koom ib tsum mov nrog peb cov phoojywg. Yog cov kwvtij nkauj muam caw koj mus koom ib tsum mov es lawv xav kom koj nqa mentsis zaub mov mus thiab, koj yuav ua li cas? Txawm koj txhawj los koj yeej yuav npaj kom tau ib qho mus rau sawvdaws noj thiab, puas yog? Yehauvas yog tus uas caw peb mus koom cov kev sib txoos. Nws tau npaj ib tsum uas qab heev tos peb. (Ntawv Nkauj 23:5; Mathai 24:45) Nws zoo siab heev thaum nws pom peb siv zog npaj ib qho me me mus tso rau ntawd thiab. Yog li ntawd, cia li rau siab ntso npaj rau tej kev sib txoos thiab tsa hlo tes teb. Yog koj ua li no ces tsis yog koj tuaj noj Yehauvas rooj mov xwb, tiamsis koj kuj npaj mentsis tuaj pub rau sawvdaws hauv lub koom txoos thiab.