Thaum cov niam txiv nrog tej menyuam hais lus, lawv yuav paub menyuam lub siab thiab menyuam yuav paub lawv lub siab.

Tsis yoojyim rau cov niam txiv nrog cov hluas tham lus. Ib phau ntawv tshawb nrhiav txog tsev neeg hais tias thaum menyuam tseem yau nws qhia txhua yam rau nws niam nws txiv. Tiamsis thaum nws hlob lawd, tej zaum nws yuav zais siab thiab saib nws niam nws txiv zoo li tus qhua lawm xwb. (Breaking the Code) Thaum ib tug menyuam coj li ntawd, tsis yog nws xav ua twm zeej. Lub caij ntawd nws cheem tsum nws niam nws txiv txojkev sib raug zoo heev tshaj.

Yoog koj tus menyuam. Nrhiav lub caij zoo nrog nws tham lus. Muaj tej tug hluas nyiam tham pem tsheej tag hmo. Txawm sab heev los yeej meem siv sijhawm nrog nws tham lus.

Nkauj Lig tau hais tias: “Tej zaum yus xav tias, ‘Ib hnub tav no koj tsis hais ib los li, tsam no koj ho xav tham pem?’ Txawm meem txom los peb yeej xav kom menyuam qhia siab. Peb yuav ua li cas yws lawv?”

Hawj tau hais tias: “Kuv nyiam pw ntxov xwb. Tiamsis thaum kuv nrog kuv cov menyuam tham pem ib tag hmo, lawv qhia siab tshaj.”

VAJLUGKUB TEJ HAUV PAUS NTSIAB LUS: “Tsis txhob cia leejtwg xam pom nws tus kheej, yuav tsum xam pom lwm tus.”​—1 Khaulee 10:24.

Txhob cia lwm yam tab kaum. Ib leej txiv tau hais li no: “Yog kuv nrog menyuam tham es kuv lub siab twb tsis nyob ntawd ces lawv yeej paub tias kuv tsis mloog lawv tham.”

Yog koj coj cwj pwm li leej txiv no tau hais ces xyaum li no: Thaum menyuam los nrog koj tham lus, kaw koj lub xov tooj, this vis, lossis xov tooj cua koj thiaj cuab pob ntseg mloog menyuam hais. Txawm menyuam tej teeb meem tsis loj ua luaj twg los, tsim nyog ua tib zoo mloog lawv hais.

Mos tau hais tias: “Peb yuav tsum ua rau menyuam pom tias peb saib lawv muaj nqes. Yog peb tsis ua li ntawd, lawv yuav tsis kam qhia siab rau peb lawv yuav mus cuag lwm tus.”

Tooj Ntxawg tau hais tias: “Tej zaum koj tus menyuam xav tsis yog li lawm los, txhob cem nws.”

VAJLUGKUB TEJ HAUV PAUS NTSIAB LUS: “Nej yuav tsum ua tib zoo mloog.”​—Luka 8:18.

Nrog menyuam tham thaum neb so. Tej tug menyuam qhia siab dua thaum neb so ua ke uas tsis yog teem caij los tham ua ke.

Maiv Nyiaj tau hais tias: “Thaum tsav tsheb kuv nyiam nrog kuv tus menyuam tham lus. Thaum ntawd zoo sijhawm rau qhov wb tsis yog tham ntsia ntswb ntsoov.”

Thaum noj mov ua ke kuj yog lub caij zoo los tham pem thiab.

Npis tau hais tias: “Thaum peb noj hmo ua ke, peb tham txog tej uas peb tau ntsib hnub ntawd, tsis hais yam zoo yam phem tibsi. Thaum peb tham li ntawd peb thiaj paub sib txhawb. Txawm muaj teeb meem los tsis yog yus ib leeg ris xwb.”

VAJLUGKUB TEJ HAUV PAUS NTSIAB LUS: “Txhua tus yuav tsum maj mloog tsis txhob maj hais, tsis txhob chim sai.”​—Yakaunpau 1:19.