RAU COV TXIJ NKAWM
1: Ua Raws Li Yus Cog Lus Tseg
YOG LI CAS?
Thaum ib tug tub ib tug ntxhais los sib sau ua neej, nkawd cog lus tawv nkawv tias nkawd yuav nyob ua ke mus li. Vim nkawd tau cog lus li ntawd, ib tug thiaj ntseeg tau ib tug siab. Nkawd yeej tso siab tias txawm lub neej yuav mus li cas los xij, nkawd ib tug yeej yuav tsis tso ib tug tseg.
Muaj tej nkawm niam txiv lam ua cav lwj sib ib xwb. Nkawd lam nyob ua ke vim tsis xav kom tebchaws hais. Tiamsis yog nkawd sib hlub sib hwm yeej zoo tshaj.
VAJLUGKUB TEJ HAUV PAUS NTSIAB LUS: ‘Tus txiv tsis txhob muab tus pojniam nrauj.’—1 Khaulee 7:11.
Ntxoov Mas tau hais tias: “Yog yus muab siab npuab yus tus txij nkawm tiag, txawm zoo li cas los yus yeem ua tus swb. Yus zoo siab hlo zam rau nws. Yus kuj thov txim ntawm nws thiab. Thaum muaj teeb meem yus nrhiav kev kho tsis yog nrhiav kev nrauj.” a
VIM LI CAS TSIM NYOG UA?
Yog ob niam txiv ib leeg tsis npuab siab rau ib leeg tiag tiag ces thaum muaj teeb meem nkawd yuav nrhiav kev sib nrauj xwb. Nkawd yuav xav tias, “Tsis yog yus tus, lub neej thiaj mus tsis taus.”
Yi tau hais tias: “Coob tus xav hais tias txawm yuav 3 hnub xwb los xij. Yog ib tug neeg twb npaj siab li ntawd lawm ces nws yuav tsis npuab siab tuag nthi rau nws tus txij nkawm.”
KOJ YUAV UA LI CAS?
TSHUAJ KOJ TUS KHEEJ
Thaum sib cav sib ceg . . .
-
Kuv puas khuvxim tias ua cas kuv yuav yuam kev nws lawm?
-
Kuv puas nco txog tej qub hluas nkauj hluas nraug?
-
Kuv puas cem tias kuv yuav tso nws tseg lossis hem tias kuv yuav nrhiav dua ib tug uas hlub kuv tiag tiag?
Yog koj twb xav li ntawd lawd, cia li nrhiav kev kho, koj tej lus cog tseg rau koj tus txij nkawm thiaj ruaj khov.
NROG KOJ TUS TXIJ NKAWM THAM
-
Wb puas sib hlub li yav thaud lawd? Yog wb txojkev hlub tsuag lawd, yog tim li cas?
-
Wb yuav kho li cas, wb txojkev sib hlub thiaj ruaj khov?
KEV PAB
-
Nco ntsoov sau ntawv rau koj tus txij nkawm qhia tias koj hlub nws.
-
Tom koj lub chaw haujlwm yuav tsum muaj koj tus txij nkawm daim duab.
-
Txhua txhua hnub hu xov tooj ib lwm nrog koj tus txij nkawm tham.
VAJLUGKUB TEJ HAUV PAUS NTSIAB LUS: “Vajtswv twb muab nkawd los txis ua txij ua nkawm lawm, yog li ntawd neeg tsis txhob muab nkawd cais.”—Mathais [Mathai] 19:6, TMZ.
a Tau muab cov npe hauv phau ntawv no ib txhia hloov lawm.
