Bondye te pwomèt Abraram, ki te pwofèt la, youn nan desandan l yo t apral fè “tout nasyon sou tè a” jwenn benediksyon (Jenèz 22:18). Kiyès desandan sa a t ap ye?

Sa gen prèske 2 000 an, Bondye te bay Jezi ki te yon desandan Abraram pouvwa pou l fè anpil gwo mirak. Mirak sa yo montre nasyon yo pral jwenn sa Bondye te pwomèt Abraram nan grasa Jezi. — Galat 3:14.

Mirak Jezi te fè yo te ede moun yo wè se li Bondye te chwazi pou pote benediksyon pou lèzòm, epitou, yo te montre jan Bondye pral sèvi avè l pou l beni lèzòm pou toutan. Remake ki jan mirak Jezi te fè yo ede n wè kèk nan bèl kalite li genyen yo.

Konpasyon: Jezi te geri moun ki malad.

Yon lè, gen yon mesye ki te gen lèp ki te sipliye Jezi pou l geri l. Jezi te touche l e l te di l: “Wi, mwen vle!” Lamenm, lèp la te disparèt sou mesye a. — Mak 1:40-42.

Renmen bay: Jezi te bay moun ki grangou manje.

Jezi pa t vle moun yo ale tou grangou. Nan plizyè okazyon, li te fè mirak kote li te bay plizyè milye moun manje lè l te fè kèk pen ak kèk ti pwason vin anpil (Matye 14:17-21; 15:32-38). Lè yo fin manje, vant yo tout te plen, e gen yon bon kantite manje ki te rete.

Pitye: Jezi te leve moun mouri.

“Avèk pitye”, Jezi te leve yon sèl pitit gason yon vèv, ki pa t gen lòt moun pou pran swen l, te genyen. — Lik 7:12-15.