“Beberapa taun suba, pengirau aku majak balat, nyentukka aku ngasaika diri baka ke belaban enggau api ninting hari. Maya nya, aku bisi berunding deka munuh diri. Iya ke amat, aku enggai mati. Aku mina deka ngetuka pemerinsa aku.”—Jonathan, 17.

 Nitihka siti pansik, dalam urung 14,000 iku pemelajar sekula menengah, nyauka 1 ari 5 iku sida ngaku, bisi runding deka munuh diri dalam masa 12 bulan ti lepas. a Enti nuan pan ngasaika diri enggai neruska pengidup, nama utai ke ulih digaga nuan?

•   Nganti. Besemaya meh ngagai diri empu, anang kelalu jampat ngereja sebarang ketegal nitihka asai ati. Taja pan penanggul ke ditapi nuan nya amat berat, tang agi bisi chara ke ulih dikena nuan napi nya.

 Nuan engka ngasaika diri udah nadai jalai pansut ari penanggul ke ditapi. Tang, nya engka enda sebalat baka ke diperundingka nuan. Enti nuan ngiga bantu, nuan ulih ngiga chara napi nya, lalu chara mutarka nya engka udah ba mua mata nuan.

•  Prinsip Bup Kudus: “Kami diansak ari semua endur, tang kami enda diempit nyentukka enda ulih engkebut; kami charut runding, tang enda nyentukka kami nadai jalai pansut.”—2 Korint 4:8.

   Tip: Enti asai ati deka munuh diri majak balat sereta enda nemu ngetu, giga meh bantu ke udah bisi enggau jampat. Chunto iya, talipun meh ngagai talian hotline ke nagang pengawa munuh diri tauka ngagai begian kecemasan ba sepital. Orang ke gawa dia endang udah dilatih kena meri bantu, lalu sida amat deka nulung nuan.

•   Berandau. Endang bisi orang ke sayau sereta deka nulung nuan. Chunto iya, bala kaban sereta diri sebilik nuan. Sida enda nemu utai ke ditapi nuan seagi nuan enda madahka sida.

 Sekeda orang begunaka cheremin mata ngambika ulih meda utai enggau terang. Sama mega, kaban ulih nulung nuan ngembuan runding ti betul pasal penanggul ke ditapi nuan, ngambika nuan ulih neruska pengidup.

•  Prinsip Bup Kudus: “Pangan endang seruran ngayanka pengerindu.”—Jaku Dalam 17:17.

   Tip: Kena ngepunka randau, nuan ulih madah, “Baru-baru tu, aku suah amat ngembuan runding ti negatif. Ulih aku madahka nuan utai ke diasaika aku?” Tauka nuan pan ulih madah, “Aku bisi penanggul ke enda ulih diputarka aku kediri aja. Ulih nuan nulung aku?”

•   Berubat. Penanggul ba pengerai baka balat irau tauka kemurungan ulih ngujungka orang enggai neruska pengidup. Tang, pemanah iya, penanggul pengerai tu ulih diubat.

 Baka penyakit renga ke ngasuh nuan enggai makai, sama mega, kemurungan ulih ngasuh nuan enggai neruska pengidup. Tang, baka renga ke bisi ubat, kemurungan mega bisi ubat.

•  Prinsip Bup Kudus: “Orang ke gerai enda begunaka lutur, tang semina orang ke sakit begunaka lutur.”—Matthew 9:12.

   Tip: Tentuka nuan bisi tinduk enggau chukup, sesais, sereta makai pemakai ti manah ke pengerai. Pengerai ke manah ulih meri mood ti manah.

•   Besampi. Bup Kudus madahka, “Petara besai agi ari ati kitai, lalu Iya nemu semua utai.” (1 John 3:20) Nya alai, besampi meh ngagai Iya. Sebut meh nama Iya, iya nya Jehovah, lalu pansutka asai ati nuan.

 Sekeda utai amat berat ditanggung kediri aja. Tang Petara Jehovah, iya nya Petara ke ngaga nuan, deka nulung nuan.

•  Prinsip Bup Kudus: ‘Anang irauka nama-nama utai, tang seruran meh besampi ngagai Petara. Enggau nya, pengelantang ari Petara ke ngelui ari utai ke ulih dimeretika kitai deka nyaga ati enggau runding kita.’—Pilipi 4:6, 7.

   Tip: Kelimpah ari madahka Jehovah pasal penanggul nuan, uji perundingka abis nadai siti utai ti manah, udah nya sebut meh sampi terima kasih ngagai Iya dalam sarinya. (Kolosi 3:15) Enti nuan selalu beterima kasih, senang agi alai nuan ngembuan runding ti positif pasal pengidup diri.

 Enti nuan ngasaika diri enggai neruska pengidup agi, pinta meh bantu. Nya meh utai ke digaga Jonathan ke disebut ba pun tadi. Ku iya madah, “Lebuh aku selalu berandau enggau apai indai sereta deka berubat, tu nulung pengerai aku manah agi. Amat, kekadang aku agi berasai tusah ati, tang aku enda kelalu balat bisi pengingin deka munuh diri.”