“Aku enda rindu sekula!” Enti nuan bisi asai ati baka tu, nuan engka bisi pengingin deka badu sekula. Tang, kati pemutus nya betul?

•  Nama kebuah bisi orang badu sekula?

•  Perundingka asil iya

•  Utai ke ulih dikereja nuan

•  Nama ku nembiak serambau nuan

 Sekeda kebuah ke suah diberi:

•   Tusah belajar. ‘Markah ba riput kad aku selalu warna mirah, enda kala warna biru.’

•   Runding ti salah. ‘Aku ngasaika, utai ke dipelajarka ba sekula nadai meri aku penguntung.’

•   Penanggul ekonomi. ‘Aku patut nulung diri sebilik ngiga belanja.’

 Dalam Bup Kudus bisi madah: “Orang ke pintar deka nyingkang enggau bejimat.” (Jaku Dalam 14:15) Nama reti ayat tu? Enti nuan deka badu sekula, perundingka dulu asil iya.

 Tanya diri empu:

•   ‘Enti aku badu sekula, kati senang aku bulih kereja dudi hari?’

   “Dudi hari, nuan endang sigi patut kereja lalu nupi diri sebilik. Tang, enti nuan badu sekula tumu, tusah agi nuan deka bulih kereja. Lalu mayuh kereja kemayaharitu ngiga orang abis nadai lulus SPM.”—Julia.

•   ‘Enti aku badu sekula diatu, kati ulih aku mutarka penanggul ti deka datai?’

   “Sekula siti ari endur ke nulung kitai nyadi orang ke nemu agi berunding. Laban, dudi hari orang ke ditemu nuan, penanggul ke ditapi, sereta pengawa ke dipegai nuan nyauka sama ba sekula.”—Daniel.

•   ‘Enti aku badu sekula tumu, kati aku bisi pengelandik diri empu baka orang ke besai tuai ti bukai?’

   “Ke diatu, utai ke dipelajarka nuan ba sekula baka ke nadai guna. Tang lebuh nuan udah chukup umur deka ngidupka diri, nuan engka nyebut, ‘Manah amat enti aku belajarka matematik enggau bendar suba.’”—Anna.

•   Ngiga bantu. Ajar Bup Kudus: “Enti mayuh penyanding penemu, bansa deka diau likun.” (Jaku Dalam 11:14) Enti nuan selalu bulih markah mit, minta meh tulung ari apai indai, pengajar, tauka orang bukai ke ulih dikeandalka nuan.

   “Enti nuan ngasaika diri tusah bulih markah ti manah, padahka meh ngagai pengajar nuan. Kekadang kitai ngasaika markah kitai enda manah ketegal pengajar enda ngajar enggau manah. Tang, enti kitai minta tulung, kitai ulih ngemanahka agi markah peresa kitai.”—Edward.

•   Perundingka penguntung iya. Ajar Bup Kudus: “Pengujung utai endang manah agi ari pun iya.” (Pengajar 7:8) Enti nuan nembuka sekula, nuan ukai semina bulih penemu, tang nuan mega ulih ngemansangka ulah ti diguna nuan.

   “Maya kitai abis sekula, kitai sigi enda ibuh nulis tauka belajarka utai ba peresa agi. Tang, enti kitai ulih mutarka utai ti nekan maya ba sekula, nya meri kitai peneleba ba endur kitai gawa dudi hari.”—Vera.

•   Perundingka chara bukai. Ajar Bup Kudus: “Enti nuan kelalu beguai-guai ngereja utai, nuan nadai kala chukup utai.” (Jaku Dalam 21:5) Anang terus ngumbai diri nadai daya kelimpah ari badu sekula. Nuan engka ulih ngena chara belajar nengah online tauka homeschooling.

   “Ba sekula, kitai belajar bagas agi nembuka pengawa sereta ulih bekerejasama enggau orang bukai. Semua utai tu amat beguna ba pengidup kitai. Nyadi, nembuka pengawa sekula ukai pengawa ti nadai guna.”—Benjamin.

 Batang ajar: Enti nuan ulih nembuka sekula, nuan sedia agi nyadi orang ke betanggungjawap.