NKE BỤ́ EZIOKWU

Obi anaghị eru onye na-echegbu onye ya ala. Otú ihe si dịrị n’ụwa a nwere ike ime ka onye ọ bụla n’ime anyị chegbuwe onwe ya.

IHE BAỊBỤL KWURU

Eze Devid kwuru na o nwere mgbe mkpụrụ obi ya nọ na-agba mgba, ya ana-erukwa uju ụbọchị niile. (Abụ Ọma 13:2) Gịnị nyeere Devid aka? O kpere ekpere, kọọrọ Chineke otú obi dị ya. Obi sikwara ya ike na Chineke ga-enyere ya aka. (Abụ Ọma 13:5; 62:8) Chineke na-agwakwa anyị ka anyị kọọrọ ya mkpa anyị. Baịbụl kwuru, sị: ‘Tụkwasịnụ ya nchegbu unu niile, n’ihi na ihe banyere unu na-emetụ ya n’obi.’—1 Pita 5:7.

Ma, o nwere ihe ụfọdụ mmadụ nwere ike ime ka nchegbu ya belata. Dị ka ihe atụ, Pọl onyeozi gbara mbọ kasie ndị ya na ha na-efekọ Chineke obi ma gbaa ha ume mgbe ihe gbasara ha nọ na-echu ya ụra. (2 Ndị Kọrịnt 11:28) Nchegbu ahụ ọ nọ na-enwe bara uru n’ihi na o mere ka o nyere ụmụnna ya aka. Anyịnwa nwekwara ike ime ka ya. A sị na o mere ka ọ gbasaghị ya, ọ garaghị enwe ike inyere ha aka.—Ilu 17:17.

“Na-elekwasị anya, ọ bụghị naanị n’ọdịmma onwe unu, kamakwa n’ọdịmma nke ndị ọzọ.”—Ndị Filipaị 2:4.

NKE BỤ́ EZIOKWU

Ndị mmadụ nwere ike ịna-echegbu onwe ha maka ego, ihe ndị ha mejọrọ n’oge gara aga, ma ọ bụkwanụ maka otú ihe ga-adị n’ọdịnihu. *

IHE BAỊBỤL KWURU

Mmadụ ichegbu onwe ya maka ihe o mere: N’oge ochie, o nwere ụfọdụ Ndị Kraịst bụbu ndị aṅụrụma, ndị na-apụnara mmadụ ihe, ndị na-akwa iko, na ndị ohi. (1 Ndị Kọrịnt 6:9-11) Kama ịnọ na-echegbu onwe ha n’ihi ihe ndị ahụ ha mere n’oge gara aga, ha gbanwere ma nwee obi ike na Chineke ga-agbaghara ha. Abụ Ọma 130:4 kwuru, sị: “Ezi mgbaghara dị n’aka gị [Chineke].”

Amaghị ihe echi ga-abụ: Jizọs sịrị: “Unu echegbula onwe unu mgbe ọ bụla maka echi, n’ihi na echi ga-enwe nchegbu nke ya.” (Matiu 6:25, 34) Ihe Jizọs na-ekwu n’amaokwu a bụ na anyị kwesịrị ilekwasị anya naanị n’otú ihe si dịrị anyị n’ụbọchị. Anyị ekwesịghị iburu nsogbu dịịrị echi tụkwasị na nke taa n’ihi na o nwere ike ime ka anyị mee mkpebi na-enweghị isi. O nwedịrị ọtụtụ ihe nwere ike ịna-echu mmadụ ụra, e mechaa, onye ahụ achọpụta na ihe ndị ahụ ekwesịghị ịna-echegbu ya.

Ego: Otu onye ma ihe rịọrọ Chineke si: “Emela ka m daa ogbenye, enyekwala m akụnụba.” (Ilu 30:8) Ihe ọ rịọrọ Chineke bụ ka o mee ka ihe ọ bụla ya nwere ju ya afọ, nke bụ́kwanụ ihe ga-eme ka ya na Chineke dịrị ná mma. Ndị Hibru 13:5 gwara anyị sị: “Ka ụzọ ndụ unu bụrụ nke ịhụnanya ego na-adịghị na ya, ka unu nọ na-enwe afọ ojuju n’ihe ndị dị ugbu a. N’ihi na o kwuwo, sị: ‘M gaghị ahapụ gị ma ọlị, m gaghịkwa agbahapụ gị ma ọlị.’” Onye nwere ego taa nwere ike ịbụ ogbenye echi. Ma, Chineke anaghị ahapụ ndị tụkwasịrị ya obi ma nwee afọ ojuju n’ihe ọ bụla ha nwere.

“Ahụbeghị m ka a hapụrụ onye ọ bụla bụ́ onye ezi omume kpamkpam, ahụbeghịkwa m ụmụ ya ka ha na-arịọ nri.”—Abụ Ọma 37:25.

IHE NDỊ MMADỤ NA-EKWU

N’afọ 2008, otu akwụkwọ akụkọ kwuru na nchegbu ga na-arị ibe ya elu ka chi na-abọ na-aga. N’afọ 2014, otu akwụkwọ akụkọ a na-ebi n’Amerịka kwukwara na ọtụtụ ndị Amerịka na-echegbu onwe ha.

IHE BAỊBỤL KWURU

“Ọ bụ nchegbu nke dị n’obi mmadụ ga-anyịgbu ya, ma, ọ bụ okwu ọma na-eme ka ọ ṅụrịa ọṅụ.” (Ilu 12:25) Ị manụ na “okwu ọma” dị n’ozi ọma gbasara Alaeze Chineke. (Matiu 24:14) N’oge na-adịghị anya, Alaeze ahụ, ya bụ, ọchịchị Chineke, ga-eme ihe anyị na-anaghị emeli. Ọ ga-eme ka ihe niile na-eme ka ndị mmadụ na-echegbu onwe ha kwụsị. Ọ ga-ewepụ nrịrịa na ọnwụ. Chineke kwere anyị nkwa na ya ‘ga-ehichapụ anya mmiri niile n’anya anyị, na ọnwụ agaghị adị ọzọ, iru uju ma ọ bụ mkpu ákwá ma ọ bụ ihe mgbu agaghịkwa adị ọzọ.’—Mkpughe 21:4.

“Ka Chineke onye na-enye olileanya mee ka unu jupụta n’ọṅụ niile na udo niile n’ihi na unu kwere ekwe.”—Ndị Rom 15:13.