Awan ti espesipiko nga ibaga ti Biblia maipapan iti kinalegal ti panagasawa ti agpada a lalaki wenno babai. Ngem sungbatanna daytoy, Ania ti kuna ti Biblia maipapan iti homoseksualidad, wenno seksual a relasion ti agpada a lalaki wenno babai?

Adu ti mangibagbaga nga ammoda ti sungbat, uray dida pay inadal a naimbag ti Biblia—ngem agkokontra ti sungbatda! Kuna ti dadduma a nalawag a kagura ti Biblia dagiti homoseksual. Adda met mangibagbaga a gapu ta ibilbilin ti Biblia nga “ayatem ti padam a tao,” ipalubosna ti amin a kita ti seksual a relasion.—Roma 13:9.

Ania kadagitoy ti ibilangmo a husto?

1. Ibaga ti Biblia a dakes a maaddaan iti seksual a relasion ti agpada a lalaki wenno babai.

2. Ipalubos ti Biblia a maaddaan iti seksual a relasion ti agpada a lalaki wenno babai.

3. Isursuro ti Biblia ti homophobia (pananggura wenno diskriminasion kadagiti bakla ken tomboy).

SUNGBAT:

1. HUSTO. Kuna ti Biblia: “Dagiti lallaki a makikaidda kadagiti lallaki . . . didanto tawiden ti pagarian ti Dios.” (1 Corinto 6:9, 10) Kasta met laeng uray kadagiti babbai.—Roma 1:26.

2. SAAN A HUSTO. Isursuro ti Biblia a ti laeng mabalin a maaddaan iti seksual a relasion ket ti agassawa a lalaki ken babai.—Genesis 1:27, 28; Proverbio 5:18, 19.

3. SAAN A HUSTO. Pudno nga ibaga ti Biblia a dakes ti homoseksualidad, ngem saanna nga isursuro ti saan a patas a panangtrato kadagiti homoseksual, panangranggas kadakuada gapu iti gura, wenno aniaman a kita ti madi a panangtrato kadakuada.—Roma 12:18. ^[1]

Patien dagiti Saksi ni Jehova a dagiti moral a paglintegan ti Biblia ti kasayaatan a pagsurotan, ken kayatda nga aramiden dagita. (Isaias 48:17) ^[2] Isu nga adaywan dagiti Saksi ni Jehova ti amin a klase ti seksual nga immoralidad, kas iti homoseksualidad. (1 Corinto 6:18) ^[3] Kasta ti panagbiag a kayat dagiti Saksi, ket kalinteganda dayta.

Ngem ikagkagumaan met dagiti Saksi ni Jehova ti makikappia iti “amin a tattao.” (Hebreo 12:14) Uray kagurada ti homoseksualidad, dida ipilpilit iti dadduma ti kapanunotanda. Dida makiramraman kadagiti krimen gapu iti pananggura kadagiti homoseksual ken dida maragsakan no adda madamagda a kasta a pasamak. Agporporsegi dagiti Saksi ni Jehova a mangsurot iti Golden Rule babaen ti panangtratoda iti dadduma kas iti kayatda a pannakatrato.—Mateo 7:12.

Ibagbaga latta ti dadduma nga isursuro ti Biblia ti saan a patas a panangtrato kadagiti homoseksual. Ibagbagada pay a dagiti sumursurot iti moral a paglintegan ti Biblia ket dida ammo nga akseptaren ti padada a tao. ‘Akikid ti panagpampanunot dagiti tattao idi naisurat ti Biblia,’ kunada. ‘Ita, akseptarentayon ti amin a tattao aniaman ti puli, nasionalidad, ken ibagada a seksoda.’ Para kadakuada, ti saan a panangakseptar iti homoseksualidad ket kas met iti saan a panangakseptar kadagiti tattao a sabali ti kolorda. Husto kadi dayta a kapanunotan? Saan. Apay?

Adda ngamin nagdumaan ti saan a panangakseptar iti homoseksualidad ken ti saan a panangakseptar kadagiti homoseksual. Ibagbaga ti Biblia kadagiti Kristiano a respetuenda ti amin a klase ti tattao. (1 Pedro 2:17)) ^[4] Ngem dina kayat a sawen a masapul nga akseptarenen dagiti Kristiano ti amin a klase ti aramid.

Panunotem daytoy: Ipapantayo nga ibilangmo ti panagsigarilio a makadadael iti salun-at ken narugit pay ketdi. Kasano no adda katrabahuam nga agsigsigarilio? Maikuna kadi nga akikid ti panagpampanunotmo gapu laeng ta dikay agpada iti kapanunotan iti panagsigarilio? Gapu kadi ta agsigsigarilio isuna ken saanka nga agsigsigarilio, kayatnan a sawen nga idumdumamon isuna? No pilitennaka a baliwam ti kapanunotam iti panagsigarilio, saan kadi nga isuna no kuan ti akikid ti panagpampanunotna ken saanna nga ammo ti mangakseptar iti padana a tao?

Kayat dagiti Saksi ni Jehova a suroten ti moral a paglintegan nga ibagbaga ti Biblia. Dida akseptaren dagiti aramid nga iparparit ti Biblia. Ngem dida met pagkakatawaan wenno tratuen iti di nasayaat dagiti tattao nga agar-aramid kadagiti banag a naiduma iti kayatda.

Kasano ngay dagiti lallaki a kasla babai ti riknada ken dagiti babbai a kasla lalaki ti riknada? Nayanakda kadi a kastan? No wen, saan kadi a naulpittayo no ibagatayo a saan a nasayaat no surotenda ti riknada?

Awan ti ibaga ti Biblia maipapan iti pakabuklan ti tao a posible a rason nga agbalin a homoseksual ti maysa. Ngem admitiren ti Biblia nga adda dagiti ugali dagiti tattao a permi a nairamuten kadakuada. Uray no kasta, ibaga ti Biblia nga adda dagiti aramid—agraman dagiti homoseksual nga ar-aramid—a masapul a liklikantayo no kayattayo a paragsaken ti Dios.—2 Corinto 10:4, 5.

Kuna ti dadduma a naulpit ti ibagbaga ti Biblia. Ngem naibasar laeng dayta iti opinionda a masapul a surotentayo no ania ti kayat ti riknatayo, wenno napateg ti seksual a riknatayo isu a masapul a ditay kontrolen, ken ditay pay ketdi kabaelan a kontrolen dayta. Ngem inikkan ti Biblia dagiti tattao iti dignidad, ta imbagana a kabaelanda a labanan ti rikriknada. Saan a kas kadagiti animal, kabaelanda a labanan ti riknada.—Colosas 3:5. ^[5]

Panunotem daytoy: Kuna ti dadduma nga eksperto nga adda dagiti ugali dagiti tattao, a kas iti kinabayolente, a ti posible a makagapu ket nayanakda a kasta. Awan ti eksakto nga ibaga ti Biblia maipapan iti pakabuklan ti tao a posible a rason nga agbalin a bayolente ti maysa. Ngem admitiren ti Biblia nga adda  dagiti tattao a “managunget” ken “agannayas [wenno, nalaka] nga agpungtot.” (Proverbio 22:24; 29:22) Ngem ibaga met la ti Biblia: “Baybay-am ti unget ket panawam ti pungtot.”—Salmo 37:8; Efeso 4:31.

Manmano la ketdi ti kumontra iti dayta a balakad wenno mangibaga a naulpit dayta para kadagiti managpungpungtot. Kinaagpaysuanna, adda dagiti eksperto nga agporporsegi a mangtultulong kadagiti managpungpungtot a mangkontrol iti riknada uray mamatida a natawid dayta nga ugali.

Kasta met laeng ti takder dagiti Saksi ni Jehova iti aniaman nga aramid a maikontra iti estandarte ti Biblia, a pakairamanan ti seksual a relasion ti lalaki ken babai a saan a nagkasar. Kastoy ti balakad ti Biblia maipapan kadagita: “Tunggal lalaki ammona koma ti nasantoan ken natakneng a wagas ti panangasawa, saan a dinederrep a kas ar-aramiden dagiti saan a makaammo iti Dios.”—1 Tesalonica 4:4, 5, Ti Baro a Naimbag a Damag Biblia.

Dagiti mayat nga agbalin a Kristiano idi umuna a siglo ket agduduma ti napalabas ken panagbiagda, ken dadduma kadakuada ti nangaramid iti dakkel a panagbalbaliw iti panagbiagda. Kas pagarigan, naibaga iti Biblia dagiti ‘mannakiabig, managrukbab iti idolo, mannakikamalala, lallaki a maipaay kadagiti di nainkasigudan a panggep [wenno, lallaki a makirelasion iti padada a lalaki],’ ngem naibaga pay: “Kasta idi ti sumagmamano kadakayo.”—1 Corinto 6:9-11.

Idi imbaga ti Biblia a, “kasta idi ti sumagmamano kadakayo,” kayatna kadi a sawen a saanen a pulos narikna dagiti nangisardeng iti homoseksual nga aramid ti aniaman a homoseksual a rikna? Saan, ta kuna ti Biblia: “Itultuloyyo ti magna babaen ti espiritu ket saankayto a pulos makaaramid iti nainlasagan a tarigagay.”—Galacia 5:16.

Siputam ta saan nga ibagbaga ti Biblia a saanton a pulos marikna ti maysa a Kristiano ti di umiso a rikrikna. No di ket ibagbaga ti Biblia a kabaelanna a saan nga aramiden, wenno suroten dayta a riknana. Nasursuro dagiti Kristiano a kontrolen dagiti kasta a rikna ken saanda a sangkapanunot tapno dida maaramid dagita.—Santiago 1:14, 15. ^[6]

Dayta ti gapuna a pinagduma ti Biblia ti panangayat a mangaramid iti maysa a banag ken ti mismo a panangaramid iti dayta. (Roma 7:16-25) Kabaelan a kontrolen ti maysa a tao nga addaan iti homoseksual a rikna no ania dagiti sangkapanunotna, kas iti panangkontrolna iti dadduma pay a dakes a rikna, kas iti rikna nga agpungtot, makikamalala, ken agbalin a naagum.—1 Corinto 9:27; 2 Pedro 2:14, 15.

Sursuroten dagiti Saksi ni Jehova ti moral a paglintegan nga adda iti Biblia ngem dida ipilit iti dadduma ti patpatienda. Dida met baliktaden dagiti linteg a mangprotprotektar iti kalintegan dagiti tattao a saanda a kapada iti pamay-an ti panagbiag. Positibo ti mensahe nga ipakpakaammo dagiti Saksi ni Jehova, ken maragsakanda a mangibaga iti dayta iti asinoman a dumngeg.—Aramid 20:20.