ბიბლიაში არაერთი რჩევა თუ დაპირებაა მოცემული. შესაძლოა გაინტერესებთ, რას ასწავლის ბიბლია, თუმცა, იმავდროულად, გაფიქრებთ, რამდენად სანდოა ძალიან დიდი ხნის წინ დაწერილი რჩევები და დაპირებები. მართლა შეგვიძლია გვჯეროდეს, რომ ბიბლიური რჩევები დღესაც გამოსადეგია? რა გვარწმუნებს, რომ რასაც ის მომავალზე ამბობს, სიმართლეა? მილიონობით ადამიანი დარწმუნდა ბიბლიის სანდოობაში. თქვენც შეგიძლიათ, თავად გამოიკვლიოთ ბიბლია და დარწმუნდეთ მის უტყუარობაში.

1. რამდენად შეეფერება სინამდვილეს ის, რაც ბიბლიაში წერია?

თავად ბიბლია ამბობს, რომ მასში ჭეშმარიტება ზედმიწევნითაა გადმოცემული (ეკლესიასტე 12:10). ბიბლიაში აღწერილი მოვლენები ნამდვილად მოხდა და მასში მოხსენიებული ადამიანები რეალურად არსებობდნენ (წაიკითხეთ ლუკას 1:3; 3:1, 2). ისტორიკოსები და არქეოლოგები ერთხმად აღიარებენ, რომ ბიბლია იხსენიებს კონკრეტულ ადამიანებს, ზუსტ თარიღებს, ადგილებსა თუ მოვლენებს.

2. რატომ შეგვიძლია ვთქვათ, რომ ბიბლია დრომოჭმული წიგნი არაა?

თამამად შეგვიძლია ვთქვათ, რომ ბევრ საკითხში ბიბლიამ დროს გაუსწრო. ამას მოწმობს მისი მეცნიერული სიზუსტეც. მართალია, ბევრი რამ, რაც ბიბლიაში ჩაიწერა, მაშინდელ შეხედულებებს ეწინააღმდეგებოდა, მაგრამ დღეს მისი სიზუსტე მეცნიერულად დასტურდება. ის „სანდოა . . . ახლაც და მარადიულადაც“ (ფსალმუნი 111:8).

3. რა გვარწმუნებს, რომ რასაც ბიბლია მომავალზე ამბობს, სიმართლეა?

ბიბლიაში ნაწინასწარმეტყველებია მოვლენები, რომლებიც ჯერ არ მომხდარა (ესაია 46:10). მასში დიდი ხნით ადრე ჩაწერილი წინასწარმეტყველებები ზედმიწევნით შესრულდა. ბიბლია საოცარი სიზუსტით აღწერს დღევანდელ მსოფლიო მდგომარეობასაც. ამ გაკვეთილში გავეცნობით რამდენიმე ბიბლიურ წინასწარმეტყველებას და დავინახავთ, თუ რამდენად ზუსტად შესრულდა თითოეული მათგანი.

 ᲨᲔᲯᲐᲛᲔᲑᲐ:

ბიბლიას შეგვიძლია ვენდოთ, რადგან ის ისტორიულად და მეცნიერულად ზუსტია და მასში ჩაწერილი წინასწარმეტყველებები ზედმიწევნით სრულდება.

გასამეორებელი კითხვები:

• რამდენად შეეფერება ბიბლიაში ჩაწერილი სინამდვილეს?

• რა ადასტურებს, რომ ბიბლია მეცნიერულად ზუსტი წიგნია?

• გჯერათ, რომ ბიბლიას შეუძლია მომავლის წინასწარმეტყველება? ახსენით.