Aṭas n lɛibad i gelluẓen di ddunit yerna ur sɛin ara ixxamen. Kra, qeḍɛen layas. A nwali amek ara ɣ-ibarek Ṛebbi w’a naf lemzeyya ɣur-es ma neţɛawan imdanen-agi.

‘Win yeţḥunnun ɣef igellil ireṭṭel i Yahwa, d neţţa ara s-d-irren lxiṛ.’​—LEMTUL 19:17.

Sidna Ɛisa yeḥka-d yiwet n teqsiṭ ɣef yiwen wergaz. Argaz-agi zzwren-as-d imakaren, wten-t dɣa ǧǧan-t ger tudert d lmut. (Luqa 10:29-37) Yiwen ubeṛṛani iḥbes-ed ɣur-es, yelha-d yid-es yerna icudd-as leǧruḥ-is, xas akken neţţa yella si ccetla nniḍen.

Abeṛṛani-yagi yeččuṛen d leḥnana mačči kan d lemɛawna i gɛawen s cci-ines argaz-nni ijerḥen; yesseṛtaḥ-it yerna yesnefsusi fell-as taɛkemt.

Acu i ɣ-tesselmad temɛayt-agi? Sidna Ɛisa yebɣa a ɣ-d-ibeggen di temɛayt-agi belli ilaq a nexdem ayen akk umi i nezmer iwakken a nɛiwen lɣir-nneɣ. (Lemtul 14:31) Tira Iqedsen sselmadent belli ur yeţɛeṭṭil ara Ṛebbi ad yekkes lḥif, tiggullelt akk-d lemḥayen. Meɛna, ahat teqqareḍ-as, melmi ara d-yesseḍru Ṛebbi annect-agi meṛṛa yerna amek? Aḥric ara d-itebɛen yesskanay-ed lbaṛakat i k-yewɛed Uxellaq-ik yeččuṛen d leḥmala.