Ṛebbi yewɛed i Sidna Ibṛahim belli “leǧnas meṛṛa n ddunit” ad ţţubarken s yiwen si tarwa-s. (Laṣel n ddunit 22:18) Anwa-t wagi?

Azal n 2 000 iseggasen aya, Ṛebbi yefka tazmert i Sidna Ɛisa, yiwen si dderya n dderya n Sidna Ibṛahim, akken ad yexdem lbeṛhanat imeqranen. Lbeṛhanat-agi ssenɛaten-d belli Ṛebbi ad yessexdem Sidna Ɛisa iwakken ad ţţubarken leǧnas meṛṛa n ddunit, akken i s-t-yewɛed i Sidna Ibṛahim.​—Igalatiyen 3:14.

Lbeṛhanat i gexdem Sidna Ɛisa fkan-d ţţbut belli d neţţa i gextaṛ Ṛebbi iwakken ad ibarek imdanen. Sseknen-d amek ara t-yessexdem Ṛebbi bac ad ibarek lɛibad i lebda. Sseknen-d daɣen ṣṣifat itɛeddan n Sidna Ɛisa. A nwali kra si ṣṣifat-agi:

Ḥnin: Sidna Ɛisa yesseḥla imuḍan.

Yiwen wass, yiwen wergaz ihelken lbeṛs (nnejdam) iḥellel Sidna Ɛisa akken a t-yesseḥlu. Sidna Ɛisa yennul-it mbeɛd yenna-yas: “Bɣiɣ!” Din din yeḥla si lbeṛs-nni-ines.​—Marqus 1:40-42.

Ur yeţcuḥu ara: Sidna Ɛisa yessečč wid yelluẓen.

Sidna Ɛisa ur yebɣi ara ad llaẓen lɛibad. Snat n tikkal neɣ kteṛ, Sidna Ɛisa yexdem lbeṛhanat ideg i gessefti aɣrum akk-d iḥutiwen iwakken ad yessečč luluf n lɣaci. (Matta 14:17-21; 15:32-38) Mi kfan lmakla, ṛwan akken ma llan yerna yugar lxiṛ.

Ţɣiḍin-t medden: Sidna Ɛisa yesseḥya-d lmeggtin.

Mi gwala Sidna Ɛisa yiwet n taǧǧalt umi yemmut mmi-s awḥid yerna ulac win ara d-yelhin yid-es, “tergagi-d tasa-s” dɣa yesseḥya-d mmi-s.​—Luqa 7:12-15.