THUTO 38
Bokela Chipo Che Buchilo
Ku na zwithu zwinjinji zwa ti nga shathila mu buchilo. Nenguba ti lingisana ne mathatha, ku na zwithu zwa ti nga shathila. Ti nga lakidza chini kuti to bokela chipo che buchilo? Ngono i libaka gupi gu no tolegwa pezhugwi, gwe ku thama ku jalo?
1. Ini ta ka fanila ku bokela buchilo?
Ta ka fanila ku bokela buchilo ne kuti i chipo chi no dwa ku na Tate bedu ba na ludo Jehova. Ndiye wa ka “bumba zwithu zose”. (Zumbunulo 4:11) “Se uli iwo unopa butjilo ne meya inofemiwa ne tjimwe ne tjimwe ku mmwe ne mmwe.” (Mishingo 17:25, 28) Jehova u no ti pa cha ti no sheta kuti ti dwilile ti chila. Ngono pezhugwi kwa ikoko, u no thama kuti ti dwilile ti shathila buchilo.—Bala Mishingo 14:17.
2. Ti nga lakidza Jehova chini kuti to bokela chipo che buchilo?
Jehova wa ka lakidza kuti u no amika ne kuko, u sathu u ka zwagwa. Dafite, nngwe we ba no namata Ndzimu, wa ka ndwa eti: “Mesho enyu akabona lopa langu lisathu likabumbiwa.” (Pisalema 139:16) Jehova u no tolela buchilo gugo pezhugwi kwazo. (Bala Matewu 10:29-31.) Ku nga ngwadza kwazo ha ku nga shingikala kuti nthu a bulaye nngwe kene a zwibulaye. a (Ekezodo 20:13) Kakale ku nga gwadza Jehova ha ti nga longa machilo edu mu mbatsha ku si nga sheteke, kene ti si nga thame chingwe ku bakilila machilo e bangwe. Ha ti tolela pezhugwi buchilo gwedu ne gwe bangwe to lakidza kuti tobokela chipo chi no chenamisa che buchilo.
ZWIDIYE KWA KA NGINILILA
Bona zila dzingwe dza u nga lakidza nadzo kuti no bokela chipo che buchilo.
3. Zwithokomele
Bakirisiti ba ka zwipa, ba no shingisa buchilo gwabo gwe zhuba ne zhuba ku shingila Jehova. Ko fanana ne ku dusila Ndzimu chibayilo che mibili yabo. Bala Baroma 12:1, 2, mu be mu lebesana ne kwe buzo dzi no tobela:
-
Ini chi nga thama kuti u thokomele mamuko awo?
-
U nga thama u jalo ne zila dzipi?
4. Lingilila kuti zwa u no thama, ha zwi nga longe machilo mu ngozi
Baibili i no ti kumbuludza kuti ti si thame chingwe chi nga pelela ne ngozi. Zana VIDIYO ku zwidiya ne kwe zwithu zwingwe zwa u nga thama kuti u bakililike.
Bala Zwiani 22:3, mu be mu lebesana ne kwe kuti, iwe ne bangwe mu nga bakililika chini . . .
-
ku nzi.
-
ku nshingo.
-
ha u zana.
-
ha u draiva mota kene wa ka i tatha.
5. Tolela pezhugwi buchilo gwe ngwana u sathu a ka zwagwa
Mu lumbo gugwe, Dafite wa ka leba ne se kwa Jehova e amika ne kwe buchilo ne ku kula kwe ngwana u sathu a ka zwagwa. Bala Pisalema 139:13-17, mu be mu lebesana ne kwe buzo i no tobela:
-
Mu mesho a Jehova, a buchilo gwe nthu go tangisa a sathu a ka zwagwa kene e zwagwa?
Milayo ya Jehova ye Iziraela wa ntolo, ya ka be e bakilila bomme ba ka zwisenga ne bana ba sathu ba ka zwagwa. Bala Ekezodo 21:22, 23, mu be mu lebesana ne kwe buzo dzi no tobela:
-
Jehova wa ka be e linga chini, nthu wa ka bulaya ngwana u sathu a ka zwagwa, ne phoso?
-
Jehova u no zwiwa chini ha nngwe e thama e jalo ka ngwaza? b
-
U no zwiwa chini ne kwe zila ye Ndzimu ya a no linga khani iyeyo nayo?
Dumbu ne nkadzi u no tolela buchilo pezhugwi u ngabe ne mazwiwo e kuti ku chinya mimba ndiko koga kwa a ka fanila thama. Bala Izaya 41:10, mu be mu lebesana ne kwe buzo dzi no tobela:
-
Ha nkadzi e tshambilidzigwa ne bangwe ku chinya mimba, wa ka fanila ku shaka batsho ngayi? Ne kutini?
BATHU BANGWE BA KATI: “Nkadzi u na fanilo ye ku shalula kuti a u nga chinya mimba kene chini—i mbili uwe.”
-
Ini chi no thama kuti u dume kuti Jehova u no tolela pezhugwi buchilo gwa mme ne ngwana wabo u sathu a ka zwagwa?
CHA WA ZWIDIYA
Baibili i no ti diya kuti ti de, ti tolele pezhugwi, ne ku bakilila chipo cha ta ka piwa na Jehova che buchilo. Ichecho cho shanganyila machilo edu ne e bangwe.
U Nga Tini?
-
Ini Jehova e tolela buchilo gwe nthu pezhugwi?
-
Jehova u no zwiwa chini ha e bona nthu e bulaya nngwe ka ngwaza?
-
Ini cha u no tolela pezhugwi, ne kwe chipo che buchilo?
SHAKISISA
Ti nga lakidza chini kuti to bokela Jehova chipo che buchilo?
Shaka dabilo ye buzo ye kuti, A Ndzimu u nga zwibatigwa nkadzi wa ka chinya mimba?
Zwidiye se kwa zila ye Ndzimu ye ku linga buchilo ya ka fanila ku ama mizano ya ti no shalula.
“‘Mizano i Mbatsha’—A wa ka Fanila ku be ne Chiabe mu Ili?” (Mukani!, October 8, 2000)
Ku ingwi ha nthu e shaka ku zwibulaya? Bona kuti Baibili i nga batsha chini.
“Ndo Shaka ku Fa—A Baibili i Nga Ndi Batsha ha Ndi Shaka ku Zwibulaya?” (Web article)
a Jehova u no amika kwazo ne kwe bathu ba ka hwa zogwadza. (Pisalema 34:18) U no hwisisa ha nngwe e hwa zogwadza kwazo, kwa a no pelela e be ne mazwiwo e ku zwibulaya, ngono u no shaka ku batsha. Ku bona kuti batsho iye i nga shandula mazwiwo iyawo chini, bala nsholo u noti “Ndo Shaka ku Fa—A Baibili i Nga Ndi Batsha ha Ndi Shaka ku Zwibulaya?” u mu ipithu che Shakisisa mu thuto iyeyi.
b Bose ba ka tongo chinya mimba, habazo fanila ku zwibona nlandu kwa ka pindilila—Jehova u no khona ku ba zwibatigwa. Ku bona kwa ka paphidzika, bala nsholo u noti “Baibili Ikatini ne Kwe ku Chinya Mimba?” u mu ipithu che Shakisisa mu thuto iyeyi.
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
