Kal ki é nómi di Deus? Deus fla: ‘Ami é Jeová. Kel-li é nha nómi’. (Isaías 42:8) Nómi di Deus ta parse más di 7 mil bês na Bíblia. Má, na txeu traduson di Bíblia es troka kel nómi pa un titlu, sima “Sinhor”. Deus krê pa bu ser se amigu, pur isu el ta insentiva-u pa bu ‘invoka se nómi’. —  Salmo 105:1.

Jeová ten txeu titlu. Bíblia ta mostra ma Jeová ten txeu titlu sima “Deus”, “Tudu-Poderozu”, “Kriador”, “Pai” i “Sinhor”. Na txeu orason ki sta na Bíblia, kes algen uza un titlu ki ta mostra ruspetu pa pâpia ku Deus, má tanbê es uza se nómi, ki é Jeová. —  Daniel 9:4.

 Modi ki Deus é? Deus é un spritu ki nu ka ta odja. (Juan 4:24) Bíblia ta fla ma “nunka ningen ka odja Deus.” (Juan 1:18) Bíblia tanbê ta mostra ma Deus ten sentimentu. Kuzas ki pesoas ta faze pode pô-l ta fika tristi ô ‘kontenti’. —  Provérbios 11:20; Salmo 78:40, 41.

Kes kualidadi bunitu di Deus. Deus ta trata tudu algen igual i el ta seta pesoas di tudu nason i kultura. (Atus 10:34, 35) Tanbê el ten ‘mizerikórdia i konpaxon, el ten paxénxa i el é xeiu di amor lial i di verdadi’. (Êxodo 34:6, 7) Má, ten kuatu kualidadi di Deus ki é más inportanti.

Puder. Dja ki el é ‘Deus Tudu-Poderozu’, el ten puder pa kunpri kalker promésa ki el ta faze. —  Génesis 17:1.

Sabedoria. Ka ten ningen ki ten sabedoria sima Deus. É pur isu ki Bíblia ta fla ma el é “úniku ki ten sabedoria”. —  Romanus 16:27.

Justisa. Deus sénpri ta faze kel ki é dretu. Kuzas ki el ta faze é ‘perfeitu’ i ‘nunka el é ka injustu’. —  Deuteronómio 32:4.

Amor. Bíblia ta fla ma “Deus é amor.” (1 Juan 4:8) Kel-li krê fla ma Deus ka sô ta mostra amor, má amor ta faze párti di se manera di ser. Tudu kuza ki el ta faze é pamodi amor, i kel-la ta djuda-nu di un monti manera.

Amizadi di Deus ku pesoas. Deus é nos Pai na Séu ki ta ama-nu txeu. (Mateus 6:9) Si nu ten fé na el, nu pode ser se amigu. (Salmo 25:14) Na verdadi, Deus ta konvida-u pa bu pâpia ku el na orason, asi bu ta ser más se amigu. Tanbê, el ta konvida-u pa bu ‘bota tudu bus preokupason riba di el, pamodi el ta kuida di bo.’ —  1 Pedru 5:7; Tiagu 4:8.

Jizus é ka Deus. Jizus é úniku, pamodi Deus kria-l sen ajuda di ningen. É pur isu ki Bíblia ta txoma Jizus di Fidju di Deus. (Juan 1:14) Dipôs ki Jeová kria Jizus, el uza se primeru fidju sima ‘un bon trabadjador’, pa kria tudu kuza i tudu algen. —  Provérbios 8:30, 31; Kolosensis 1:15, 16.

 Jizus nunka ka fla ma el éra Deus. Envês di kel-li, el splika: ‘Ami é reprizentanti di Deus i é el ki manda-m.’ (Juan 7:29) Kantu el staba ta pâpia ku un di se disiplus, Jizus txoma Jeová di “nha Pai i nhos Pai” i “nha Deus i nhos Deus.” (Juan 20:17) Dipôs ki Jizus móre, Jeová resusita-l pa vida na Séu i el da-l grandi autoridadi na Se ladu direita. —  Mateus 28:18; Atus 2:32, 33.

Jizus pode djuda-u ser amigu di Deus

Jizus ben pa Téra pa inxina-nu sobri se Pai. Jeová fla sobri Jizus: “Kel-li é nha Fidju, ki N ta ama. Nhos obi ku el.” (Markus 9:7) Ka ten ningen ki konxe Deus sima Jizus. El fla: “É sô Fidju ki konxe ken ki Pai é, i tanbê kes algen ki Fidju krê inxina sobri El, ningen más.” —  Lukas 10:22.

Jizus imita kualidadis di Deus di manera perfeitu. Jizus imita kualidadis di se Pai rei di dretu, ki el fla: “Kenha ki odja-m, dja odja nha Pai tanbê.” (Juan 14:9) Jizus imita amor di se Pai na kuzas ki el fla i ki el faze, pur isu, pesoas ta krê prendeba sobri Deus. El fla: “Ami é kaminhu, verdadi i vida. É sô através di mi ki algen ta txiga na nha Pai.” (Juan 14:6) Tanbê el fla: “Pa adoradoris verdaderu adora Deus ku spritu i verdadi. Pamodi, na verdadi, Deus sta ta djobe kes algen li pa adora-l.” (Juan 4:23) Dja bu pensa na kel-li? Jeová sta ta djobe pesoas sima bo ki krê prende verdadi sobri el.