Keti Yezu Kele Nzambi Nkwa-Ngolo Yonso?

Bamvutu yina bantu mingi kepesaka:

▪ “Ee, Yezu kele Nzambi Nkwa-Ngolo Yonso.”

▪ “Yezu kuvandaka Nzambi yina kubakaka nitu ya kinsuni.”

Inki Yezu kutubaka?

▪ “Kana beno ke zolaka mono, beno zolaka kuvanda na kiese mingi na kuzaba nde mono ke kwenda na Tata, sambu Tata me luta mono na nene.” (Yoane 14:28) Yezu kutubaka nde yandi ti Tata na yandi kele ve kiteso mosi.

▪ “Mono ke tombuka na Tata na mono, yina kele mpi Tata na beno; mono ke tombuka na Nzambi na mono, yina kele mpi Nzambi na beno.” (Yoane 20:17) Yezu kutubaka ve nde yandi kele Nzambi, kansi yandi tubaka nde yandi ti Nzambi kele bantu zole ya kuswaswana.

▪ “Sambu mono ke tubaka ve na kiyeka na mono mosi, kansi Tata yina tindaka mono, yandi songaka mono mambu yina ya mono fweti tuba ti mambu yina ya mono fweti longa.” (Yoane 12:49) Mambu yina Yezu vandaka kulonga kukatukaka ve na yandi mosi, kansi na Tata na yandi.

YEZU kutubaka nde yandi kele Mwana ya Nzambi, kansi ve Nzambi Nkwa-Ngolo Yonso. Kana Yezu kuvandaka Nzambi, yandi vandaka kusamba nani ntangu yandi vandaka awa na ntoto? (Matayo 14:23; 26:26-29) Ntembe kele ve nde, Yezu vandaka ve kusala kaka bonso nde yandi ketuba na muntu yankaka.

Ntangu balongoki na yandi zole kulombaka yandi na kupesa bo kiyeka na Kimfumu na yandi, Yezu kutubaka nde: “Mono ke na nswa ve ya kusola muntu yina ta vanda na diboko na mono ya [kitata] to na diboko na mono ya [kimama]. Tata na mono ta pesa bisika yina na bantu yina ya yandi me yidikilaka bo yo.” (Matayo 20:23) Keti Yezu vandaka kuta luvunu ntangu yandi tubaka nde yandi vandaka ve ti nswa ya kupesa bo kima yina bo vandaka kulomba? Ve! Kansi, yandi ndimaka na kudikulumusa yonso nde kaka Nzambi muntu kele ti nswa ya kubaka badesizio ya mutindu yina. Nkutu, Yezu kutendulaka nde yo kele ti mambu yankaka yina yandi ti bawanzyo kuzabaka ve, kansi kaka Tata na yandi.​—Marko 13:32.

Keti Yezu kuvandaka na nsi ya Nzambi kaka ntangu yandi vandaka awa na ntoto? Ve. Ata na nima ya lufwa mpi ya lufutumuku na yandi, Biblia ketuba nde Yezu kuvandaka na nsi ya Nzambi. Ntumwa Polo keyibusa beto nde “Nzambi kele mfumu ya Kristo.” (1 Korinto 11:3) Biblia ketuba nde na bilumbu kekwisa, ‘ntangu Nzambi tatula bambeni na yandi yonso na nsi ya kiyeka ya Kristo imene, yandi mosi mwana ta lemfuka na Nzambi yina me tulaka bima yonso na nsi ya kiyeka na yandi Mwana; mpidina Nzambi ta yalaka bima yonso mpenza.’​—1 Korinto 15:28.

Yo kele pwelele nde Yezu kele ve Nzambi Nkwa-Ngolo Yonso. Yo yina yandi bingaka Tata na yandi “Nzambi na mono.”​—Kusonga 3:2, 12; 2 Korinto 1:3, 4. a

[Noti na nsi ya lutiti]

[Bangogo sambu na kubenda dikebi ya kele na lutiti 7]

Yezu kutubaka nde yo kele ti mambu yankaka yina yandi ti bawanzyo kuzabaka ve, kansi kaka Tata na yandi