Bambangi ya Yehowa me zabanaka mingi sambu na kisalu na bo ya kusamuna. Keti nge ke zabaka nde beto ke vandaka mpi na manaka ya kulonguka Biblia ti bantu na ntoto ya mvimba?

Na mvu 2014, kiteso ya Bambangi kuluta 8 000 000 na bansi 240 longukaka Biblia ti bantu kiteso ya 9 500 000 konso ngonda. * Ya kieleka, ntalu ya bantu ya beto ke longukaka ti bo Biblia me luta ntalu ya bantu ya bansi kiteso ya 140!

Sambu na kusala kisalu yai, konso mvula, Bambangi ya Yehowa ke basisaka ba Biblia, mikanda, bazulunalu mpi bisadilu ya nkaka ya kulongukila Biblia kiteso ya miliare mosi ti ndambu, na bandinga kiteso ya 700! Kubasisa mikanda mutindu yai ke sadisaka bantu mingi na kulonguka Biblia na bandinga ya bo me zola.

Inki mutindu kulonguka yai ke salamaka?

Beto ke longukaka ti bantu masolo mingi ya Biblia mpi beto ke tangaka baverse ya ke wakana ti masolo yango. Mu mbandu, Biblia ke pesaka bamvutu na bangiufula bonso yai: Nzambi kele nani? Yandi kele nki mutindu? Keti yandi kele ti zina? Yandi ke zingaka na wapi? Keti beto lenda kwenda pene-pene na yandi? Diambu ya mpasi lenda vanda mutindu ya kuzaba baverse ya Biblia yina ke pesa mvutu na bangiufula yai.

Sambu na kusadisa bantu na kubaka bamvutu, mbala mingi beto ke sadilaka mukanda Inki Biblia Kelongaka Mpenza? * ya kele na balutiti 224. Bo basisaka mukanda yai mingi-mingi sambu na kusadisa bantu na kubakisa malongi ya luyantiku ya Biblia. Yo kele na malongi ya me tala Nzambi, Yezu Kristu, bampasi ya bantu, lufutumuku, kisambu mpi malongi mingi ya nkaka.

 Inki ntangu mpi nki kisika kulonguka yai lenda salama?

Kulonguka lenda salama na ntangu mpi na kisika ya nge me zola.

Kulonguka ke salaka bangunga ikwa?

Bantu mingi ke zolaka kulonguka Biblia kiteso ya ngunga mosi konso mposo. Kansi, ntangu ya kulonguka ke sobaka. Beto ta yidika ntangu yango sambu yo wakana ti manaka na nge. Bantu ya nkaka ke longukaka minuta 10 to 15 konso mposo.

Yo ke lombaka mbongo ikwa sambu na kulonguka Biblia?

Kulonguka mpi mukanda ya kulongukila kele ya ofele. Yo ke wakana ti ntuma yai ya Yezu pesaka balongoki na yandi: “Beno me baka ya ofele, beno pesa mpi ya ofele.”—Matayo 10:8.

Kulonguka ke salaka bangonda ikwa?

Nge mosi ta pona mingi ya ntangu ya nge ta longukaka. Mukanda Inki Biblia Kelongaka Mpenza? kele ti bakapu 19. Nge lenda longuka kapu mosi to bakapu yonso na vitesi ya nge me zola.

Keti mono fwete kuma Mbangi ya Yehowa?

Ve. Beto ke zabaka nde konso muntu kele ti nswa ya kupona mambu yina yandi fwete kwikila. Kansi, bantu yina ke bakaka nzayilu ya luyantiku ya Biblia lenda baka lukanu ya mbote.

 Inki kisika mono lenda baka bansangu mingi?

Site Internet na beto jw.org ke pesa bansangu ya siki-siki ya me tala balukwikilu mpi bisalu ya Bambangi ya Yehowa.

Inki mutindu mono lenda lomba nde muntu mosi kulonguka ti mono Biblia?

• Fulusa formilere ya kele na www.ps8318.com.

•  

• Solula ti Bambangi ya Yehowa ya kele pene-pene na nge mpi nge lenda sosa “Bambangi ya Yehowa” na listi ya banimero ya telefone ya bwala na beno.