Mono yelaka na Ancram, mbanza mosi ya fioti na nordi ya New York, na États-Unis. Mbanza yai vandaka ti ba-ferme mingi ya bo ke sansaka bitwisi. Yo vandaka ti bangombe mingi kuluta bantu.

Dibuta na beto vandaka kusambila na dibundu mosi mpamba ya vandaka na mbanza yai. Konso Lumingu na suka, nkaka ya bakala vandaka kudipa basapatu na mono. Mono vandaka kukwenda na nzo-nkanda ya Lumingu ti Biblia ya fioti ya mpembe yina nkaka na mono ya nkento pesaka mono. Bo longaka mono ti bampangi na mono nde beto fwete sala kisalu ngolo, kuzitisa bantu, kusadisa bo mpi kumonisa ntonda na Nzambi sambu na balusakumunu na yandi.

Ntangu mono yelaka, mono bikaka dibuta na beto mpi kumaka longi. Mono vandaka ti bangiufula mingi ya me tala Nzambi mpi luzingu. Bana na mono ya nkaka ya nzo-nkanda vandaka mayele kansi bankaka ve. Mpi yo lombaka nde bana yina vandaka ve mayele kusala ngolo na nzo-nkanda. Bana ya nkaka vandaka ti bifu na nitu kansi bankaka ve. Mono vandaka kumona mambu yai kukonda lunungu. Bantangu ya nkaka, bibuti ya bana yina vandaka mayele ve vandaka kutuba nde: “Yai mutindu Nzambi zolaka nde bana na beto kuvanda.” Mono vandaka kudiyula kikuma yina Nzambi ke pesaka nzila nde babebe ya nkaka kubutuka ti bifu. Nkutu, babebe ke salaka ve ata kima mosi ya mbi.

Mono vandaka kudiyula mpi nde ‘Inki kima ya mfunu mono lenda sala na luzingu na mono?’ Mono vandaka kumona nde luzingu na mono vandaka kuluta nswalu. Mono yelaka na dibuta mosi ya mbote, longukaka na banzo-nkanda ya mbote mpi ntangu yina, mono vandaka kusala kisalu ya mono vandaka kuzola mingi. Kansi, mono vandaka kumona luzingu na mono mpamba. Mono vandaka kuyindula kukwela, kuvanda ti nzo ya kitoko, kubuta bana mpi kulanda kusala kisalu tii kuna mono ta nuna mpi ta kwenda na nzo ya minunu. Mono vandaka kudiyula kana mono lenda tula ntima kaka na luzingu yai.

Na nsungi mosi ya mvula, mono tambulaka na Eropa ya mvimba ti banduku na mono ya nkaka ya balongi. Beto kwendaka na Abbaye de Westminster, na Notre-Dame de Paris, na Vatican, mpi na banzo-nzambi mingi ya fioti-fioti. Mono yulaka bangiufula na mono na bisika yai yonso ya mono kwendaka. Ntangu mono vutukaka na Sloatsburg, na New York, mono kwendaka diaka na mabundu mingi. Kansi, ata dibundu mosi ve pesaka bamvutu ya mbote na bangiufula na mono.

 Kilumbu mosi, mwana ya nzo-nkanda mosi ya bamvula 12 kwisaka pene-pene na mono mpi yulaka mono bangiufula tatu. Ntete, yandi yulaka mono kana mono zabaka nde yandi kele Mbangi ya Yehowa. Mono tubaka nde ee. Ya zole, yandi yulaka mono kana mono ke zola kuzaba mambu mingi ya me tala Bambangi ya Yehowa. Mono tubaka diaka nde ee. Ya tatu, yandi yulaka mono kisika yina mono vandaka kuzinga. Ntangu mono pesaka yandi adresi na mono, yandi bakisaka nde mono ke vandaka ve ntama ti nzo na bo. Mono zabaka ve nde bangiufula tatu ya mwana-nkento yai ya fioti ta soba luzingu na mono kimakulu.

Na nima, yandi kwisaka na nzo na mono na velo, mpi beto yantikaka kulonguka Biblia. Mono yulaka yandi bangiufula yina mono vandaka kuyula bantwadisi mingi ya mabundu. Yandi swaswanaka ti bo sambu yandi songaka mono bamvutu ya pwelele mpi ya mbote na Biblia na mono. Mono zabaka ve bamvutu ya mutindu yai na ntwala!

Mambu ya mono longukaka na Biblia pesaka mono kiese mingi kibeni. Ntangu mono tangaka mukanda ya 1 Yoane 5:19, yo simbaka ntima na mono. Verse yai ke tuba nde: “Nsi-ntoto ya mvimba kele na nsi ya kiyeka ya muntu ya mbi.” Mono yitukaka ntangu mono zabaka nde Satana muntu ke vandaka na kisina ya bampasi na beto kansi Nzambi ve. Mono zabaka mpi nde Nzambi ta manisa bampasi yango. (Kusonga 21:3, 4) Mono bakisaka nde Biblia ke tubaka mambu mbote kana muntu ke tendula yo mbote-mbote. Ata Mbangi ya Yehowa yina longukaka ti mono Biblia vandaka ti bamvula 12 mpamba, mono bakisaka nde kieleka ke bikalaka kaka kieleka ata muntu ya inki mutindu ke longa yo.

Ata mpidina, mono vandaka na mfunu ya kuzaba kana Bambangi ya Yehowa ke sadilaka mambu yina bo ke longaka. Mu mbandu, mwana-nkento yai tubaka nde Bakristu ya kieleka ke monisaka bikalulu bonso ntima-nda mpi ntima ya mbote. (Bagalatia 5:22, 23) Mono bakaka lukanu ya kumeka yandi sambu na kuzaba kana yandi ke monisaka bikalulu yai. Yo yina, kilumbu mosi, mono vutukaka na nzo na retare sambu na kuzitisa ve ntangu yina beto ke longukaka. Mono vandaka kudiyula nde: ‘Keti yandi ta vingila mono? Mpi kana yandi vingila mono, keti yandi ta wa makasi sambu mono me kuma na retare?’ Ntangu mono kotaka na lupangu na kamio, mono monaka mwana-nkento yango ke vingila mono na ntwala ya nzo. Yandi kwisaka ntinu na kamio na mono mpi tubaka nde: “Mono zolaka kuvutuka na nzo mpi kuzabisa mama nde beto binga bantu ya lupitalu mpi bapolisi sambu na kuzaba kana nge kele mbote, sambu nge ke vutukaka ve na retare na ntangu ya beto ke longukaka. Mono vandaka kudiyangisa mingi sambu na nge!”

Kilumbu mosi, mono yulaka yandi ngiufula yina mono monaka nde mwana ya bamvula 12 lenda kuka ve kupesa mvutu. Mono zolaka kuzaba kana yandi ta pesa kibeni mvutu. Ntangu mono yulaka yandi ngiufula, yandi talaka mono na dikebi yonso mpi tubaka nde: “Ngiufula yai kele mpasi. Mono ke sonika yo sambu na kuyula bibuti na mono.” Ntangu yandi kwisaka na mbala ya nima sambu beto longuka, yandi nataka nimero mosi ya Nzozulu ya Nkengi yina vandaka ti mvutu ya ngiufula na mono. Diambu ya bendaka dikebi na mono na Bambangi ya Yehowa kele nde mikanda na bo pesaka bamvutu ya Biblia na bangiufula na mono yonso. Mono landaka kulonguka ti mwana yango mpi na nima ya mvula mosi, mono bakaka mbotika mpi kumaka Mbangi ya Yehowa. *

Ntangu mono bakaka bamvutu ya mbote na bangiufula na mono, mono kumaka ti nzala ya kuzabisa yo bantu ya nkaka. (Matayo 12:35) Na luyantiku, bantu ya dibuta na mono mengaka mono sambu na dibundu na mono ya mpa. Kansi na nima, bo sobaka mabanza na bo malembe-malembe. Na ntwala nde mama kufwa, yandi yantikaka kulonguka Biblia. Ata yandi fwaka na ntwala ya kubaka mbotika, mono ke ndima nde yandi bakaka lukanu ya kusadila Yehowa.

Na mvu 1978, beto kwelanaka ti Elias Kazan, Mbangi mosi ya Yehowa. Na mvu 1981, bo bingaka beto na kusala na Betele ya États-Unis. * Diambu ya mawa kele nde na nima ya kusala na betele bamvula iya mpamba, Elias fwaka. Ata mono bikalaka mufwidi, mono landaka kusala kisalu na mono na Betele. Yo sadisaka mono na kutula dikebi na diambu mosi mpi yo lembikaka mono.

Na mvu 2006, Richard Eldred, mpangi mosi ya dibuta ya Betele kwelaka mono. Beto ke landaka kusala kisalu na beto na Betele na kiese yonso. Sambu mono me zabaka kieleka ya me tala Nzambi, mono me monaka mpenza nde mono me bakaka bamvutu na bangiufula na mono mpi luzingu na mono me kumaka ti lukanu. Mambu yonso yantikaka na bangiufula tatu yina mwana-nkento mosi ya fioti yulaka mono.