Wĩnyihia nĩ kwaga mwĩtũgĩrio. Mũndũ mwĩnyihia ndanyararaga andũ arĩa angĩ. Ningĩ mũndũ o wothe ũtarĩ mũkinyanĩru na nĩ mwĩnyihia nĩ amenyaga mĩhaka yake.

Musa ndaigana gwĩtũgĩria nĩ ũndũ wa kũheo ũnene. Kaingĩ mũndũ angĩnenehio o hanini, nĩ amenyekaga o narua kana nĩ mwĩnyihia kana ti mwĩnyihia. Mwandĩki ũmwe wa karine ya ikũmi na kenda wetagwo Robert G. Ingersoll oigire atĩ njĩra ĩrĩa njega biũ ya kũmenya kana mũndũ nĩ mwĩnyihia nĩ kũrora ũrĩa ahũthagĩra ũnene o wothe ũrĩa angĩkorũo naguo. Ũndũ-inĩ ũcio, Musa nĩ aaigire kĩonereria kĩega mũno kĩa wĩnyihia. Na njĩra ĩrĩkũ?

Musa nĩ aanenehetio mũno tondũ Jehova aamũheete wĩra wa gũtongoria Aisiraeli. O na kũrĩ ũguo ũnene ũcio ndwatũmire Musa etũgĩrie. Kwa ngerekano, ta wĩcirie ũrĩa eekire rĩrĩa kwoimĩrire kĩũria kĩritũ kĩgiĩ ihooto cia magai. (Ndari 27:1-11) Kĩũria kĩu kĩarĩ kĩritũ mũno tondũ nĩ kĩngĩahutirie nginya njiarũa cia thutha-inĩ.

Musa angĩekire atĩa? Hihi nĩ angĩeciririe atĩ tondũ aarĩ mũtongoria wa Isiraeli nĩwe waagĩrĩire gũtua itua ũhoro-inĩ ũcio? Hihi nĩ angĩehokire ũũgĩ wake wa mũciarĩre, ũmenyeru wake wa mĩaka mĩingĩ, kana ũmenyo wake mũrikĩru wĩgiĩ mwĩcirĩrie wa Ngai?

No kũhoteke ũguo nĩguo mũndũ wa mwĩtũgĩrio angĩekire. No Musa ndaigana gwĩka ũguo. Bibilia ĩtwĩraga atĩ: “Musa agĩgĩtwarĩra Jehova ũhoro ũcio.” (Ndari 27:5) Ta rora ũndũ ũcio! O na thutha wa Musa gũtongoria rũrĩrĩ rũu ihinda rĩa mĩaka 40, eehokire o Jehova handũ ha kwĩĩhoka we mwene. Ũndũ ũcio ũratũteithia wega kuona atĩ Musa aarĩ mũndũ mwĩnyihia.

Musa ndeeyonaga ta arĩ o we waagĩrĩirũo nĩ kũheo ũnene. Nĩ aakenire rĩrĩa Jehova aaheire Aisiraeli angĩ ũhoti wa gũtungatĩra marĩ anabii hamwe nake. (Ndari 11:24-29) Rĩrĩa mũthoniwe aamũheire rĩciria rĩa gũcaria andũ angĩ mamũteithĩrĩrie kũruta wĩra ũmwe-rĩ, Musa arĩ na wĩnyihia nĩ eetĩkĩrire kũrũmĩrĩra rĩciria rĩu. (Thama 18:13-24) O na gũtuĩka aarĩ o na hinya kĩĩmwĩrĩ-rĩ, mũthia-inĩ wa ũtũũro wake nĩ oririe Jehova amũthurĩre mũndũ ũrĩa ũngĩaiyũkirie wĩra wa gũtongoria Aisiraeli thutha wake. Rĩrĩa Jehova aathurire Joshua, Musa amũnyitire mbaru na ngoro yake yothe, o na gũtuĩka aarĩ mũkũrũ gũkĩra Joshua. Eerire andũ marũmĩrĩre ũtongoria wa Joshua magĩthiĩ Bũrũri wa Kĩĩranĩro. (Ndari 27:15-18; Gũcokerithia Maathani 31:3-6; 34:7) Hatarĩ nganja, Musa onaga kĩrĩ gĩtĩo gũtongoria Aisiraeli ũthathaiya-inĩ. Ndeeciragia mũno ũhoro wa ũnene wake, ĩndĩ eeciragia ũrĩa andũ mangĩagunĩkire.

Tũtingĩenda gwĩtũgĩria atĩ tondũ nĩ tũheetwo ũnene mũna kana tondũ atĩ tũrĩ na ũgĩ wa mũciarĩre. Ririkana: Nĩguo tũhũthĩrũo nĩ Jehova, hingo ciothe wĩnyihia witũ wagĩrĩirũo gũkorũo ũkĩrũkĩte mohoti marĩa tũrĩ namo. (1 Samueli 15:17) Angĩkorũo kũna tũrĩ enyihia, nĩ tũrĩĩrutanagĩria kũhũthĩra ũtaaro ũyũ wa Bibilia: “Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene.”—Thimo 3:5, 6.

Ningĩ kĩonereria kĩa Musa nĩ kĩratũruta tũtikonage ũtongoria kana ũnene ũrĩa tũheetwo ũrĩ wa bata mũno.

Hihi nĩ tũgunĩkaga nĩ ũndũ wa kwĩgerekania na kĩonereria kĩa Musa kĩa wĩnyihia? Hatarĩ nganja! Twakũria wĩnyihia wa ma, nĩ tũtũmaga arĩa tũkoragwo nao maigue wega, tũgatũma magucĩrĩrio nĩ ithuĩ. Makĩria ma ũguo nĩ tũtũmaga Jehova Ngai atwende, o we ũrĩa wonanagia ngumo ĩyo ya goro mũno. (Thaburi 18:35) “Ngai nĩareganaga na arĩa etĩi, no arĩa menyihĩtie nĩamakinyagĩria Wega wake.” (1 Petero 5:5) Na githĩ kĩu ti gĩtũmi kĩega mũno gĩa kwĩgerekania na Musa!