“Kalunga okwa li peni eshi pa holoka oshiponga?”
“OVANHU OHAVE LIPULA KUTYA: KALUNGA OKWA LI PENI ESHI PA HOLOKA OUPYAKADI?” Eendjovo odo oda li da popiwa kuPope Benedict omuti-16, eshi a li ta talele po okamba yeenghwate yaAuschwitz, moPoland.
NGEENGE OPA HOLOKA OSHIPONGA, MBELA OWE LIPULILE NALE KUTYA, ‘KALUNGA OKWA LI PENI?’ ILE TASHI DULIKA WE LIPULA NGEENGE KALUNGA OKU NA KO NGOO NASHA NAAVE OMOLWOMAUPYAKADI OO WA SHAKENEKA MONGHALAMWENYO?
Otashi dulika naave u udite ngaashi Sheila, wokoUnited States. Nonande oukwaneumbo wavo owa li u hole oinima yopalongelokalunga, okwa ti: “Onda kala ndi na ohokwe muKalunga okudja kounona wange molwaashi oye Omushiti wetu. Ashike inandi kala ndi udite nda ehena popepi naye. Onda li ndi wete kutya oku wete nge, ashike oku li kokule. Inandi diladila nale kutya okutonde nge, ame natango kanda li nda itavela ngeenge oku na ko nasha naame.” Omolwashike Sheila a li e udite ngaho? Okwa ti: “Oukwaneumbo wetu owa li wa taalela omaupyakadi a shikulafana. Osha fa shi li ngaha kutya Kalunga ka li e na ko nasha nafye nandenande.”
Ngaashi Sheila, otashi dulika naave u kale u udite kutya Kalunga Omunaenghono adishe oko e li. Ashike otashi dulika u lipule ngeenge Kalunga oku na ko ngoo nasha naave. Omulumenhu omuyuki Job, oo a li a itavela kutya Omushiti oku na eenghono nounongo, naye okwa li e na omalimbililo. (Job 2:3; 9:4) Konima eshi Job a hangwa koiponga ya shikulafana nopehe na olufuwo, okwa pula Kalunga ta ti: “Omolwashike to holeke oshipala shoye ndele to tale nge, aame omutondadi woye?” — Job 13:24.
Ombiibeli otai ti ngahelipi? Mbela Kalunga oye e na okupewa ombedi omolwomaupyakadi oo hatu shakeneke? Mbela ope na oumbangi oo tau ulike kutya Kalunga oku na ko nasha novanhu aveshe nosho yo nomunhu keshe pauhandimwe? Pataleko lopanhu, mbela ope na ngoo omunhu ta dulu okushiiva ngeenge Kalunga oku na ko ngoo nasha nafye, e udite ko omaliudo etu, ha kala e tu wete noku tu kwafela ngeenge tu li momaupyakadi?
Moitukulwa tai shikula, ohatu ka tala nghee eshito tali tu hongo kutya Kalunga oku na ko nasha nafye. (Ovaroma 1:20) Opo nee, ohatu ka tala nghee Ombiibeli ya ulika kutya Kalunga oku na ko nasha nafye. Eshi ngoo to ende to mu “shiiva” okupitila meshito nosho yo mEendjovo daye, oto ka kala wa shilipalekwa kutya ote ku “file oshisho.” — 1 Johannes 2:3; 1 Petrus 5:7.
Otashi dulika yo u hafele oikundafanwa ei
OSHUNGONANGELO
Mbela Kalunga oku ku shii ngoo?
Oumbangi ulipi tau ulike kutya Kalunga oku na ko nasha nafye?
