ABRAHAM okwa li ko konima eshi pa pita omido 350 lwaapo okudja pEyelu laNoa. Tatekulululwa Abraham okwa li ha kala moshilando shedina Ur osho sha li sha punapala, nosha li moshilongo osho paife hashi ifanwa Irak. Nonande Abraham okwa li e na eitavelo la tongomana, eitavelo laye ola ka yelekwa pomhito imwe.

Jehova okwa li e mu lombwela a fiye po oshilongo shambulavo noku tembukile koshilongo osho a li ehe shii nale, kuKanaan. Abraham okwa dulika ndele ta i koshilongo osho nopehe na okwoongaonga. Okwa ya pamwe noukwaneumbo waye aushe, mwa kwatelwa omukulukadi waye Sara nosho yo omutekulu waye Lot. Osha li she va pula olule okufika medu laKanaan, omo va ka kala momatwali. Jehova okwa li a ninga ehangano naAbraham ndele te mu udanekele kutya ote ke mu ninga oshiwana shinene. Okwa li yo a lombwela Abraham kutya oiwana aishe kombada yedu otai ka nangekwa noupuna omolwaye nosho yo kutya oludalo laye otali ka fyuulula edu laKanaan.

Abraham naLot ova li va punapala, va li ve na eedi neengobe dihapu. Omolwohole yokuhelihola mwene, Abraham okwa efa Lot a hoolole oshitukulwa omo a hala oku ka kala. Lot okwa li a hoolola oshitukulwa osho sha li popepi nomulonga waJordan, osho sha li shi na oulifilo muwa, ndele ta tula popepi noshilando shedina Sodom. Ndele Ovasodom kava li ve na eenghedi; ova li hava nyono sha kwata moiti koshipala shaJehova.

Konima yefimbo, Jehova Kalunga okwa li a shilipaleka Abraham kutya oludalo laye otali ka hapupala ngaashi eenyofi. Abraham okwa li e lineekela eudaneko olo. Ndele nande ongaho, omukulukadi waAbraham omuholike okwa li ongadji. Eshi Abraham a li e na omido 99, ofimbo Sara a li te lishilile pomido 90, Kalunga okwa li e mu lombwela kutya Sara ota ka dala okaana okamati. Sara okwa ka dala okaana okamati, Isak, ngaashi ashike Jehova a li a udaneka. Abraham okwa li e na ovana vamwe, ndele Omuxupifi oo a li a udanekwa muEden okwa li ta ka dja muIsak.

Pefimbo opo, Lot noukwaneumbo waye ova li hava kala muSodom, ndele omuyuki Lot ka li ngaashi ovakalimo vomoshilando osho ovo va li vehe na eenghedi. Eshi Jehova a li a tokola okuhanauna po Sodom, okwa li a tumina Lot ovaengeli ve ke mu londwele shi na sha nokuhanaunwa po kwaSodom oko kwa li poduka. Ovaengeli ovo ova li va ladipika Lot noukwaneumbo waye va ye onhapo okudja muSodom novaha tale konima. Opo nee Kalunga okwa lokifila Sodom noshishiindalando shasho shikolokoshi Gomorra omundilo nosulfuri nokuhanauna po ovakalimo aveshe vomoilando oyo. Lot novanakadona vaye vavali ova li va xupa. Ashike omukulukadi waLot okwa li a tala konima, tashi dulika a li ta diladila shi na sha noinima oyo a fiya po. Onghee hano, okwa fila ondjilakati molwaashi ka li a dulika.

— Oshileshwa eshi osha kanghamena kuGenesis 11:10–19:38.