KONIMA eshi Simson a fya, Samuel oye a li omuprofeti nomutokolipangeli muIsrael. Ovaisrael ova kala tave mu fininike kutya navo ova hala okukala nohamba yopanhu ngaashi oiwana oyo ya li ye va dingilila. Nonande Jehova ka li a hafela eindilo la tya ngaho, okwa li a lombwela Samuel a dimine eindilo lavo. Kalunga okwa li a hoolola omulumenhu omulininipiki wedina Saul oye a ninge ohamba yavo. Ndele konima yefimbo, ohamba Saul oya ka ninga omulinenepeki nokaya li vali hai dulika kuKalunga. Onghee hano, Jehova okwa li a kufa Saul ouhamba nokwa li a lombwela Samuel a nangeke po ohamba imwe, omulumenhu omunyasha wedina David. Ndele opa li tapa ka pita omido dihapu fimbo David ina hovela okupangela e li ohamba yaIsrael.

Ofimbo David a li tashi dulika e na omido omulongo nasha, okwa li a ka talela po ovamwaxe kolwoodi ovo va li metangakwaita laSaul. Etangakwaita alishe laSaul ola li la tila omukwaita umwe omutondi omutongolume wedina Goljat, oo a li te va sheke nota sheke Kalunga kavo. Molwaashi David okwa li e shi handuka, okwa li a dimina oku ka lwifa omutondi oo. David okwa li a ya a ka lwife omutondi waye oo a li e na ofika youle weemeta 3 lwaapo, e na ashike oshiumbifo noumanya. Eshi Goljat a li ta sheke David, David okwa li e mu lombwela kutya ye okwa homata e mu dule, molwaashi ye okwa li te ke mu lwifa medina laJehova Kalunga. David okwa li a dipaa Goljat nokamanya kamwe akeke ndele ta tete ko omutwe womutongolume oo neongamukonda laye mwene, sha hala okutya, eongamukonda laGoljat. Opo nee etangakwaita lOvafilisti ola li la ya onhapo koumbada.

Potete, Saul okwa li a kuminwa ouladi waDavid nokwa li e mu ninga ondjai yetangakwaita laye. Ndele Saul okwa ka twila neenghono David ondubo omolwokupondola kwaye. David okwa li a ya Saul onhapo nokwa kala omido dihapu e li onhauki. Ndele nande ongaho, David okwa kala omudiinini kohamba Saul oyo ya li ya hala oku mu dipaa, molwaashi okwa li e shii kutya oya li ya nangekwa po kuJehova Kalunga. Hauxuuninwa, Saul okwa ka fila molwoodi. Konima eshi Saul a fya, David okwa ka ninga ohamba, ngaashi ashike Jehova a li a udaneka.

Ohamba David oya li ya halelela okutungila Jehova otembeli. Ndele Jehova okwa li a lombwela David kutya umwe womoludalo laye oye a li te ke mu tungila otembeli. Omonamati waDavid, Salomo, oye a ka tungila Jehova otembeli. Ndele nande ongaho, Jehova okwa li a nangeka noupuna David, a li a ninga ehangano naye. Pakanghameno lehangano olo, Jehova okwa li a udanekela David kutya epata laye otali ka kala epata leehamba la yooloka ko kumakwao. Mepata olo omo mwa li tamu ka dja Omuxupifi ile Oludalo olo la li la udanekwa muEden. Omuxupifi oo ile Oludalo olo ola li tali ka ninga Messias, osho tashi ti “Omuvaekwa,” oo a nangekwa po kuKalunga. Jehova okwa li a udaneka kutya Messias ota ka ninga Omupangeli wepangelo ile wOuhamba oo tau ka kalelela.

Molwaashi David okwa li a pandula unene, okwa li a ongela oitungifo ihapu noinima ikwao i na ondilo i longifwe mokutunga otembeli. Okwa li yo a tota omapsalme mahapu a nwefwa mo. Eshi a li pokufya, okwa li a popya a ti: “Omhepo yOmwene tai popi muame, neendjovo daye di li kelaka lange.” — 2 Samuel 23:2.

— Oshileshwa eshi osha kanghamena kuSamuel wo-1 nomuti-2; Omafimbo o-1; Jesaja 9:6; Mateus 21:9; Lukas 1:32; nosho yo Johannes 7:42.