Ikittunnguit aqqutigalugit inuppassuit nerisinneqarput
“[Jiisusip timiusat] aggorlugit ajoqersukkanut tunniuppai; taakkualu inunnut agguaappaat.” — MATT 14:19.
1-3. Betsajdap eqqaani Jiisusip inuppassuarnik nerisitsinera oqaluttuariuk. (Allaaserisap aallaqqaataani assiliaq takuuk).
UKIUMI 32-mi poorskip nalliutingajalernerani pisoq takorlooruk. (Matthæusi 14:14-21 atuakkit). Angutit 5000-it missaat arnat meeqqallu ilanngunnagit illoqarfeeqqap Betsajdap, Galilæap Tasersuata avannaaniittup, eqqaanut Jiisusi ajoqersugaalu malippaat.
2 Jiisusip inuppassuit takugamigit nalligingaalerpai, napparsimasortaallu ajorunnaarsippai Guutillu naalagaaffia pillugu assigiinngitsorpassuarnik ilinniartillugit. Unnulermat ajoqersukkat Jiisusi oqarfigaat inuit illoqarfeeqqanut qanittuniittunut aallarteqqullugit nerisassaminnik pisiniarsinnaaniassammata. Jiisusilli ajoqersukkani ima oqarfigai: “Ilissi nerisassaannik tuniniarsigit!” Jiisusip oqaasii tupigusuutigisimassavaat annikitsuararsuarnimmi nerisassaateqarput — taamaallaat timiusat tallimat aalisagaaqqallu marluk nassaramikkit.
3 Jiisusi misiginneqataanini kajumississutigalugu tupinnartuliorpoq. Tupinnartuliaq taanna iivangkiiliumik allattunit tamanit allaatigineqarpoq. (Mark 6:35-44; Luk 9:10-17; Joh 6:1-13) Jiisusip ajoqersukkani oqarfigai inuit oqarfigeqqullugit ilaat 50-ikkuutaarlutik ilaallu 100-ikkuutaarlutik ivigarissumut qorsuusumut issaassasut. Jiisusip qinunikkut qujareerami timiusat aalisakkallu aggorpai. Taava Jiisusip nerisassat inunnut nammineq tunniunnagit “ajoqersukkanut tunniuppai; taakkualu inunnut agguaappaat”. Tupinnartuliornikkut inuit tamarmik naammattorsuarnik nerisassaqalerput! Maluginiarnarpoq Jiisusip ikittunnguit — ajoqersukkani — aqqutigalugit inuppassuit nerisikkai. *
4. (a) Jiisusip nerisassanik qanoq ittunik tunisisarnissaq pingaartinneruaa, aamma sooq? (b) Allaaserisami matumani tulliuttumilu suna sammissavarput?
4 Jiisusip anersaakkut nerisassanik tunisisarnissani pingaartinnerungaarpaa. Nalunngilaa anersaakkut nerisassat, sallusuissutit Guutip oqaasianiittut, naassaanngitsumik inuulersitsisinnaasut. (Joh 6:26, 27; 17:3) Soorlu Jiisusip misiginneqataanini kajumississutigalugu inuppassuit timiusanik aalisakkanillu tunigai, taamatuttaaq misiginneqataanini kajumississutigalugu piffissangaatsiaq atorlugu ajoqersukkani ilinniartittarpai. (Mark 6:34) Nalunngilaali sivikitsuinnarmik nunarsuarmiittussaalluni ungasinngitsukkullu qilaliartussaalluni. (Matt 16:21; Joh 14:12) Jiisusip qilaliareeruni ajoqersukkani nunarsuarmiittut qanoq anersaakkut isumassortassavai? Inuit ikittunnguit aqqutigalugit inuppassuit anersaakkut nerisassaannik tunisassavai. Ikittunnguilli taakku kikkuuppat? Jiisusip ukiuni hundredeni siullerni ajoqersukkani nerisassanik qanoq tunisarai sammeqqaassavarput. Taava allaaserisami tulliuttumi apeqqut tamatsinnut immikkut pingaarutilik una sammissavarput: Ullumikkut inuit ikittunnguit Kristusip nerisassanik tunisarumalluta atortagai kikkuunersut qanoq paasisinnaavarput?
Inuit ikittunnguit aqqutigalugit inuppassuit nerisinneqarput (Immikkoortoq 4 takuuk)
JIISUSIP IKITTUNNGUIT TOQQARPAI
5, 6. (a) Jiisusi ajoqersukkami nerisassanik tunineqartuarnissaat isumagiumallugu qanoq pingaarutilimmik aalajangiiva? (b) Jiisusip apustilit akisussaaffeqalernissaannut qanoq piareersarpai?
5 Ilaqutariinni ittuusup akisussaassuseqartup toqussagaluaruniluunniit ilaquttami pilersorneqartuarnissaat isumagissavaa. Tamatumunnga assingusumik nunarsuarmiitilluni Jiisusip — qilaliarnissami kingorna ilagiinnut kristumiunut niaquusussap — ajoqersukkami anersaakkut pilersorneqartuarnissaat isumagaa. (Ef 1:22) Assersuutigalugu Jiisusi toqunissani ukiut marluk missaat sioqqullugu pingaarutilimmik aalajangiivoq. Inuit ikittunnguit kingusinnerusukkut inuppassuarnik nerisitsisussat siulliit toqqarpai. Qanoq pisoqarnersoq sammeriartigu.
6 Unnuaq tamaat qinoreerami Jiisusip ajoqersukkani qaaqquai taakkunanngalu aqqaneq-marluk apustilitut toqqarlugit. (Luk 6:12-16) Ukiuni marlunni tulliuttuni aqqaneq-marluk taakku attaveqarluarfigalugillu oqaatsimigut iliuutsimigullu ilinniartittarpai. Nalunngilaa suli ilikkagassarpassuaqartut, taamaattumillu suli ‘ajoqersukkatut’ taaneqartarput. (Matt 11:1; 20:17) Pingaarutilinnik immikkut siunnersortarlugillu oqaluussinermi ilinniartittarpai. (Matt 10:1-42; 20:20-23; Luk 8:1; 9:52-55) Erseqqippoq nunarsuarmiitilluni Jiisusip toqunissami qilaliarnissamilu kingorna apustilit akisussaaffeqalernissaannut piareersarai.
7. Jiisusip apustilit pingaarnertut sumik akisussaaffeqassasut qanoq ersersippaa?
7 Apustilit suna akisussaaffigilissavaat? Piinsip ullua qanilliartortillugu paasinarsivoq apustilit nakkutilliisutut kiffartortussaasut. Suna pingaarnertut isumagisussaavaat? Tamanna paasisinnaavarput Jiisusip makititaanermi kingorna apustilimut Petrusimut oqaasii atuarutsigit. (Johannesi 21:1, 2, 15-17 atuakkit). Apustilit allat ilaat najuutsillugit Jiisusip Petrusi ima oqarfigaa: “Savaaraatikka nerlersukkit.” (NW) Jiisusip oqaasiinit paasisinnaavarput apustilit ikittunnguanut inuppassuarnik anersaakkut nerisitsisartussanut ilaasut. Jiisusip oqaasiinit aamma erserpoq ‘savaaraatini’ asangaarai! *
PIINSIP ULLUANIILLI INUPPASSUIT ANERSAAKKUT NERISINNEQARTALERPUT
8. Qanoq erserpa piinsip ulluani kristumiunngorlaat kikkut aqqutigalugit Kristusimit nerisassanik tunineqartarnertik nalunngikkaat?
8 Ukiumi 33-mi piinsip ulluaniilli Kristusip qilaliarsimasup apustilit aqqutigalugit ajoqersukkani tanitat allat anersaakkut nerisassaannik tunisalerpai. (Apustilit Suliaat 2:41, 42 atuakkit). Juutit juutillu upperisaannut ilanngussimasut ulloq taanna kristumiunngortut tanitat nalunngilluinnarpaat kikkut aqqutigalugit anersaakkut nerisassanik tunineqartarlutik. Tatiginnilluinnarlutik “apustilit ajoqersuinerat ... aalajangerfigaat”, imaluunniit ilumoorfigaat. Kristumiunngorlaat taakku anersaakkut kaapput, nalunngilluinnarpaallu kikkunnit sallusuissummik ilinniartinneqarsinnaallutik. Taakkua apustilit Jiisusip oqaasiinik iliuusiinillu allassimaffinnillu Jiisusimut tunngasunik nassuiaanerat upperilluinnarpaat. * — ApS 2:22-36.
9. Qanoq erserpa apustilit pingaarnertut sumik akisussaaffeqarnertik ilisimaarigaat?
9 Apustilit Jiisusip savaataanik anersaakkut nerisitsisarnissartik pingaarnertut akisussaaffigalugu ilisimaaraat. Assersuutigalugu maluginiaruk ajornartorsiut ilagiinni pilersinneqaqqammertuni avissaartuutitsisinnaasoq qanoq iliuuseqarfigigaat. Ilagiinniittut ilaasa mamiagaat ullut tamaasa nerisassanik agguaanermi uillarnerit grækerisut oqaluttut uillarnernit hebræerisut oqaluttunit sanilliullugit tunulliunneqartarnerat. Apustilit qanoq iliorpat? Ilagiinniittut pisariaqartitsisut tamarmik nerisassanik tunineqartarnissaat qulakkeerniarlugu qatanngutinik angutinik anersaakkut inersimalluartunik arfineq-marlunnik toqqaapput. Jiisusi tupinnartuliornikkut inuppassuarnik nerisitsimmat apustilit amerlanersaat nerisassanik tunioraanermi ikiueqataasimapput. Maannakkulli ilagiinnut anersaakkut nerisassanik tunisisarnissartik pingaartinneruaat. Taamaalillutik piffissartik tamaat ‘oqaaseq kiffartuutigisinnaavaat’. — ApS 6:1-6.
10. Kristusip apustilit utoqqaanertallu Jerusalemimiittut qanoq atorpai?
10 Ukiumi 49-mi apustilit suli inuusut aamma utoqqaanertat allat piumasaqaatinik eqqortitsisut siulersuisoqatigiinnut ilaasortaapput. Biibilimi taakku apustilitut utoqqaanertatullu Jerusalemimiittutut eqqartorneqarput. (Apustilit Suliaat 15:1, 2 atuakkit). Kristusip ilagiinnut niaquusup kristumiut ajoqersuutaannut tunngatillugu aalajangiisarnermut Guutillu naalagaaffia pillugu nutaarsiassamik nuannersumik oqaluussissutiginninnermi ilinniartitsinermilu siulersuinermut angutit ikittut taakku atorpai. — ApS 15:6-29; 21:17-19; Kol 1:18.
11, 12. (a) Qanoq erserpa ukiuni hundredeni siullerni Kristusip ilagiinnut anersaakkut nerisassanik tuniseriaasia Jehovamit pilluaqquneqartoq? (b) Inuit qanoq nalunngilaat kikkut aqqutigalugit Kristusip ilagiit anersaakkut nerisassaannik tunisarai?
11 Ukiuni hundredeni siullerni Kristusip siulersuisoqatigiit aqqutigalugit anersaakkut nerisassanik tuniseriaasia Jehovamit pilluaqquneqarpa? Aap! Tamanna qanoq nalunngilarput? Apustilit Suliaanni ima allassimavoq: “[Apustilip Paulusip angalaqataasalu] illoqarfinni aqqusaakkaminni ilagiit ilisimatittarpaat ileqqoreqqusanik apustilit utoqqaanertallu Jerusalemimiittut atortussanngortissimasaannik taakkulu maleruaqqusarlugit. Taamaalillutik ilagiit uppernerminni nakussatsitaasarput ullullu tamaasa amerliartorlutik.” (ApS 16:4, 5) Maluginiaruk ilagiit siulersuisoqatigiinnik Jerusalemimiittunik ilumoorfiginnillutik tapersersuigamik uppernikkut nakussatsinneqarlutillu amerliartortut. Tamatuminnga uppernarsarneqarpoq Kristusip ilagiinnut anersaakkut nerisassanik tuniseriaasia Jehovamit pilluaqquneqartoq. Eqqaamasariaqarparput Guutip innuttai aatsaat Jehovamit pilluaqquneqarunik eqqisseqatigiissinnaallutillu amerliartorsinnaasut. — Uss 10:22; 1 Kor 3:6, 7.
12 Maannamut paasivarput Jiisusip anersaakkut nerisassanik tuniseriaasiata inuppassuarnik nerisitsinera assigigaa: Jiisusi ikittunnguit aqqutigalugit inuppassuarnik nerisitsivoq. Kikkut aqqutigalugit ilagiit anersaakkut nerisassanik tunisarai taamanikkut ersarippoq. Assersuutigalugu apustilit siulersuisoqatigiinnut siullernut ilaasortaasut Jehovap pilluaqqusineranut takussutaasumik tupinnartuliorsinnaatitaasimapput. Apustilit Suliaat 5:12-imi ima allassimavoq: “Nalunaaqutiliat tupinnartuliallu amerlasuut apustilit assaasigut inunni pisarput.” * Taamaattumik taamani kristumiunngortut kikkut aqqutigalugit Kristusi savaaraatiminik nerisitsisarnersoq apeqqutigisariaqanngilaat. Ukiulli hundredet siulliit qaangiummata pissutsit allanngorput.
Ukiuni hundredeni siullerni erserpoq Jiisusip kikkut aqqutigalugit ilagiit anersaakkut nerisassanik tunisarai (Immikkoortoq 12 takuuk)
NAASUPILUIT QAJUUSIASSANIT AMERLANERUPPUT
13, 14. (a) Jiisusip suna mianersoqqussutigaa, oqaasiilu qanga eqquukkiartulerpat? (b) Ilagiit qanoq saassunneqarpat? (Kisitsisilersukkat nassuiaataat takuuk).
13 Jiisusip siulittuutigaa ilagiit kristumiut saassunneqarumaartut. Eqqaamajuk Jiisusi naasupilunnik qajuusiassanillu assersuusiamini mianersoqqusimmat naasupiluit (kristumiut ilumuunngitsut) siaruarterneqarumaartut qajuusiassat (kristumiut tanitat) akornanni. Jiisusi oqarpoq katersuiffiup tungaanut, tassa ‘pissutsit aaqqissuussaanerata naggataatungaanut’ (NW), taakku naajartoqatigiissasut. (Matt 13:24-30, 36-43) Jiisusip oqaasii sivitsunngitsoq eqquukkiartulerput. *
14 Apustilit nalaanni tunussineq aallartereersimavoq, eqqunngitsunilli ilinniartitsisut ilagiinnik sunniiniarnerat apustilinit ‘akornuserneqarpoq’. (2 Th 2:3, 6, 7) Apustilili kingulleq toqummat tunussineq ilagiinnut tamanut siaruaappoq, naasupiluillu qajuusiassallu ukiorpassuarni naajartoqatigiipput. Naajartoqatigiinnerup nalaani naasupiluit amerlanerujartorput qajuusiassallu ikiliartorlutik. Peqatigiissortaqanngilaq anersaakkut nerisassanik tunisisartunik. Tamannali allanngussaaq. Unali apeqqutaaginnarpoq: Qaqugu?
KATERSUIFFIMMI KIKKUT ANERSAAKKUT NERISITSISSAPPAT?
15, 16. Biibilimik Atuaqqissaartartut Allakkanik misissueqqissaarnerat qanoq kinguneqarpa, sunalu apeqqutaalerpa?
15 Qajuusiassat naasupiluillu naajartoqatigiinnerata naalernerani inuit ilaat sallusuissutinik Biibilimeersunik ilinniarusungaalerput. Eqqaamajuk 1870-ikkunni inuit ikittut Biibilimik Atuaqqissaartartunik taaneqartartut Biibili misissorniarlugu katersuuttalersut. Taakku kristumiuunerartut upperisarsioqatigiivisa arlaannut ilaanngillat. Biibilimik Atuaqqissaartartut sallusuissut paasiumallugu maniguullutik Guutip oqaasia misissoqqissaartarpaat. — Matt 11:25.
16 Biibilimik Atuaqqissaartartut Allakkanik misissueqqissaarnerat kinguneqarluarpoq. Angutit arnallu aalajaatsut taakku ajoqersuutit eqqunngitsut qulaarlugillu sallusuissut Guutip oqaasianeersoq allanut ilinniartitsissutigisarpaat. Biibililersaarutinik naqititsisarlutillu nunarsuaq tamakkerlugu nassiussuisarput. Anersaakkut kaattorpassuit Biibililersaarutit taakku atuareerlugit taakkunani allassimasut sallusuissutaanerannik qularunnaarsinneqarput. Ima aperisinnaavugut: Ukioq 1914 sioqqullugu Kristusip Biibilimik Atuaqqissaartartut savaatinik nerisitsinermut atorsimavai? Naamik. Qajuusiassat naasupiluillu suli naajartoqatigiipput, eqimattallu Kristusip anersaakkut nerisassanik tunisisartussai suli piariinngillat. Kristumiuunerartut kristumiunit ilumoortunit immikkoortinneqarnissaat suli piffissanngunngilaq.
17. 1914 aallarnerfigalugu sunik pingaarutilinnik pisoqarpa?
17 Soorlu allaaserisap matuma siuliani sammigipput, katersuiffik 1914-imi aallartippoq. Ukioq taanna aallarnerfigalugu arlalinnik pingaarutilinnik pisoqarpoq. Jiisusi kunnginngortinneqarpoq, ullullu kingulliit aallartipput. (Saqq 11:15) 1914-imiit 1919-ip aallartinnerata tungaanut Jiisusip Ataataatalu naalaffik anersaakkut ittoq misissuiffigalugulu minguiarpaat. * (Mal 3:1-4) Taava 1919-imiit qajuusiassanik katersuinermut piffissanngorpoq. Aamma Kristusip eqimattanik nerisassanik tunniussisartussanik toqqarnissaanut kiisami piffissanngorpoq!
18. Jiisusi sumik toqqaajumaarluni siulittuiva, ullullu kingulliit aallartimmata suna pingaarutilik apeqqutaalerpa?
18 Jiisusi naggatissaq pillugu siulittuutimini siulittuivoq ‘inussiamik piffissaq eqqorlugu nerisassanik tunisisartussamik’ toqqaajumaarluni. (Matt 24:45-47, NW) “Inussiaq” taanna kinaava? Soorlu ukiuni hundredeni siullerni pisimanermisut, Jiisusip ikittunnguit aqqutigalugit inuppassuit anersaakkut nerisissavai. Ullulli kingulliit aallartimmata pingaarutilik una apeqqutaalerpoq: Ikittunnguit taakku kikkuuppat? Apeqqut tamanna Jiisusillu siulittuutaa pillugu apeqqutit allat allaaserisami tulliuttumi akineqassapput.
^ par. 3 Immikkoortoq 3: Kingusinnerusukkut Jiisusip tupinnartuliornikkut angutit 4000-it missaat arnat meeqqallu ilanngunnagit nerisikkamigit nerisassat aamma “aggorpai ajoqersukkanullu tunniullugit, taakkualu inuppassuarnut agguaappaat”. — Matt 15:32-38.
^ par. 7 Immikkoortoq 7: Petrusi inuutillugu ‘savaaraatit’ nerisinneqartussat tamarmik qilaliarnissamik neriugisaqarput.
^ par. 8 Immikkoortoq 8: Kristumiunngorlaat ‘apustilit ajoqersuinerat aalajangerfigimmassuk’ isummersinnaavugut apustilit ajoqersuiuarsimassasut. Apustilit ajoqersuutaasa ilaat allakkani Guutimit isumassarsiarititaasuni, ullumikkut Kristumiut Allagaataat Grækerisuut-mik imaluunniit Testamentitaamik taaneqartartuni, allanneqarput.
^ par. 12 Immikkoortoq 12: Kristumiut apustiliunngitsut aamma anersaamit tupinnartuliorsinnaatinneqarput. Ilimanarporli anersaap tunissutaa tamanna apustilinit imaluunniit apustilit najuutsillugit amerlanertigut tunniunneqartartoq. — ApS 8:14-18; 10:44, 45.
^ par. 13 Immikkoortoq 13: Apustilip Paulusip oqaasiinit Apustilit Suliaanni 20:29, 30-miittunit erserpoq ilagiit avataanniit ilagiinniittuniillu saassunneqarumaartut. Siullermik, kristumiut ilumuunngitsut ( “naasupiluit”) kristumiunut ilumoortunut ‘tikiukkumaarput’. Aappassaanik, kristumiut ilumoortut akornannit tunussisunik ‘ilumoortuunngitsumik oqaluttunik saqqummersoqarumaarpoq’.
^ par. 17 Immikkoortoq 17: Takuuk atuagassiami matumani allaaserisaq: “Ullut tamaasa najorpassi”, qupp.11, immikkoortoq 6-imiittoq.
