“Kinaavami inussiaq aalajaallunilu silatooq?”
“Kinaavami inussiaq aalajaallunilu silatooq, naalagaata kiffaminut paarsisunngortitaa?” — MATT 24:45, NW.
1, 2. Ullumikkut Jiisusip kina aqqutigalugu nerisassanik tunisarpaatigut, aamma sooq taassuma kinaaneranik paasinninnissarput pingaaruteqarluinnarpa?
“QATANNGUTIT allaffigaassi allaaserisat aqqutigalugit pisariaqartitsinerpaaffinni ilissinnit pisariaqartitannik tunineqartarnikka kisissaanngimmata.” Taama qatanngutip arnap qujamasuutiginninnini qatanngutinut qullersaqarfimmi kiffartortunut allakkamini allaatigaa. Illit arnaq taanna isumaqatigaajuk? Amerlanersatta isumaqatigaat. Tamanna tupaallaatigissavarput? Naamik.
2 Piffissaq eqqorlugu anersaakkut nerisassanik tunineqartarnerput Jiisusip, ilagiinnut niaquusup, nerisassanik uagutsinnut tunniussisarnissaminik neriorsuisimaneranut uppernarsaataavoq. Kina aqqutigalugu taama iliortarpa? Jiisusip najuunnissaminut nalunaaqutit eqqartoramigit oqarpoq “inussiaq aalajaallunilu silatooq” aqqutigalugu kiffami “piffissaq eqqorlugu nerisassaannik” tunisarniarlugit. * (Matthæusi 24:45-47, NW, atuakkit). * Naggatissap nalaani inussiaq aalajaatsoq taanna aqqutigalugu Jiisusip ajoqersukkani ilumoortut nerisassaannik tunisarpai. Inussiap aalajaatsup kinaaneranik paasinninnissarput pingaaruteqarluinnarpoq. Taassumannga nerisassanik tunineqartarnerput anersaakkut peqqissutsitsinnut Guutimillu attaveqarnitsinnut aalajangiisuulluinnarpoq. — Matt 4:4; Joh 17:3.
3. Inussiaq aalajaatsoq pillugu assersuusiaq atuagassiaatitsinni atuagaatitsinnilu qanoq siornatigut nassuiarneqarsimava?
3 Taavami qanoq ililluta Jiisusip inussiaq aalajaatsoq pillugu assersuusiaa paasisinnaassagatsigu? Siornatigut atuagassiaatitsinni atuagaatitsinnilu ima allassimasoqarpoq: Ukiumi 33-mi piinsip ulluani Jiisusip inussiaq aalajaatsoq kiffaminut paarsisunngortippaa. Ukiumi 33-miilli kristumiut tanitat tamarmik piffissami qanorluunniit ilisukkut nunarsuarmi inuusut eqimattatut inussiamut assersuunneqarput. Tanitat taakku inuttut ataasiakkaatut aamma kiffanut assersuunneqarput. 1919-imi Jiisusip inussiaq aalajaatsoq “pigisaminut tamanut” — nunarsuarmi Guutip naalagaaffianut attuumassuteqartunut — paarsisunngortippaa. Assersuusiarli pillugu atuaqqissaareernikkut qinunikkullu tamatuminnga eqqarsaatiginneqqissaareernikkut paasinarsivoq Jiisusip inussiaq aalajaallunilu silatooq pillugu oqaasiinik paasinnittaaserput allanngortinneqartariaqartoq. (Uss 4:18) Assersuusiaq tamannalu uagutsinnut, qilammi inuulernissamik neriugisaqaraluarutta nunamiluunniit inuulernissamik neriugisaqaraluarutta, qanoq attuumassuteqarnersoq misissoriartigu.
ASSERSUUSIAQ QAQUGUKKUT EQQUUTITINNEQASSAVA?
4-6. Jiisusip inussiaq aalajaatsoq pillugu assersuusiaa aatsaat 1914-ip kingorna eqquutitinneqalersimaneranik isummernitsinnut suna tunngavigaarput?
4 Allassimaffiit ataqatigiinnerini erserpoq inussiaq aalajaallunilu silatooq pillugu assersuusiaq ukiumi 33-mi piinsip ulluani eqquutitinneqalerani naggatissap nalaani eqquutitinneqalersoq. Biibilimi allassimasut tunngavigalugit sooq taama isummernersugut sammeriartigu.
5 Inussiaq aalajaatsoq pillugu assersuusiaq Jiisusip ‘najuunnissaminut pissutsillu aaqqissuussaanerata naggataatungaanut nalunaaqutaasussaq’ pillugu siulittuutaanut ilaavoq. (Matt 24:3, NW) Siulittuut Matthæusi 24:4-22-mi allassimasoq marlutsigut — siullermik ukiumit 33-mit 70-imut aappaattullu nalitsinni annerungaartumik — eqquutitinneqarpoq. Tamanna isumaqarpa Jiisusip inussiaq aalajaatsoq pillugu oqaasii marloriarlutik eqquutitinneqassasut? Naamik.
6 Matthæusi 24:29-mit aallartittumit Jiisusip nalitsinni pisussat pingaarnertut eqqarsaatigai. (Matthæusi 24:29, 30, 42, 44 atuakkit). Naalliunnartoqangaarnissaani pisussat eqqartoramigit oqarpoq inuit “Inuup Ernera qilaap nuiaasigut aggersoq” isigiumaaraat. Ulluni kingullerni inuusussat eqqumajuarnissamut kajumissaarpai ima oqarfigalugit: ‘Naluarsi ulloq Naalakkassi tikiuffissaa’ aamma ‘Inuup Ernera tikiutissaaq nalunaaquttap-akunnerani ilimasuffiginngisassinni’. * Allassimaffiit ataqatigiinnerini erserpoq Jiisusip ulluni kingullerni pisussat eqqartoramigit assersuusiaq inussiamut aalajaatsumut attuumassuteqartikkaa. Taamaattumik isummersinnaavugut 1914-ip kingorna ullut kingulliit aallartimmata aatsaat inussiaq aalajaallunilu silatooq pillugu oqaasii eqquutitinneqalersut. Taamatut isummerneq sooq paasinarpa?
7. Katersuiffik aallartimmat apeqqut pingaarutilik suna akineqartariaqalerpa, aamma sooq?
7 Apeqqut una eqqarsaatigiuk: “Kinaavami inussiaq aalajaallunilu silatooq?” Ukiuni hundredeni siullerni taamatut aperinissamut pissutissaqanngingajappoq. Soorlu allaaserisap matuma siuliani sammereeripput apustilit tupinnartuliorsinnaallutillu Guutimit tapersersorneqarnermut uppernarsaataasutut allat tupinnartuliorsinnaalersissinnaavaat. (ApS 5:12) Taamaattumik kina Kristusimit siulersuisussanngortinneqarsimaneranik aperinissamut pissutissaqanngilaq. 1914-imili pissutsit allaanerulluinnarput. Ukiumi tamatumani katersuiffik aallartippoq. Kiisami naasupiluit qajuusiassanit immikkoortiterneqarnissaannut piffissanngorsimavoq. (Matt 13:36-43) Katersuiffik aallartimmat apeqqut una pingaarutilik akineqartariaqalerpoq: Jiisusimut ajoqersukkatut ilumoortuunerarlutillu kristumiuunerartut amerlaqimmata qajuusiassat — kristumiut tanitat — kikkuunersut qanoq ilisimaneqarsinnaava? Inussiaq aalajaatsoq pillugu assersuusiaq tamatumunnga akissutissarsissutigaarput. Kristusip ajoqersugai tanitat anersaakkut nerisassanik naammangaartunik pisarput.
INUSSIAQ AALAJAALLUNILU SILATOOQ KINAAGAMI?
8. Inussiamut aalajaatsumut ilaasortaasut kristumiuusariaqarnerat tanitat sooq pissusissamisuuginnarpa?
8 Inussiamut aalajaatsumut ilaasortaasut kristumiuusariaqarput tanitat nunarsuarmiittut. Taakku ‘palaseqatigiit kunngikkormiuusutut’ taaneqartarput taartumillu “qaamasuminut tupinnaqisumut nooqqullusi qaaqqusisup pissaaneranik” nalunaajaanissamut piginnaatinneqarlutik. (1 Petr 2:9) ‘Palaseqatigiinnut kunngikkormiuusunut’ ilaasortat sallusuissut pillugu uppeqatinik ilinniartitsinermut toqqaannartumik peqataasarnerat pissusissamisuuginnarpoq. — Mal 2:7; Saqq 12:17.
9. Tanitat kristumiut tamarmik inussiamut aalajaatsumut ilaasortaappat? Nassuiaruk.
9 Tanitat nunarsuarmiittut tamarmik inussiamut aalajaatsumut ilaasortaappat? Naamik. Tanitat ilaannaat uppeqatimik nunani tamalaaniittut anersaakkut nerisassaannik pilersueqataasarput. Qajuusiassat ilaat qatanngutaapput angutit tanitat najukkaminni ilagiinni kiffartortuusut utoqqaanertaasulluunniit. Oqaluussiffigisartakkami ilagiinnilu ilinniartitsisarput qullersaqarfimmiillu maleruaqquneqartunik aalajaallutik tapersersuisarlutik. Taakkuli nunarsuaq tamakkerlugu qatanngutigiissuarnut anersaakkut nerisassanik pilersueqataaneq ajorput. Tanitat ilaat aamma qatanngutaapput arnat maniguuttut, taakkuli ilagiinni ilinniartitsisunngorniarsarinavianngillat. — 1 Kor 11:3; 14:34.
10. Inussiaq aalajaallunilu silatooq kinaava?
10 Taavami inussiaq aalajaallunilu silatooq kinaava? Jiisusip inuit ikittunnguit aqqutigalugit inuppassuarnik nerisitsisarneratut qatanngutit angutit tanitat ikittunnguit Kristusip najuunnerani anersaakkut nerisassanik piareersaanermut pilersuinermullu toqqaannartumik peqataasut inussiamut ilaasortaapput. Ullussat kingulliit tamakkerlugit qatanngutit tanitat, inussiamut aalajaatsumut ilaasortaasut, qullersaqarfimmi kiffartoqatigiissimapput. Ukiuni kingullerni inussiaq tassaasimavoq Jehovap Nalunaajaasuisa Siulersuisoqatigiivi. Jiisusip assersuusiaani oqaatsip ‘inussiap’ ataasersiutaanera maluginiarnarpoq, tamannalu inussiap katitigaaneranik ersersitsivoq. Taamaattumik Siulersuisoqatigiit aalajangiussaat tamarmik ataatsimoorussaasarput.
KIFFAT KIKKUUPPAT?
11, 12. (a) Inussiaq aalajaallunilu silatooq sunut marlunnut paarsisunngortinneqarpa? (b) Qanga Jiisusip inussiaq aalajaatsoq kiffaminut paarsisunngortippaa, kikkullu toqqarpai?
11 Jiisusip assersuusiaani inussiap aalajaallunilu silatuup immikkoortunut marlunnut paarsisunngortinneqarnera maluginiarnarpoq. Siullermik kiffanut paarsisunngortinneqarpoq aappaattullu naalakkap pigisaanut tamanut paarsisunngortinneqarluni. Assersuusiaq naggatissap nalaani taamaallaat eqquutitinneqartussaammat paarsisunngoqqusinerit taakku marluk Jiisusip kunngisut pissaaneqarluni 1914-imi najuutilereernerata kingorna suliassiissutigineqassapput.
12 Qanga Jiisusip inussiaq aalajaatsoq kiffaminut paarsisunngortippaa? Tamanna akissutissarsiniarlugu 1914-imi — katersuiffiup aallartinnerani — pisut uterfigeqqissavavut. Siuliani eqqartoriikkatsitut taamani eqimattat amerlasuut kristumiuunerarsimapput. Jiisusip eqimattat sorliit inussiatut aalajaallunilu silatuunngortissavai paarsisunngortillugillu? Jiisusip Ataatanilu 1914-imiit 1919-ip aallaqqaataata-tungaanut naalaffik, imaluunniit anersaakkut pallorfiginninnermik aaqqissuussaq, misissuiffigiartorlugu tikimmassuk apeqqut tamanna akineqarpoq. * (Mal 3:1) Taakkua Biibilimik Atuaqqissaartartut, eqimattat ikittunnguit aalajaatsut, Jehovamik taassumalu oqaasianik uummatikkut iluunngarlutik upperinninnerminnik ersersitsisut iluaraat. Soorunami Biibilimik Atuaqqissaartartut minguiarneqarnissaminnik pisariaqartitsipput, piffissamili sivikitsumi misilinneqarnerminni minguiarneqarnerminnilu maniguuttuarput. (Mal 3:2-4) Taakku Biibilimik Atuaqqissaartartut aalajaatsut tassaapput qajuusiassat kristumiut ilumoortut. 1919-imi, piffissami anersaakkut eqeersarneqarfimmi, Jiisusip taakkunannga qatanngutit angutit tanitat piukkunnartut tassaalersippai inussiaq aalajaallunilu silatooq kiffaminullu paarsisunngortillugit.
13. Kikkut kiffanut ilaappat, aamma sooq?
13 Taavami kiffat kikkuuppat? Naatsumik oqaatigalugu taakku tassaapput nerisassanik pilersorneqartut. Aallaqqaammut kiffat tamarmik tanitaapput. Kingusinnerusukkulli savat allat amerlangaartut kiffanut ilaalerput. Massakkut savat allat ‘savaatini katersani ataatsini’, Kristusimit siulersorneqartuni, amerlanerussuteqarput. (Joh 10:16) Eqimattat taakku marluk inussiamit aalajaatsumit anersaakkut nerisassat piffissaq eqqorlugu tunniunneqartartut iluaqutigisarpaat. Ullumikkut Siulersuisoqatigiinnut ilaasortat inussiamut aalajaallunilu silatuumut ilaasortaasut aamma anersaakkut nerisassanik tunineqartarnissaminnik pisariaqartitsipput. Taamaattumik Jiisusimut ajoqersukkat ilumoortut allat assigalugit inuttut ataasiakkaatut kiffaanertik maniguullutik akueraat.
Qilammi nunarsuarmiluunniit inuunissamik neriugisaqaraluarutta tamatta kiffaavugut anersaakkullu piffissaq eqqorlugu nerisaqartarnissatsinnik pisariaqartitsisut
14. (a) Inussiaq aalajaatsoq sumik akisussaaffilerneqarpa, tamatumunngalu suut ilaappat? (b) Jiisusip inussiamut aalajaallunilu silatuumut suna mianersoqqussutigaa? (Takuuk ungalusaq “Inussiaagunili ajortoq . . . ”)
14 Jiisusip inussiaq aalajaallunilu silatooq pingaarutilimmik akisussaaffilerpaa. Biibilip nalaani inussiaq, imaluunniit pilittaq, tatigisaasoq illumi pisortaatitaasarpoq. (Luk 12:42) Inussiaq aalajaallunilu silatooq inoqutigiinnik uppertunik aqutsinissaminut akisussaaffilerneqarpoq. Pigisanik, oqaluussinermik, ataatsimeersuaararnerni ataatsimeersuarnernilu saqqummiunneqartussanik, oqaluussinermi aamma nammineq ilagiinnilu atorneqartussanik Biibililersaarusiornermik nakkutilliinerit akisussaaffimmut tamatumunnga ilaapput. Kiffat inussiamit katitigaasumit anersaakkut nerisassat tunniunneqartartut arlaannaalluunniit pinngitsoorsinnaanngilaat.
QAQUGU NAALAKKAP PIGISAANUT TAMANUT PAARSISUNNGORTINNEQASSAVA?
15, 16. Qaqugu Jiisusip inussiaq aalajaatsoq pigisaminut tamanut paarsisunngortissavaa?
15 Qaqugu Jiisusi siulittuutip immikkoortuata aappaanut — “pigisaminut tamanut” — paarsisunngortitsissava? Jiisusi ima oqarpoq: “Inussiaq taanna pilluassaaq naalakkami, tikiukkuni, taamaaliortoq naammattoorpani. Ilumut oqarfigaassi: Pigisaminut tamanut paarsisunngortissavaa.” (Matt 24:46, 47, NW) Maluginiaruk Jiisusip tikiutereernermi kingorna inussiarlu “taamaaliortoq”, tassa aalajaalluni anersaakkut nerisassanik pilersuisoq, naammattooramiuk siulittuutip immikkoortuata aappaanut paarsisunngortikkaa. Taamaattumik paarsisunngortitsinerit marluk akornanni piffissaq aalajangersimasoq ingerlasussaavoq. Jiisusip qanoq qaqugulu inussiaq pigisaminut tamanut paarsisunngortissaneraa paasisinnaajumallugu Jiisusi qaqugu tikiutissanersoq taassumalu pigisaanut suut ilaanersut ilisimaqqaartariaqarpavut.
16 Qaqugu Jiisusi tikiutissava? Allassimaffiit ataqatigiinnerinit akissutaa erserpoq. Eqqaamajuk allassimaffiit siuliini Jiisusip ‘tikiunnissaa’, imaluunniit ‘aggernissaa’, aaqqissuussaanerup matuma naggataani eqqartuussutiminik nalunaarutiginninnissaa naammassisitsinissaalu, eqqartorneqarmat. * (Matt 24:30, 42, 44) Taamaattumik inussiaq aalajaatsoq pillugu assersuusiami Jiisusip ‘tikiunnissaa’ eqqaaneqartoq naalliunnartoqangaarnissap ingerlanerani pissaaq.
17. Jiisusip pigisaanut suut ilaappat?
17 Jiisusip ‘pigisaanut tamanut’ suut ilaappat? Jiisusi oqarami “tamanut” pigisani nunamiittut kisiisa eqqarsaatiginngilai. Jiisusi qilammut tamarmut oqartussaavoq. Ima oqarpoq: “Qilammilu nunamilu pissaaneq tamarmi uannut tunniussaavoq.” (Matt 28:18; Ef 1:20-23) Naalagaaffik Missiarsikkoortoq pigisaanut ilaavoq, tamannalu 1914-imiilli pigisimavaa tamatumanilu ajoqersukkat tanitat naalakkersueqatigissavai. — Saqq 11:15.
18. Sooq Jiisusip pigisaminut tamanut paarsisunngortitsinini iluarissavaa?
18 Sammeriikkavut eqqarsaatigalugit qanoq isummersinnaavugut? Naalliunnartoqangaarnissaani Jiisusi eqqartuussiniarluni tikiukkuni inussiaq aalajaatsoq ilumoorluni piffissaq eqqorlugu anersaakkut nerisassanik kiffanut pilersuisoq naammattuussavaa. Tamatuma kingorna Jiisusip aappassaaneerluni — pigisaminut tamanut — paarsisunngortitsinini iluarissavaa. Inussiamut aalajaatsumut ilaasortaasut qilammi akissarsiassartik pigunikku, Kristusi naalakkersueqatigilerunikku, taakkununnga paarsisunngortinneqassapput.
19. Inussiaq aalajaatsoq tanitanut allanut sanilliullugu annerusumik qilammi akissarsisinneqassava? Nassuiaruk.
19 Inussiaq aalajaatsoq tanitanut allanut sanilliullugu annerusumik qilammi akissarsisinneqassava? Naamik. Ikittunnguanut akissarsiassatut neriorsuutigineqarsimasoq allanut aamma tunniunneqarsinnaavoq. Assersuutigalugu Jiisusip toqunissi aqaguttoq ajoqersukkaminut aqqanilinnut aalajaatsunut oqaasii eqqarsaatigikkit. (Lukasi 22:28-30 atuakkit). Jiisusip angutit taakku ikittunnguit aalajaattuarnertik pissutigalugu akissarsisinneqangaarumaarnerannik neriorsorpai. Ajoqersukkat Jiisusi kunngitut oqartussaassuseqarluni issiavissaarsuarminiittoq issiaqatigissavaat. Ukiulli arlaqanngitsut tamatuma kingorna Jiisusi oqamisaarpoq 144.000-it tamarmik naalakkersuisutut issiavissaarsuarmini issiaqataassasut. (Saqq 1:1; 3:21) Taamatuttaaq Matthæusi 24:47-mi allassimasutut Jiisusip angutit ikittunnguit — qatanngutit angutit tanitat inussiamut aalajaatsumut ilaasortaasut — pigisaminut tamanut paarsisunngortinneqarumaarnerannik neriorsorpai. 144.000-inulli ilaasut tamarmik qilammi oqartussaaqatigissavaat. — Saqq 20:4, 6.
144.000-inut ilaasut tamarmik Jiisusi qilammi oqartussaaqatigissavaat (Takuuk immikkoortoq 19)
20. Sooq Jiisusip inussiaq aalajaatsoq paarsisunngortippaa, sunissallu aalajangiusimaviuk?
20 Jiisusi ukiuni hundredeni siullerni inuit ikittunnguit aqqutigalugit amerlasuunik nerisitsisarnermisut inussiaq aalajaallunilu silatooq aqqutigalugu nerisitsisarpoq. Jiisusip ajoqersukkani ilumoortut — tanitat savallu allat — ullut kingulliit tamakkerlugit anersaakkut nerisassanik pilersortuarneqarnissaat qulakkeerniarlugu inussiaq aalajaatsoq paarsisunngortippaa. Qatanngutinik angutinik tanitanik, inussiamut aalajaallunilu silatuumut ilaasortaasunik, aalajaalluta tapersersuiuarnikkut qujamasuutiginninnitsinnik ersersitsinissarput aalajangiusimajuartigu. — Hebr 13:7, 17.
^ par. 2 Immikkoortoq 2: Siusinnerusukkut Jiisusip assersuusiamut assingusumi “inussiaq” ‘pilittatut’ eqqaavaa. — Luk 12:42-44.
^ par. 2 Matthæusi 24:45-47, NW: “Kinaavami inussiaq aalajaallunilu silatooq, naalagaata kiffaminut paarsisunngortitaa piffissaq eqqorlugu nerisassaannik tunisaqqullugit? Inussiaq taanna pilluassaaq naalakkami, tikiukkuni, taamaaliortoq naammattoorpani. Ilumut oqarfigaassi: Pigisaminut tamanut paarsisunngortissavaa.”
^ par. 6 Immikkoortoq 6: Kristusip ‘tikiunnissaa’ (grækerisut erʹchomai) ‘najuunnissaalu’ (parousiʹa) assigiinngitsuupput marluk. Eqqartuussummik naammassinninniarluni tikiutinnginnermini takussaanani najuutissaaq.
^ par. 12 Immikkoortoq 12: Atuagassiami matumani allaaserisami “Ullut tamaasa najorpassi”-mi qupperneq 10-12-imi immikkoortut 5-imiit 8-mut atuakkit.
^ par. 16 Immikkoortoq 16: Atuagassiami matumani allaaserisami “Oqarfigitigut qaqugu tamanna pissasoq”-mi qupperneq 7-8-mi immikkoortut 14-imiit 18-imut atuakkit.
^ par. 66 Allassimaffinni ukunani aamma Lukasi 12:45, 48-mi oqaaseq grækerisooq ‘kiffamik’ nutserneqarsimasoq aamma ‘inussiamik’ nutserneqarsinnaavoq.
