Akerleriin­neq unam­miniar­nar­ner­paat ilagim­mas­suk angajoq­qaatut utaq­qisin­naas­suseqar­nis­saq pingaaruteqar­poq. Maria, panim­minik 14-inik ukiulim­mik Brasiliami najugaqatilik, ima oqar­poq: “Paniga oqar­tus­saas­sutsin­nik akerliliigaangat kamaam­merujus­suar­tar­punga. Kamat­tangaarat­ta nil­lial­luta oq­qat­tar­pugut.” Carmela Italiameersoq aam­ma tamatumun­nga as­singusumik atugaqar­poq. Ima oqar­poq: “Er­neralu tamatigut as­sor­tuuterujus­sualer­tar­pugut, tamatumalu kingor­na er­nera sinit­tarfim­minut mat­tut­tar­poq.”

Sooruna inuusut­tuaq­qat ilaat taama akerliliiumatusar­tigisut? Kam­malaatimin­nit akerliliiumatuun­ngor­tin­neqar­taramik? Im­maqa. Biibilimi al­las­simavoq peqatigisar­tak­kat ajun­ngitsumik imaluun­niit ajor­tumik sun­niuteqangaarsin­naasut. (Us­satit 13:20; 1 Korinthimiut 15:33) Tamatumalu saniatigut ul­lutsin­ni inuusut­tut aliik­kutarisar­tagaat pikitsitsinermik ataq­qin­nin­ngin­nermil­lu akuerineqar­sin­naasun­ngor­titsisar­put.

Pis­sutsil­li al­lat aam­ma eq­qaamasariaqar­pavut. Pis­sutsit taak­ku qitor­nan­nut inuusut­tuaq­qamut qanoq sun­niuteqar­tar­tut paasiguk­kit qaangeruminar­nerulis­sap­put. Ilaat misis­soriar­tigit.

Apustili Paulusi ima al­lap­poq: “Meeraagal­larama meeq­qatut oqalut­tar­punga, meeq­qatut paasin­nit­tar­punga, meeq­qatut eq­qarsar­tar­punga; inersimaleramali meerar­pal­lan­nerit iperar­pak­ka.” (1 Korinthimiut 13:11) Paulusip oqaasiinit erser­poq meeq­qat inersimasul­lu as­sigiim­mik eq­qarsar­neq ajor­tut.

 Meeq­qat amerlaner­tigut suut tamaasa eq­qor­tutut eq­qun­ngitsutul­luun­niit naliler­tar­paat. Inersimasul­li isum­min­ngin­nermin­ni, aalajangiin­ngin­nermin­ni paasiuminaas­sin­naasunul­luun­niit tun­ngatil­lugu eq­qarsaa­tigin­neq­qis­saarluar­ne­rusin­naap­put. As­sersuutigalugu inersimasut pisoq eq­qarsaatigalugu ileq­qoris­saar­nermut tun­ngasunik iliuutsimil­lu al­lanut sun­niutigisin­naasaan­nik eq­qarsaatigin­nit­tar­neq sungiusimaneruaat. Taman­nali inuusut­tuaq­qat misilit­tagaqarfigival­laan­ngilaat.

Inuusut­tuaq­qat eq­qarsarsin­naas­sutsimin­nik ineriar­tor­titsinis­samin­nut Biibilimi kajumis­saar­neqar­put. (Us­satit 1:4) Biibilimit­taaq kristumiut tamarmik silatusaar­tumik isum­mer­tar­nis­saan­nut kajumis­saar­neqar­put. (Romamiut 12:1, 2; Hebræerit 5:14) Qitor­navil­li inuusut­tuaq­qap silatusaar­tumik isum­mer­niar­nermini, al­laat soqutaar­pasin­ngitsunut tun­ngatil­lugu, as­sor­tulersin­naavaatit. Imaas­sin­naavor­taaq naliliil­luarsin­naan­ngin­nermik ersersitsisumik isum­mer­toq. (Us­satit 14:12) Taamatut pisoqar­pat oq­qateqatiginagu eq­qarsalersin­niarlugu qanoq oqaloqatigisin­naaviuk?

Mianersoq­qus­sut: Qitor­nan­nik inuusut­tuaq­qamik oqaloqatigin­nik­kaangavit an­neruniar­tas­san­ngilatit. Qanorluun­niit tusaan­ngitsuusaar­tigigaluar­pat ilimanar­poq ilimagisan­nit, nam­minerluun­niit nas­suerutigisin­naasaminit, tusar­naar­nerul­lunilu akuersaar­toq. Ul­lualuit qaangiutereersut qitor­navit isum­man­nik akuersisimanera, al­laal­luun­niit il­lit isum­man­nik nam­mineq isumas­sarsiarin­nis­simaneraanera, tupaal­laatigis­san­ngilat.

“Ilaan­nik­kut er­neralu soqutaan­ngitsut, soorlu asuli atuis­san­ngin­nera najaminil­luun­niit qin­ngasaaris­san­ngin­nera, as­sor­tuus­sutigisar­pavut. Amerlaner­tigul­li al­laaneq ajor­poq qanoq eq­qarsar­nerminik apereq­qusaar­tarlunilu paasineqarusut­tar­toq soorlu ima oqarfigineqar­nermigut: ‘Aatsaal­liaasiit,’ imaluun­niit ‘Sunaaf­fa taama isumaqar­putit’. Pereersut eq­qarsaatigalugit taamatut periuseqarsimasuuguma as­sor­tuup­pal­laar­tar­simanavian­ngik­kaluar­pugut.” — Kenji, Japanimiu.

Inuusut­tuaq­qap angajoq­qaaminiit nuun­nis­saanut inersimasutul­lu akisus­saas­su­seqar­tutut im­minut pilersor­nis­saanut piareersar­nera perorsaanermi pingaaruteqar­luin­nar­poq. (1 Mosesi 2:24) Tamatumun­nga tun­ngatil­lugu kinaas­sutsimik ineriar­tor­titsineq avaq­qun­neqarsin­naan­ngilaq, tas­sa inuusut­toq ilisar­naatitut pis­suseri­sas­saminik, isum­maminik pingaar­titaminil­lu kinaas­sutsiminik ersersitsisunik ineriar­tor­tit­sisus­saavoq. Inuusut­tuaraq kinaas­sutsiminik ilisimaarin­nil­luar­toq eq­qun­ngitsu­lior­nis­saminut tatineqar­nermini iliuutsimi kingunis­sai eq­qarsaatigiin­nar­nagit im­minut aam­ma ima aperis­saaq: ‘Inut­tut qanoq it­tuuvunga? Suut pingaar­tip­pak­ka? Inuk taamaat­tunik pingaar­titalik taamatut nalaataqaruni qanoq ilius­sava?’ — 2 Petrusi 3:11.

Josefi, angut inuusut­toq kinaas­sutsiminik ilisimaarin­nil­luar­toq, Biibilimi oqalut­tuarineqar­poq. Potifarip nuliata in­naan­niarsarim­mani ima akivoq: “Qanoq taama kan­ngunar­tigisumik ilius­saanga Guutimut ajor­tuliorlunga?” (1 Mosesi 39:9) Taamanik­kut inatsisit al­lasioq­qusin­ngitsut Israelik­kun­nut suli tun­niun­neqarsiman­ngil­lat, Josefil­li Guutip al­lasior­nermut tun­ngatil­lugu isigin­nit­taasia paasivaa. Imalu oqar­nermigut “qanoq taama kan­ngunar­tigisumik ilius­saanga” al­lasior­nermut tun­ngatil­lugu Guutitut isigin­nit­taaseqar­nini ersersip­paa. Taman­na kinaas­susianut ilisar­naataalersimavoq. — Efesosimiut 5:1.

Qitor­navit inuusut­tuaq­qap aam­ma kinaas­sutsiminik ineriar­tor­titsinera pitsaasuuvoq, isum­mam­mi aalajangius­simasani kam­malaatiminit tatineqar­nerminik akerliliinis­saminut iluaqutigis­sagamigit. (Us­satit 1:10-15) Kinaas­sutsiminil­li ilisimaarin­nin­nerujar­tor­nini pis­sutigalugu aam­ma ilin­nik akerlileeriar­talersin­naavoq. Taama pisoqar­pat qanoq iliorsin­naavit?

Kinaas­sutsimik ineriar­tor­titsineq — nam­mineq isum­mer­taler­neq — nalingin­naagin­narani iluaqutaavoq. Biibilimi al­las­simavoq kristumiut meeq­qatut ‘mal­linit ajoqersuutil­lu suul­luun­niit anoraan­nit tamanut tamaanga nas­sataritis­san­ngitsut’. (Efesosimiut 4:14) Taamaat­tumik qitor­navit inuusut­tuaq­qap kinaas­sutsiminik ineriar­tor­titsinera akueralugulu kinaas­sutsiminik ineriar­tor­titsinis­saanut aalajangersimasunil­lu isum­mer­taler­nis­saanut kajumis­saaruk.

“Panik­kalu isumaqatigiin­ngik­kaluarluta tusar­naarusun­nera malugigaangamik­ku isum­man­nik eq­qarsaatigin­nik­kumaneruler­tar­put. Uat­tut isum­mer­nis­saan­nut pin­ngitsaalinaveersaarlugit nam­min­neq isum­mer­nis­saat akuerisar­para.” — Ivana, Tjek­kiamiu.

Inuusut­tuaq­qat ilaat, meeraaq­qatut, angajoq­qaamik akuersiin­nar­nis­saata tungaanut uteriiser­tar­put. Ilaqut­tas­sin­ni taamatut pisoqarajup­pat mianersus­saatit. Taman­na im­maqa ingerlaan­naq eq­qis­seqatigiilersitsisaraluar­toq qitor­navit as­sor­tuinermigut perusutaminik pinis­sani ilik­kar­tar­paa. Qanoq iliorsin­naavit? Jiisusip siun­nersuutaa maleruaruk: “Anger­nersi imaas­saaq: Aap, naaggaar­nersilu: Naagga.” (Mat­thæusi 5:37) Inuusut­tuaq­qat angajoq­qaamik aalajangersimal­luin­nar­tuunerat nalun­ngik­kaangamik­ku as­sor­tuinis­samin­nut tunuarsimaar­nerusar­put.

Tamatumali saniatigut ingasaas­siniar­tuus­san­ngilatit. As­sersuutigalugu qitor­nat sooq un­num­mi ataatsimi pisar­nermit kingusin­nerusuk­kut angerlarusun­neranik nas­suiaaq­qusin­naavat. Taamaalior­nik­kut tatineqar­nermut nak­kaan­nar­nak Biibilimi siun­nersuut una maleruas­savat: “Qanilaarsusersi [Ingasaas­sinian­ngitsuunersi, NW] ilisimaneqalerli inun­nit tamanit.” — Filip­pimiut 4:5.

Soorunami angajoq­qaat tamarmik kuk­kusin­naasar­put. Biibilimi ima al­las­simavoq: “Tamat­ta amerlasuunik kuk­kus­suteqar­tar­pugut.” (Jaaku 3:2) Il­lit qitor­nal­lu oq­qan­nis­sin­nut pisooqataanerit paasigaangak­ku utoq­qatsipal­lat­tas­saatit. Kuk­kus­sutin­nik nas­suerutigin­nit­tar­nik­kut maniguun­nermut tun­ngatil­lugu maligas­siuil­luas­saatit, taman­nalu qitor­navit ilit­tut ilior­nis­saminut kajumis­sis­sutigis­savaa.

“Er­neralu as­sor­tuuk­kun­naareerat­ta eq­qis­siimereeramalu kamas­simanera pil­lugu utoq­qatserfigaara. Utoq­qatser­nera eq­qis­sinerulis­sutigalugulu uan­nut tusar­naarusun­nerulis­sutigaa.” — Kenji, Japanimiu.