DIAMBU DIA KAPA | DILOMBOLUELU DIA ISUMA IA DIULU
Ibhuidisu ia Lungu ni ió a Tungu ku Diulu
O kuila saí kizuua ua dibhuisa kiá ia lungu ni diulu, ni ia lungu ni ió ala mu diulu? Se kiene, k’eie ngó. Tundé ukulu, athu ene mu zuela ima iavulu ia lungu ni maka enhá. Athu avulu a xikina kuila, mu diulu muene muala o jikuku a tokala kua xila. O athu a mukuá a banza kuila, kididi kia uabha, kia tululuka kua tungu jianju ni athu ambote afú kiá ukulu. A mukuá ué a banza kuila, o diulu o kididi phala o jimidi ja jinzambi.
Athu avulu amba kuila ki tu tena kuijiia kima kia lungu ni diulu, mukonda sé-ku muthu uaile kiá mu diulu phala ku tu jimbuluila o maka enhá. Maji, o kibanzelu kiki, kiaiibha. Jezú Kristu ua kexile mu diulu ande dia kuiza mu ixi. Muéne uambe ni kidi kioso ku jimesene ja jingeleja mu hama ia dianga: “Eme nga tuluka mu diulu, kana mu kubhanga o vondadi iami, maji kubhanga vondadi ia ió uoso ua ngi tumu.” Mu kiki, Jezú ua kexile mu londekesa ima ia lungu ni diulu ku jipoxolo jê kioso kiambe: “Sai ididi iavulu ku bhata dia Tat’etu.”—Nzuá 6:38; 14:2.
O Tata ia Jezú, muene Nzambi, o dijina diê Jihova. O ‘dibhata diê’ ku diulu. (Jisálamu 83:18) Mu kiki, sé-ku muthu ueji lombolola kiambote o diulu, ki kale ngó Jihova Nzambi, ni Jezú Kristu. Ene, ene mu jimbulula kiavulu o maka enhá bhu kaxi ka isuma ia bhanene ku jiselevende ja fiiele.
O milongi ia kaiela, izuela mbandu ia Bibidia ilondekesa ihi ia mono o athu mu isuma. Kioso ki uia ni kutanga o isuma íii, lembalala kuila o diulu ki kima ki tu tena ku ki kuata ni ku ki mona. Kienhiki, mu veji dia ku tu jimbulula o maka enhá mu ukexilu ua jianju, Nzambi ua jimbulula o diulu mu ukexilu u tu tena kutendela. O isuma ia-nda ku kuatekesa kutendela ia lungu ni iô a tungu ku diulu. Kuenhoko “sai ididi iavulu.”
