O kilunga kietu kiala mu ngongo ioso, etu ki tu di lungu ni ibuka ia mukuá ia jingeleja. Sumbala o mbonge ietu iala mu ixi ia Estados Unidos, Jimbangi javulu ja Jihova a tungu mu jixi jengi. Mu kidi, etu tua tenesa dinake dia mazunda a athu ndenge, tuene mu longa o Bibidia mu 230 a jixi ndenge. Tua mu belesela o kitendelesu kia Jezú: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.”—Matesu 24:14.

Sumbala tua tungu mu ididi iavulu, maji né kiki etu enioso tu belesela o itumu ia ixi mu tua tungu. Maji ki tuene mu dita mu maka a jinguvulu. Mukonda tu belesela o itendelesu ia Jezú ia bhana ku Jikidistá kuila, “ki mu tokala ku mundu.” Kienhiki, ki tuene mu dita mu maka a jinguvulu mba ima ia mukua ia mundu, kála o kulúa ita. (Nzuá 15:19; 17:16) Mu ita ia Kaiadi ia Bhiti ku Mundu, o Jimbangi ja Jihova a a tele mu kaleia, a a bhele kibetu ni ku a jibha mukonda ka mesenene kubhukumukina o kitumu kia a xila Jezú. Saí bispu mukua Alemanha ua soneka: “Ene ngó a tenene kudituna kujibha athu ku utuminu ua Hitler, mukonda dia kitongoluelu kiâ.”

Maji né kiki, etu tua tungu muene bhu kaxi ka athu. Jezú ua sambe kua Nzambi mu ku bhingila o akaiedi’ê: “Ki nga bhingi kuma u a katula mu ngongo.” (Nzuá 17:15) Mu kiki-phe, eie u tena ku tu mona ku kalakala, ku sumba ni kuia bhu xikola mu ji sanzala mu tua tungu.