DIAMBU DIA KAPA | A NANHI O JIMBANGI JA JIHOVA?
A Nanhi o Jimbangi ja Jihova?
“Ng’ejidile kiá Mike mu mivu iavulu. Muéne Mbangi ia Jihova. Maji nga kexile ni phata iavulu ia lungu ni ngeleja iê. Nga kexile mu dibhuidisa, Jihova nanhi? Mukonda diahi o Jimbangi ja Jihova kene mu bhanga o jifesa ja mundu? O kuila Mike ua kexile mu kibuka kiaiibha kia ngeleja?”
—Becky, California, Estados Unidos.
“Kioso o jivizinhu jami kia mateka ku di longa o Bibidia ni Jimbangi ja Jihova, eme nga kexile mu dibhuidisa: “Ihi ilombolola o dijina Jimbangi ja Jihova? O dijina didi ki di fuama ku di luka ngeleja!’”
—Zenon, Ontario, Canada.
“Eme ni muhatu’ami tua kexile mu di tatela mukonda dia kukamba kuia mu ngeleja. Tua mono kuila o Jimbangi ja Jihova akexile mu tu kunda ngó mukonda ki tu kexile múia mu ngeleja. Maji tua banze, se o jingeleja ja makota ki ji kexile ni milongi i tua kexile mu sota, o kibuka kia Jimbangi ja Jihova keji tena ué ku tu kuatekesa.”
—Kent, Washington, Estados Unidos.
“Mu kidi eme ki nga ejidile kiambote, ki ng’ejidile ué ihi ia xikinine.”
—Cecilie, Esbjerg, Denmark.
Nange ua mono kiá o Jimbangi ja Jihova kuboka nzo ni inzo, mba mu ikoka, mu kubhana madivulu, mba kulonga o Bibidia mu mabhata. Nange o kadivulu kaka Mbangi ia Jihova ua kubhana-ku. Né kiki, nange u dibhuidisa hanji se a nanhi o Jimbangi ja Jihova. Nange u banza ué kála o athu u tua a tange kiá ku dimatekenu.
Se kuijiia luua o Jimbangi ja Jihova, nanhi u tena ku ku kuatekesa kua ejiia kiambote? Kiebhi ki u tena kuijiia ihi i xikina o Jimbangi ja Jihova? Nanhi uene mu bhana o kitadi phala kubhanga o kikalakalu kiâ ni kutunga o ididi iâ ia ubhezelu, ni mukonda diahi ene a kunda o athu ku mabhata mâ, ni ku a bokela mu ikoka?
Cecilie, tua mu tange kiá ku dima, uambe: “Nga tange ima iavulu ia lungu ni Jimbangi ja Jihova mu Internete. Ngevu ué ima iavulu ni madiskursu akexile mu zuela ima ia iibha ia lungu ni ene. Mukonda dia kiki, nga mateka kubanza ima ia iibha ia lungu ni Jimbangi ja Jihova.” Maji mu kubhita thembu, muéne ua zuela ni Jimbangi ja Jihova, ia a mu tambuijila o ibhuidisu iê ioso.
Ua mesena kusanga o itambuijilu ia kidi ia ibhuidisu iê ia lungu ni Jimbangi ja Jihova? Tua ku suínisa kuzuela ni Jimbangi ja Jihova ene mu bhanga o kadivulu kaka. (Jisabhu 14:15) Tua mesena kuila o kadivulu kaka, ka tene ku ku kuatekesa ku tuijiia kiambote, ni kuijiia ué mu ihi i tu xikina, ni kuijiia ué o ikalakalu ietu.
